Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde hy heeft hen begonnen in ghelijckenissen toe te spreken. Een mensch heeft eenen wijngaert gheplant, ende hy heefter eenen thuyn om gheleyt, ende eenen wijnput in ghegrauen, ende eenen torre ghetimmert, ende hy heeft dien verhuert den lantlieden, ende hy is in vreemde landen ghereyst.

+ A

2

Ende hy heeft tot die lantlieden alst tijt was eenen knecht ghesonden, dat hy vanden lantlieden ontfanghen soude van die vrucht des wijngaerts.

3

Die welcke (als sij dien ghegrepen hadden) hebben hem gheslaghen, ende ydel laten gaen.

4

Ende weder om heeft hy tot hen ghesonden eenen anderen knecht, ende dien hebben sij in sijn hooft ghewont, ende versmaetheden aenghedaen.

5

Ende weder om heeft hy eenen anderen ghesonden, ende dien hebben sij ghedoot, ende veel meer andere, die sommighe slaende, ende die sommighe doodende.

6

Hier om hy noch hebbende eenen alderliefsten sone, heeft dien oock ghesonden tot hen ten laetsten, segghende, Sij sullen mijnen sone ontsien.

7

Maer die lantlieden hebben gheseyt tot malcanderen. Dit is die erfghenaem, coemt laet ons hem dooden, ende dan sal die erffenisse onse sijn.

8

Ende hem aenueerdende hebben sij hem ghedoodt, ende gheworpen buyten den wijngaert.

9

Daer om wat sal die heere des wijngaerts doen? Hy sal comen ende dooden die lantlieden, ende sijnen wijngaert andere gheuen.

10

En hebdi ooc dese scriftuere niet ghelesen. Dien steen den welcken die timmerluyden verworpen hebben, ⁺desen is gheworden tot eenen hoecksteen

+ B

11

Vanden Heere is dit ghesciet, ende tes wonderlijck in onse ooghen?

12

Ende sij sochten om hem te vanghen, ende sij hebben die menichte des volcs ghevreest, want sij hebben verstaen dat hy tot henlieden dese ghelijckenisse gheseyt hadde. Ende hem verlaten hebbende sijn sij wech ghegaen.

13

Ende sij seynden tot hem sommighe vanden Phariseen ende Herodianen, dat sij hem vanghen souden metten woerde.

14

Die welcke comende segghen tot hem. Meester wy weten dat ghy warachtich sijt, ende dat ghy niemanden en ontsiet.Want ghy en siet nae die aensichten der menschen niet, maer inder waerheyt leerdi den wech Godts, eest gheorlooft tribuyt den Keyser te gheuen, oft niet?

15

Die welcke (wetende hen scalcheyt) heeft tot hen gheseyt, Waer om tempteerdi my? Brengt my den penninck dat ick dien sien mach.

16

Ende sij hebben dien tot hem ghebracht. Ende hy seyde hen, Wiens is dit beelt, ende dat opscrift? Sij segghen hem. Des keysers.

17

Ende Iesus antwoerdende heeft tot hen gheseyt, Gheeft dan weder tghene dat den Keyser toebehoort, den Keysere, ende dat Godt toebehooort Gode. Ende sij verwonderden haerlieden van hem.

18

Ende hem sijn aencomen die Saduceen die segghen datter gheen verrijsenisse en is. Ende sij vraechden hem segghende,

19

Meester, Moyses heeft ons ghescreuen, Waert sake dat iemants broeder sterft, ende een

[p. *788]

huysvrouwe achterlaet, ende gheen kinderen achter en laet, dat sijn broeder diens huysvrouwe trouwen soude ende verwecken sijnen broeder saet.

20

Aldus waren daer seuen ghebroeders, ende dierste heeft een huysvrouwe ghenomen, ende hy is ghestoruen gheen saet achterlatende,

21

Ende die tweetste heeftse ghenomen ende hy is ghestoruen, ende dese en heeft oock gheen saet achter ghelaten. Ende die derde des ghelijcs.

22

Ende die seuen hebben haer desghelijcs ghenomen, ende sij en hebben gheen saet achter ghelaten. Ten laetsten van alle es die vrouwe oock ghestoruen.

