Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xiiij. Capittel.

+ 1

⁺ENde het was Paesschen ende den dach vanden ongheheefden brooden nae twee daghen, ende die ouerste Priesters ende die Scriben sochten hoe sij hem met bedroch vanghen souden ende dooden.

+ A

2

Want sy seyden, Niet opden feestdach datter by auontueren gheenen oploop des volcs en ghesciede.

3

Ende doen hy was te Bethanien int huys van Simon den melaetschen, ende ter tafelen sadt, soe isser een vrouwe ghecomen hebbende een alabasteren busse met onghevalschte costelijcke nardus salue, ende die alabasteren busse ghebroken hebbende heeft sij die wtgestort op sijn hooft.

4

Maerdaer wasser sommighe dat onweerdelijck nemende in hem seluen, ende segghende. Waer toe is dit verlies van deser saluen ghedaen?

5

Want dese salue hadde moghen vercocht worden meer dan drij hondert penninghen, ende den armen ghegheuen. Ende sij grimden op haer.

6

Maer Iesus heeft gheseyt, laetse gheworden, waer om sijdi haer moeyelijck? Sij heeft een goet werck aen my ghewracht,

7

want altijt hebdi arme met v, ende als ghy wilt soe moechdi dien wel doen, maer my en hebdi altijt niet.

8

Dat dese ghehadt heeft dat heeftse ghedaen, sij is te voren ghecomen mijn lichaem te saluen ter begrauenissen.

9

Voerwaer ick segghe v lieden, soe waer dit Euangelie sal gheprect worden in die gantsche werelt, daer salt oock vertelt worden dat dese ghedaen heeft tot haerder ghedenckenissen.

10

⁺Ende Iudas die Iscarioter een vanden twaeluen is wech ghegaen tot die ouerste Priesters dat hy hem lieden dien verraden soude.

+ B

11

Die welcke dit hoorende sijn verblijt gheweest, ende hebben hem gheloeft ghelt te gheuen. Ende hy socht hoe hy hem bequamelijck soude leueren.

12

Ende opden iersten dach van die ongheheefde brooden alsmen tpaeslam ten offer doodde, soe segghen tot hem die discipelen. Waer wildi dat wy gaen, ende voor v bereyden, dat ghy tpaeschlam eten moecht?

13

Ende hy seyndt twee van sijnen discipelen, ende seyt hen. Gaet in die stadt ende v sal een mensch ontmoeten draghende een flessche waters, volcht hem,

14

ende waer hy ingaet segghet daer den huysheere dat die meester seyt, Waer is mijn eetplaetse, daer ict paeschlam met mijnen discipelen mach eten?

15

Ende hy sal v toonen een groote eetcamer bereyt, ende aldaer bereydet ons.

16

Ende sijn discipelen sijn wech ghegaen, ende sijn in die stadt ghecomen, ende hebbent gheuonden ghelijck hy hen gheseyt hadde. Ende sij hebben tpaeschlam bereyt.

17

Ende alst auont gheworden was, soe is hy ghecomen met die twaelue.

18

⁺Ende doen sij ter tafelen saten ende aten soe heeft Iesus gheseyt, Voerwaer ick segghe v datter een van v lieden my verraden sal, die met my eet.

+ C

19

Ende sij begonsten droeuich te worden, ende hem te segghen elck besonder, Ben ict?

20

Die welcke heeft hen gheseyt, Een vanden twaeluen die met my de hant dopt in die scotel,

21

ende die sone des menschen gaet voerwaer, alsoot van hem ghescreuen is, maer wee dien mensch doer den welcken die sone des menschen sal verraden worden. Het waer hem goet en waer die mensch niet gheboren.

22

Ende doen sij aten, soe heeft Iesus tbroot ghenomen, ende ghebenedijdende heeft hy dat ghebroken, ende hen ghegheuen, ende gheseyt, Neemt dat is mijn lichaem.

23

Ende als hy den kelck ghenomen hadde danckende heeft hy hen dien ghegheuen, ende sij hebben alle daer wt ghedroncken.

