Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde ter stont des morghens die ouerste priesters raet houdende metten ouderen ende Scriben, ende alle den raet, bindende Iesum, hebben sij hem gheleyt ende gheleuert Pilato.

+ A

2

Ende Pilatus heeft hem gheuraecht. Sijdt ghy die coninck der Ioden? Ende hy antwoerdende heeft tot hem gheseyt, Ghy segghet.

3

Ende die ouerste priesters besculdichden hem in vele dinghen.

4

Maer Pilatus heeft hem wederom gheuraecht segghende, En antwoerdi niet? siet van hoe veel dinghen dat sij v besculdighen?

5

Maer Iesus en heeft niet meer gheantwoert, alsoe dat Pilatus hem verwonderde.

6

Ende int hoochtijt soe plach hy hen lieden vrij te laten gaen een vanden gheuanghenen den welcken sij begheerden.

7

Ende daer was eenen die ghenoemt was Barabbas, die metten oproerighen gheuanghen was, die welcke inden oploop eenen dootslach ghedaen hadde.

8

Ende doen die scare op ghecomen was, soe hebben sij begonnen te bidden dat hy doen soude als hij hen lieden altijt dede.

9

⁺Maer Pilatus heeft hen gheantwoert ende gheseyt, Wildi dat ick v vrij gheue den coninck der Ioden?

+ B

10

Want hy wist wel, dat die ouerste priesters hem wt nijdicheyt gheleuert hadden.

11

Maer die ouerste priesters verwecten die scare dat hy hen meer soude Barabbam vrij laten gaen.

12

Ende Pilatus wederom antwoerdende heeft tot hen gheseyt. Wat wildi dan dat ick doen sal den Coninck der Ioden?

13

Ende sij hebben weder om gheroepen Cruyst hem?

14

Maer Pilatus seyde tot hen, Wat quaet heeft hy ghedaen? Ende sij riepen noch meer Cruyst hem.

15

Ende Pilatus willende den volcke voldoen, heeft hen Barabbam vrij ghelaten, ende hy heeft gheleuert Iesum met gheesselen gheslaghen, datmen cruycen soude.

16

Ende die ruyters hebben hem gheleyt in dat voerhof van dat rechthuys, ende roepen te samen alle den hoop

[p. *791]

der ruyters,

17

ende doen hem aen een purpuren cleedt, ende vlechtende een doorne croone setten sij die op hem.

18

Ende sij hebben hem begonnen te groeten. Weest ghegroet coninck der Ioden.

19

Ende sij sloeghen sijn hooft met een riet, ende sij bespoghen hem, ende booghende hen knien aenbaden sij hem.

20

Ende nae dat sij hem bespot hadden, soe hebben sij hem dat purpuren cleedt wtghedaen, ende hebben hem sijn cleederen aenghedaen, ende sij leyden hem wt, dat sij hem cruycen souden.

21

Ende sij hebben ghedwonghen eene daer voer by gaende Simon van Cyrenen, comende wt een dorphuys, den vader van Alexander ende Rufus, dat die sijn cruys draghen soude.

22

Ende sij leyden hem tot op die plaetse Golgatha, dwelck is te segghen, die plaetse der dootshoofden.

23

Ende sij gauen hem te drincken wijn met myrrhen ghemenghet, ende hy en heeft dat niet ghenomen.

24

Ende hem cruycende hebbense sijn cleederen ghedeylt, worpende dlot daer op wie wat wechdraghen soude.

25

Ende het was die derde vre ende sij hebben hem ghecruyst.

26

Ende den tijtel van sijnder saken was daer op ghescreuen. Die Coninck der Ioden.

27

⁺Ende met hem cruycen sij twee mordenaren, den eenen aen sijn rechte, ende den anderen aen sijn slincke sijde.

+ C

28

Ende die scriftuere is volbrocht, die seyt. Ende metten boosen is hy gherekent.

29

Ende die voerby ghinghen blasphemeerden hem, scuddende hen hooft, ende segghende, Tsij v die den tempel verderft, ende op drij daghen dien optimmert,

30

verlost v seluen comende vanden cruyce.

31

Desghelijcs oock die ouerste priesteren spottende tot malcanderen metten Scriben seyden, Ander heeft hy ghesont ghemaect sij seluen en can hy niet ghesont maken.

32

Christus die coninck van Israel die come nu vanden cruyce af, dat wy dat sien moghen ende gheloouen. Ende die met hem ghecruyst waren bescimpten hem.

33

Ende alst die sestvre worden was, soe sijnder duysternissen ghecomen ouer alle die aerde tot die neghenste vre.

34

Ende ter neghenster vren heeft Iesus met luyder stemmen gheroepen segghende, Eloi, Eloi lamma sabacthani? Dwelck is te segghen, Mijn Godt, Mijn Godt, ⁺waer om hebdi mij verlaten?

+ D

35

Ende sommighe vanden ghenen die daer omtrent stonden dit hoorende seyden, Siet hy roept Eliam.

36

Maer een loopende ende vullende een spongie met edick, ende die doende om een riet heeft hem te drincken ghegheuen segghende, Ontbeyt, laet ons sien oft Elias comen sal om hem af te doen.

37

Maer Iesus wtlatende een groote stemme heeft sijnen gheest ghegheuen.

38

Ende dat voerhancsel des tempels is ghescoert in twee stucken, van bouen tot beneden.

39

Ende die honderste man die teghen ouer stont, siende dat hy alsoe roepende sijnen gheest ghegheuen hadde, heeft gheseyt, Voorwaer dese mensche was die sone Gods.

40

Ende daer waren vrouwen van verre aensiende, onder die welcke was Maria Magdalene ende Maria die moeder van Iacobus den mindere, ende die moeder van Ioseph, ende Salome,

41

ende doen hy in Galileen was soe volchden sij hem, ende sij dienden hem, ende veel andere die tsamen met hem opwaerts ghecomen waren na Ierusalem.

42

Ende alst nu auont gheworden was (want het was den bereydach die voer den sabboth is)

43

soe is ghecomen Ioseph van Arimathia een edel thiendeman, die selue ooc was verwachtende het rijck Gods. Ende hy is stoutelijck inghegaen tot Pilatus, ende heeft Iesus lichaem begheert.

44

Ende Pilatus verwonderde hem, oft hy nu ghestoruen was. Ende roepende den hondertste man vraechde hi hem oft hi nu ghestoruen was.

45

Ende doen hijt geweten heeft vanden hondertsteman, soe heeft hy dlichaem Ioseph ghegheuen.

46

Ende Ioseph ghecocht hebbende een lijnen cleedt, ende hem afdoende, heeft hy hem ghewonden in dat lijnen cleedt, ende hy heeft hem int graf gheleyt, dat ghehouwen was wter steenroetsen, ende hy heeft eenen steen ghewentelt tot aen die doore des graefs.

47

Maer Maria Magdalene, ende Maria Ioseph saghen toe waer dat hy gheleyt soude worden.