Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde doen hy wten tempel ghinck, soe heeft tot hem gheseyt een van sijnen discipelen, Meester aensiet hoedanighe steenen, ende hoe danighe timmeragien.

+ A

2

Ende Iesus antwoerdende seyde tot hem, Siedi wel alle dese groote timmeragien? Daer en sal den eenen steen opden anderen steen niet ghelaten worden, die niet en sal verdoruen worden.

3

+ Ende doen hy sadt op den berch der olijfboomen teghen ouer den tempel, soe vraechden hem heymelijcken Petrus, ende Iacobus, ende Iohannes, ende Andreas.

4

Segt ons wanneer sullen dese dinghen ghescieden? Ende wat teeken salt sijn als alle dese dinghen sullen beghinnen volbracht te worden?

5

Ende Iesus antwoerdende heeft hen begonst te segghen. Siet toe dat v niemant en verleyde,

6

want daer salder vele in mijnen name comen segghende dat Ict ben, ende sij sullender veel verleyden.

7

Maer als ghy hooren sult orlooghen, ende gheruchten, van orloghen, soe en vreest niet, Want dese dinghen moeten ghescieden, maer ten is noch ghen eynde.

8

Want deen volck sal tseghen dander volck op staen, ende deen rijck op dander rijck, ende daer sullen aertbeuinghen sijn hier ende daer, ende dieren tijt. Dese dinghen zijn tbeghinsel der pijnen.

9

Maer siet aen v seluen. Want sij sullen v lieden leueren in die raetshuysen, ende in die synagogen suldi gheslaghen worden, ende voer Presidenten, ende coninghen suldi staen om my, hen tot eenen ghetuyghenis.

10

Ende onder alle die heydenen moet ierstmael dat Euangelie ghepreect worden.

11

Ende als sij v leyden sullen leuerende, ⁺soe en wilt niet te voren dencken wat ghy spreken sult, maer wat v ghegheuen sal worden op die vre, dat spreect. Want ghy en sijt niet sprekende, maer die heyleghe gheest.

+ B

12

Ende deen broeder sal den anderen broeder ter doot leueren, ende die vader tkint, ende die kinderen sullen opstaen teghen die ouders, ende sij sullen hen die doot aendoen.

13

Ende ghi sult van allen menschen ghehaet worden om mijnen name. Maer soe wie verdraghen sal totten eynde toe, die sal salich sijn.

* 14

Maer als ghy sult sien die afgrijselijcheyt der verwoestinghen staende, daert niet en behoort (diet leest die verstae dat) soe wie dan in Iudeen sijn die vlieden tot die berghen,

15

ende wie opt dack is, die en come niet nederwaerts in thuys, noch hy en gae daer binnen niet, om iet te halen wt sijnen huyse,

16

ende soe wie inden acker sijn sal, die en keere niet achterwaerts om sijn cleedt wech te nemen.

17

Maer wee den bevruchten ende sooghenden, in die daghen.

18

Maer bidt, dat in den winter niet en ghesciede.

19

Want het sullen sulken tribulacie daghen sijn, alser niet gheweest en sijn van tbeghinsel der creatueren, die welcke Godt ghescapen heeft tot nu toe, noch ghescieden en sullen.

20

Ende ten waer dat die Heere die daghen ghecort hadde, soe en soude alle vleesch niet salich gheworden hebben, maer om die wtuercorene die hy vercoren heeft, heeft hy die daghen ghecort.

21

Ende eest dat dan v iemant seyt, Siet hier is christus, siet daer

[p. *789]

is hy, en ghelooft dat niet.

22

Want daer sullen opstaen valsche christen, ende valsche propheten, ende sij sullen teekenen ende wonderen doen, om te verleyden (eest dat ghescieden mach) ooc die wtuercorene.

23

Daer om siet ghy lieden toe, want siet ick hebt v al te voren gheseyt.

24

⁺Maer in die daghen, nae die tribulatie sal die sonne verduystert worden, ende die mane en sal haer scijnsel niet gheuen,

+ C

25

ende die sterren des hemels sullen afvallende sijn, ende die crachten die in die hemelen sijn, sullen beroert worden.

26

Ende dan sullen sij sien den sone des menschen comende in die wolcken, met grooter cracht ende glorie.

27

Ende dan sal hy sijn enghelen seynden, ende vergaderen sijn wtuercorene van die vier winden, van dat wterste der eerden, tot dat wterste des hemels.

28

Maer vanden vijgheboom leert die ghelijckenisse. Als nu sijnen tack teer is, ende dat die bladeren voert comen sijn, soe weeti dat den somer seer by is,

29

alsoe ooc ghy lieden, soe wanneer ghy dese dinghen sult sien ghescieden, soe weet dattet seer by is in die dooren.

30

Voerwaer ick segghe v dat dit gheslachte niet voerby gaen en sal, tot dat alle dese dinghen ghescieden.

31

⁺Den hemel ende die eerde sullen vergaen, maer mijn woerden en sullen niet vergaen.

+ D

32

Maer dien dach ende die vre en weet niemant, noch die enghelen inden hemel, noch die sone, dan die vader.

33

+ Siet toe, waect, ende bidt, want ghy en weet niet wanneer den tijt is.

34

Ghelijck een mensch die buytens lants ghereyst is, sijn huys verlaten heeft, ende heeft sijnen knechten macht ghegheuen van elcken wercke, ende den doerwaerder heeft hy beuolen dat hy waken soude.

35

Daer om waect (want ghy en weet niet wanneer dat die huysheere comen sal tsauonts spade, ter middernacht, oft in den hanen craey, oft inden morghenstont)

36

Op dat hy, als hy omuersienlijck coemt, v niet slapende en vinde.

37

Ende dat ick v lieden segghe, dat segghe ick tot allen menschen. Waect.