24

Ende hy heeft hen gheseyt, Dits mijn bloet des nieuwen Testaments, dat voer vele sal wtghestort worden.

25

Voerwaer ick segghe v, dat ick voertaen niet meer drincken en sal van tghewas des wijnstruycs tot op dien dach toe, als ick dat drincken sal (nieu) int rijck Gods.

26

Ende als sij den lofsanck gheseyt hadden, soe sijn sij wtghegaen opden berch van den olijfboomen.

27

Ende Iesus seyde hen, Ghy sult allegader in my verargert worden in desen nacht, want daer is ghescreuen. Ick sal den herder slaen, ende die scapen sullen verstroyt worden,

28

maer nae dat ick opghestaen sal wesen, soe sal ick v voorgaen in Galileen.

29

Maer Petrus heeft tot hem gheseyt. ⁺Al waert oock dat sij alle verarghert worden, maer ic niet.

+ D

30

Ende Iesus seyde hem. Voerwaer ick segghe v, dat ghy heden in deser nacht (een den haen tweemael sijn stemme gheuen sal) my drijmael sult verloochenen.

31

Maer hy sprack noch meer. Al waert oock dat ick met v soude moeten steruen, soe en sal ick v niet verloochenen. Desghelijcs seyden sij oock allegader.

32

Ende sij sijn ghecomen in een lanthof ghenaempt Geth-semani. Ende hy seyde tot sijnen discipelen. Sidt hier tot dat ick ghebeden hebben.

33

Ende hy neemt Petrum ende Iacobum, ende Iohannem met hem, ende hy heeft begonst te vreesen ende verdrietich te sijne.

34

Ende hy seyde tot hen, Mijn ziele is droeuich totter doot, verbeyt hier, ende waect.

35

Ende doen hy een luttelken voerts ghegaen was, soe is hy gheuallen op die eerde, ende hy badt, dat die vre (waert moghelijck) van hem voerby gaen soude,

36

ende hy heeft gheseyt. Abba, Vader, alle dinghen sijn v moghelijck, neemt desen

[p. *790]

kelck wech van my, maer niet dat ick wille, maer dat ghy wilt.

37

Ende hy is ghecomen ende heeftse gheuonden slapende. Ende hy heeft Petro gheseyt, Simon slaepti? En hebdi niet een vre met my moghen waken?

38

Waect, ende bidt dat ghy niet en coemt in becoringhe. Den geest is voerwaer bereedt, maer tvleesch is cranck.

39

Ende wederom wechgaende heeft hy ghebeden tselue woert segghende.

40

Ende weder keerende heeft hy die anderwerf gheuonden slapende (want hen ooghen waren beswaert) ende sij en wisten niet wat sij hem antwoerden souden.

41

Ende hy is ten derdenmael ghecomen, ende heeft tot hen gheseyt, Slaept nu ende rustet, Tes ghenoech, die vre is ghecomen, siet die sone des menschen sal gheleuert worden in die handen der sondaren.

42

Staet op ende laet ons gaen, siet, die my leueren sal is hier by.

43

Ende doen hy noch sprekende was, soe is ghecomen Iudas die Iscarioter een vanden twaeluen ende met hem een groote scare met sweerden ende stocken, ⁺van die ouerste priesteren, ende Scriben ende ouderen.

+ E

44

Ende sijn verradere hadde hen een teeken ghegheuen segghende, Den welcken ick cussen sal, die eest, vangt dien ende leyt hem behendelijck.

45

Ende doen hy ghecomen was, soe heeft hy ter stont tot hem aencomende gheseyt, Rabbi, ende hy heeft hem ghecust.

46

Ende sij sloeghen hen handen aen hem, ende sij hebben hem gheuanghen.

47

Maer een vanden ghenen die daer omtrent stonden een sweert wtreckende heeft den knecht van den oppersten priester gheslaghen, ende heeft hem sijn oore afghehouwen.

48

Ende Iesus antwoerdende heeft tot hen gheseyt. Sijdi als tot eenen moerdenaer wtghegaen met sweerden ende stocken om my te vanghen?

