Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde doen sij by Ierusalem quamen ende Bethanien, aen den berch der olijf boomen, soo sendt hy twee van sijnen discipelen,

+ A

2

ende seyt tot hen. Ghaet henen in dat casteel dat teghen v is, ende ter stont daer inne comende suldy vinden een vuelen ghebonden, waer op dat noch gheen mensch gheseten en heeft, Ontbint dat, ende brenghet hier,

3

Ende eest dat v iemant seyt. Wat doedy? segt dat die Heere des te doene heeft, ende ter stont sal hy dat laten ghaen herwaerts,

4

Ende wech ghaende hebben sij gheuonden dat vuelen ghebonden voor een doere buyten op eenen tweesceydighen wech, ende sij ontbinden dat,

5

Ende sommighe van den ghenen die daer stonden seyden tot hen. Wat maecti ontbindende dat vuelen?

6

Die welcke hebben hen gheseyt ghelijc hen Iesus beuolen hadde, ende sij hebbent hen toeghelaten,

7

Ende sij

[p. *787]

hebben dat vuelen tot Iesum gheleydt, ende hen cleederen daer op gheleyt, ende hy is daer op gheseten,

8

Maer vele hebben haer cleederen ghespreyt in den wech, ende die andere hieuwen tacken van die boomen, ende stroydense inden wech.

9

⁺Ende die voerghinghen ende die nae volghden riepen segghende. Hosanna ghebenedijt moet hy sijn die daer coemt in den naem des Heeren.

+ B

10

Ghebenedijt sij het rijck datter coemt ons vaders Dauid. Hosanna in den hoochsten.

+ 11

Ende hy is te Ierusalem inden tempel ghegaen, ende doen hijt al omme besien hadde, alst nu auont was, soe is hy wtghegaen tot in Bethanien metten twaeluen.

12

Ende des anderen daechs als sij wt Bethanien ghinghen, soe heeft hy hongher ghehadt.

13

Ende als hy van verre ghesien hadde eenen vijgheboom bladeren hebbende, soe is hy ghecomen oft hy by auontueren daer op iet vinden soude. Ende als hy tot dien comen was, soe en heeft hy daer niet op gheuonden dan bladeren, want ten was der vijghen tijt niet.

14

Ende antwoerdende heeft hy tot dien boom gheseyt. Van nu voerts inder eewicheyt en ete niemant meer vrucht van v. Ende sijn discipelen hebbent ghehoort.

15

Ende sij sijn te Ierusalem ghecomen. Ende als hy inden tempel ghegaen was, soe heeft hy begonnen wt te drijuen die vercoopers ende coopers inden tempel, ende die tafelen der wisselaers, ende die setelen der gheender die duyuen vercochten, heeft hy omme gheworpen,

16

ende hy en ghehengde niet dat yemant eenich instrument door den tempel draghen soude,

17

ende hy leerde segghende tot hen, En esser niet ghescreuen. Mijn huys sal een huys des ghebedts ghenoemt worden alle volcke? ⁺Ende ghy hebt dat ghemaect een speluncke der mordenaers.

+ C

18

Het welck als ghehoort hebben die princen der Priesteren ende die Scriben, soe sochten sij hoe sij hem souden dooden, want sij vreesden hem, om dat alle die scare haer verwonderde van sijnder leeringhen.

19

Ende alst auont gheworden was, soe ghinck hy wter stadt.

20

Ende doen sy des morghens daer voerby ghinghen, soe hebben sij ghesien den vijgheboom dorre gheworden van den wortelen af.

21

Ende Petrus des ghedachtich sijnde, heeft tot hem gheseyt, Rabbi siet die vijgheboom den welcken ghy vermaledijt hebt, is verdroocht.

22

Ende Iesus antwoerdende heeft tot hem gheseyt, Hebt Gods ghelooue.

23

Voerwaer ick segghe v, dat soe wie seyde desen berghe, wert opghehauen ende gheworpen in die zee, ende dat hy niet en twijfele in sijn herte, maer ghelooue dat hem al ghescieden sal dat hy seyt, tsal hem ghescieden.

24

Daer om segghe ick v lieden, alle dinghen die ghy biddende begheert, gheloouet dat ghy die ontfanghen sult, ende die sullen v gheboeren.

* 25

Ende als ghy sult staen om te bidden soe vergheeft, eest dat ghi iet hebt teghen iemanden, op dat v vader die in hemelen is v vergheue uwe sonden.

26

⁺Maer eest dat ghy niet en vergheeft, soe en sal v vader die in die hemelen is v lieden uwe sonden oock niet vergheuen.

+ D

27

Ende sij comen weder om te Ierusalem. Ende als hy wandelde inden tempel, soe comen tot hem die ouerste Priesters, ende die Scriben ende die ouders,

28

ende sij segghen tot hem. Doer wat macht doedi dese dinghen? ende wie heeft v dese macht ghegheuen dat ghy dese dinghen doen soudt?

29

Ende Iesus antwoerdende heeft tot hen gheseyt, Ick sal v lieden oock een woort vraghen, ende antwoert my, ende ick sal v segghen doer wat macht dat ic dese dinghen doe.

30

Iohannes doopsel waert vanden hemel oft van die menschen? Antwoert my.

31

Ende sij dachten by hen seluen segghende, Eest dat wy segghen, vanden hemel, soe sal hy segghen. Waer om en hebdi dan hem niet ghelooft?

32

Eest dat wy segghen vanden menschen, soe vreesden sij tvolck, want sij hielen Iohannem allegader dat hy waerlijcs een Propheet was.

33

Ende antwoerdende hebben sij tot Iesu gheseyt. Wy en weetens niet, Ende Iesus antwoerdende heeft tot hen gheseyt. Noch ic en segghe v lieden ooc niet, door wat macht dat ick dit doe.