23

Hier om in die verrijsenisse als sij sullen verresen sijn, wiens van desen huysvrouwe sal sij sijn? Want die seuen hebben haer tot een huysvrouwe ghehadt.

24

Ende Iesus antwoerdende heeft tot hen gheseyt, En dwaelt ghy niet daer om, niet wetende die scriftueren, noch die cracht Gods?

25

Want als sij vanden dooden sullen opghestaen sijn, soe en sullen sij noch trouwen noch ghetrout worden, maer sij sijn ghelijck enghelen in die hemelen.

26

Maer van die dooden dat sij opstaen en hebdi niet ghelesen in Moyses boeck, hoe dat Godt hem opden dorenboossche gheseyt heeft, ⁺segghende, Ick ben die Godt van Abraham, ende die Godt van Isaac, ende die Godt van Iacob?

+ C

27

Hy en is gheen Godt der dooden, maer der leuender. Daer om dwaelde ghy seere.

28

Ende daer is een vanden Scriben by ghecomen diese ghehoort hadde deen dander vraghende, ende siende dat hy dien Sadduceen wel gheantwoert hadde, soe heeft hy hem ghevraecht welck dierste ghebodt was van alle.

29

Ende Iesus heeft hem gheantwoert. Het ierste van allen gheboden is. Hoort Israel. Die Heere uwe Godt is een Godt.

30

Ende ghy sult beminnen den Heere uwen Godt, wt v gheheel herte, ende wt v gheheel ziele, ende wt v gheheel verstant, ende wt alle uwer cracht. Dat is dierste ghebodt.

31

Ende het tweede es dien ghelijck. Ghy sult uwen naesten lief hebben als v seluen. Daer en is gheen ander ghebodt meerder dan dese.

32

Ende die Scribe heeft hem gheseyt, Meester ghy hebbet inder waerheyt wel gheseyt, datter een Godt is, ende datter anders gheenen en is sonder hem.

33

Ende datmen hem lief hebben sal wt gheheelder herten, ende wten gheheelen verstande, ende wt die gheheel ziele, ende wt die gheheel stercheyt, ende te beminnen den naesten als sij seluen, dat is meerder dan alle die heelbrantofferanden ende sacrificien.

34

Ende Iesus siende dat hij wijsselijck gheantwoert hadde, ⁺heeft tot hem gheseyt, Ghy en sijt niet verre van trijck Godts. Ende niemant en dorste hem nu voerts niet vraghen.

+ D

35

Ende Iesus antwoerdende seyde, leerende inden tempele. Hoe segghen die Scriben dat Christus Dauids sone is?

36

Want Dauid seyt seluer inden heylighen gheest. Die Heere heeft gheseyt tot mijnen Heere, sidt aen mijn rechte hant, tot dat ick v vianden stelle tot een voetbancke uwer voeten.

37

Aldus noemt hem Dauid selue Heere, ende waer af eest dan sijn sone? Ende een groote scare heeft hem gheerne ghehoort.

38

Ende hy seyde hen in sijn leeringhe. Wacht v van die Scriben die in langhe cleederen willen wandelen, ende gegroet sijn op die merct

39

ende op die ierste setelen sitten in die synagogen, ende die ierste sidt plaetsen in die auontmaelen,

40

die der weduwen huysen verslinden onder tdecsel van langhen ghebede, dese sullen een swaerder ordeel ontfanghen.

41

Ende Iesus sittende teghen ouer die offerkiste aensach hoe dat die scare ghelt wierp in die offerkiste, ende veel rijcke luyden wierpen vele.

42

Maer als daer ghecomen was een arme weduwe, soe heeft die daer twee cleyn penninxkens ingheworpen, welck is een quadrant.

43

Ende hy tsamen roepende sijn discipelen heeft hen gheseyt, Voerwaer ick segghe v lieden, dat dese arme weduwe, meer gheworpen heeft dan alle dandere die in dofferkiste gheworpen hebben.

44

Want die hebben allegader gheworpen van tghene dat hen ouerde, maer dese heeft van haerder armoede gheworpen alle dat sij hadde, haren gheheelen nootdurft.