49

daghelijcs was ick by v lieden inden tempel leerende, ende ghy en hebt my niet gheuanghen. Maer op dat die scriftueren volbracht souden worden.

50

Doen sijn zijn discipelen hem verlatende allegader gheuloden.

51

Maer een ionghelinck volchde hem, ghecleedt met lijnwaet op sijn naecte lijf, ende sij hebben hem gheuanghen.

52

Maer hi wechworpende dat lijnwaet is naect van hen wech gheuloden.

53

Ende sij hebben Iesum gheleyt totten ouersten priester. Ende alle die priesters ende die Scriben ende die ouders zijn by een ghecomen.

54

Maer Petrus is van verre hem gheuolcht tot binnen int voerhof des ouerste priesters, ⁺ende hy sadt metten dienaers by tvier ende wermde hem.

+ F

55

Maer die ouerste priesters ende den gheheelen raet, sochten teghen Iesum ghetuyghenis, dat sij hem ter doot leeueren souden, ende sij en hebbens niet gheuonden.

56

Want vele seyden daer valsch ghetuyghenis teghen hem, ende hen ghetuyghenissen waren ombequam.

57

Ende eenighe opstaende hebben teghen hem een valsch ghetuyghenis ghegheuen seggende,

58

Wy hebben hem hooren segghen. Ick sal desen tempel metten handen ghemaect breken, ende binnen drij daghen sal ick eenen anderen met ghenen handen ghemaect optimmeren.

59

Ende hen ghetuyghenis en was niet bequaem.

60

Ende die ouerste priester int midden op staende heeft Iesum gheuraecht segghende, En antwoerde ghy niet op die dinghen die v opgheleyt worden van dese?

61

Maer hi sweech ende hy en heeft niet gheantwoert. Wederom vraechde hem die ouerste priester, ende heeft tot hem gheseyt. Sijdi Christus die sone des ghebenedijden Godts?

62

Ende Iesus heeft hem gheseyt, Ick bent, ende ghy sult den sone des menschen sien sitten aen die rechte sijde der cracht, ende comende met die wolcken des hemels.

63

Maer die ouerste priester scoerende sijn cleederen heeft gheseyt, Waer toe begheeren wy noch meer ghetuyghen?

64

⁺Ghy hebt blasphemie ghehoort. Wat dunct v lieden? Die welcke hebben hem alle verdoemt der doot sculdich te sijne.

+ G

65

Ende die sommighe hebben begonnen hem te bespouwen, ende sijn aensicht te bedecken, ende met halslaghen hem te slaen, ende tot hem te segghen, Propheteert, ende die dienaers hebben hem gheslaghen met kinnebacslaghen.

66

Ende doen Petrus was in dat voerhof beneden, soe esser een van die dienstvrouwen des ouerste priesters ghecomen,

67

ende doen sij Petrum ghesien hadde hem seluen wermende, soe heeft sij hem besiende gheseyt. Ghy waert oock met Iesu van Nazareth.

68

Ende hy heuet gheloochent segghende, Ick en kents niet, noch ick en weet niet wat ghy segghet. Ende hy is buyten ghegaen voer dat voerhof, ende den haen heeft ghecraeyet.

69

Ende als hem wederom die dienstvrouwe ghesien hadde soe begonste sij te segghen totten ghenen die daer omtrent stonden. Dese is van dien lieden.

70

Ende hy heuet wederom gheloochent, Ende nae een luttelken hebben sij die daer omtrent stonden weder om gheseyt tot Petrum. Voerwaer ghy sijt van dien lieden, want ghy sijt oock een Galileus man.

71

Maer hy begonste te vervloecken, ende te sweeren. Ick en kenne desen man niet die ghy segt.

72

Ende ter stont heeft den haen wederom ghecrayet. Ende Petrus heeft ghedachtich gheweest des woerts dat hem Iesus gheseyt hadde. Eer den haen tweemael craeyen sal, suldi my drijmael loochenen. Ende hy heeft bestaen te weenen.