Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

+ 1

⁺ENde als den sabboth ouerleden was, soe hebben Maria Magdalene ende Maria Iacobi ende Salome specerien ghecocht, dat sij comende Iesum souden saluen.

+ A

2

Ende seer vroech opden iersten dach vander weken comen sij totten graue als die sonne nu opghegaen was.

3

Ende sij seyden tot malcanderen. Wie sal ons den steen af wentelen van die doore des graefs?

4

Ende ommesiende hebben sij ghesien den steen afghewentelt. Want hy was voerwaer seer groot.

5

Ende int graf gaende, hebben sij ghesien eenen ionghelinck sittende ter rechter sijden, ghecleedt met een wit blinckende lanc cleedt, ende sij sijn vervaert gheworden.

6

Die welcke seyt tot hen lieden. En wilt v niet verscricken. Ghy soect Iesum van Nazareth die ghecruyst is, ⁺hy is verresen, hy en is hier niet, siet hier die plaetse daer sij hem gheleyt hebben.

+ B

7

Maer gaet henen, segt sijnen discipelen ende Petro, dat hy voer v gaet, in Galileen, daer suldi hem sien ghelijck hy v gheseyt heeft.

* 8

Maer sij wtgaende sijn gheuloden van dat graf, want sij waren beuanghen met beuinghe ende verscrictheyt, ende sij en hebben niemanden iet gheseyt, want sij vreesden.

9

+ Maer Iesus opstaende des morghens opden iersten dach vanden Sabboth heeft ierstmael gheopenbaert Marie magdalene, wt die welcke hy seuen duyuelen verdreuen hadde.

10

Dese wechgaende heuet ghebootscapt den ghenen die met hem gheweest hadden, die droeuich waren ende weenende.

11

⁺Ende die hoorende dat hy leefde, ende van haer ghesien was, en hebbens niet gelooft.

+ C

12

Maer nae desen is hij tween van haer lieden wandelende verthoont gheweest in een ander ghedaente, gaende nae een lanthuys,

13

ende die gaende hebbent den anderen ghebootscapt. * ende sij en hebben die ooc niet ghelooft.

14

+ Ten laetsten heeft hy gheopenbaert den eluen sittende ter tafelen, ende hy heeft hen verweten haer lieder ongheloouicheyt ende die hartheyt haerder herten, want sij niet ghelooft en hadden den ghenen die hem ghesien hadden dat hy veresen was.

15

Ende hy heeft hen gheseyt, Gaende henen in alle die werelt, vercondicht het Euangelie allen creatueren.

16

Soe wie ghelooft ende ghedoopt wort die sal salich worden, maer soe wie niet en ghelooft die sal verdoemt worden.

17

Maer dese teekenen sullen hen volghen die gheloouen sullen. Doer mijnen naem sullen sij duyuelen wt worpen. ⁺Met nieuwe tonghen sullen sij spreken.

+ D

18

Serpenten sullen sij wech nemen. Ende eest dat sij iet doodelijcs drincken, dat en sal hen niet hinderen. Op die siecken sullen sij hen handen legghen, ende die sullen wel te passe worden.

19

Ende voerwaer die Heere Iesus nae dat hy hen ghesproken hadde, is opghenomen inden hemel, ende hy is gheseten aen die rehte hant Gods.

20

Ende dese wech gheryest sijnde hebbent ouer al ghepreect. Den Heere medewerckende, ende die woerden versterckende doer nauolghende teekenen.

* Hier voleynt Sinte Marcus Euangelie.