Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde van daer opstaende is hy ghecomen in die palen van Iudeen ouer die Iordane, ende die scaren vergaderen wederom tot hem ende ghelijc hi plach heeft hi die wederom gheleert

+ A

2

Ende die Phariseen aencomende hebben hem gheuraecht. Oft eenen man gheorlooft is sijn huysvrouwe te verlaten? tempterende hem,

3

Ende hy antwoordende heeft tot hen gheseyt. Wat heeft v Moyses gheboden?

4

Die welcke hebben gheseydt. Moyses heeft toeghelaten eenen scheybrief te scrijuen ende te verlaten,

5

Den welcken Iesus antwoordende heeft gheseyt. Om die hartheyt uwer herten heeft hy v lieden dit ghebodt ghescreuen,

6

maer van tbeghinsel der sceppinghen soo heeftse Godt ghemaect, een man ende een vrouwe,

7

Daerom sal een man sijnen vader ende moeder verlaten, ende aencleuen sijnder huysvrouwen,

8

ende sij twee sullen in een vleesch wesen, Aldus en sijn sij nv gheen twee, maer een vleesch,

9

Daerom wat Godt versaemt heeft, dat en sceyde die mensch niet,

10

Ende in huys soo hebben hem sijn discipelen we-

[p. *786]

derom van tselue gheuraecht,

11

⁺Ende hy heeft hen gheseydt. Soo wie sijn huysvrouwe verlaet ende een ander trouwet, die doet ouerspel ouer haer,

+ B

12

Ende eest dat een huysvrouwe haren man verlaet ende eenen anderen trouwet so doet sij ouerspel.

+ 13

Ende sij brochten tot hem cleyn kinderkens dat hy die raken soude, Maer die discipelen dreychden die ghene diese aenbrochten,

14

Die welcke als Iesus ghesien heeft, soo heeft hijt onweerdelijc ghenomen, ende hy seyde tot henlieden. Laet die cleyn kinderkens tot my comen, ende en verbietse niet, want alsulcken behoort dat rijck Gods toe,

15

Voorwaer ic segghe v soo wie trijc Gods niet en ontfanct als een cleyn kindeken, die en sal daer niet in comen,

16

Ende omhelsende die kinderkens ende legghende sijn handen op hen ghebenedijde hy die.

* 17

Ende doen hy wtghegaen was op den wech, soo isser een aen gheloopen ende met gheboochde knien voor hem badt hy hem. Goede meester wat sal ick doen, op dat ick deewich leuen ontfanghen mach,

18

Ende Iesus seyde hem. Waer toe noemdi mi goet? Niemant en is goet, dan een God,

19

Ghi weet die gheboden, ⁺En doet gheen ouerspel, En slaet niet doot, En steelt niet, En segt gheen valsch ghetuyghenis, En doet gheen bedroch, Eert uwen vader ende moeder,

+ C

20

Ende hy antwoordende heeft tot hem gheseyt Meester alle dese heb ick onderhouden van mijnder ioncheyt,

21

Ende Iesus hem aensien hebbende heeft hem bemint, ende tot hem gheseydt. Een dinck ghebreect v, gaet vercoopt al dat ghy hebt ende gheuet den armen, ende ghy sult eenen scadt hebben inden hemel, ende coemt volcht my,

22

Die welcke bedroeft sijnde in dat woort is droeuich wech ghegaen, want hy hadde veel besittinghen,

23

Ende Iesus rontsomme siende heeft tot sijnen discipelen gheseyt. Hoe swaerlijcken sullen sij die ghelt hebben int rijck Godts gaen,

24

Ende die discipelen verwonderden hen seere van sijnen woorden, Maer Iesus wederom antwoordende heeft hen gheseyt. Kinderkens hoe swaer om doen eest, dat sij die betrouwen op ghelt hebben, souden int rijc Gods gaen,

25

Tis lichter om doen eenen kemel te ghaen door die ooghe van eender naelden, ⁺dan eenen rijcken te gaen int rijc Gods,

+ D

26

Die welcke verwonderden hen noch meer segghende tot hen seluen. Ende wie mach salich worden?

27

Ende Iesus hen aensiende heeft gheseyt. By die menschen eest ommoghelijc, maer niet bi Gode, want alle dinghen sijn moghelijc bi Gode,

28

Ende Petrus heeft hem begonnen te segghen. Siet wij hebbent al verlaten ende sijn v gheuolcht,

29

Iesus antwoordende heeft gheseyt. Voorwaer ick segghe v, daer en is niemant die verlatet huys, oft broeders oft susters, oft vader, oft moeder, oft kinderen, oft ackerlanden om mijnen wille ende om dat Euangelie

30

die niet ontfanghen en sal hondertmael soo veel nv in desen tijt, huysen, ende broeders, ende susters, ende moeders, ende kinderen, ende ackerlanden, met veruolghinghen, ende in die toecomende werelt het eewich leuen,

31

Ende vele dierste sullen die laetste sijn, ende die laetste dierste,

32

Ende sij waren op den wech opghaende nae Ierusalem ende Iesus ghinc voor hen, ⁺ende sij waren verbaest, ende volghende vreesden sij, Ende wederom tot hem nemende die twaelue heeft hy dien begonnen te segghen wat dinghen hem toecomende waren,

+ E

33

Want siet wij climmen op nae Ierusalem, ende die sone des menschen sal gheleuert worden den princen der priesteren ende den Scriben ende den ouders, ende sij sullen hem verdoemen totter doot, ende sullen hem leueren den Heydenen,

34

ende die sullen hem bespotten ende bespouwen, ende gheesselen, ende dooden hem, ende ten derden daghe sal hy verrijsen,

35

Ende tot hem comen Iacobus ende Iohannes Zebedeus sonen segghende. Meester wij willen dat ghy ons doet alle tghene nat wij begheren sullen,

36

Ende hy seyde hen. Wat wildi dat ick v doe?

37

Ende sij hebben gheseyt. Gheeft ons dat wij sitten moghen die eene aen v rechte hant, ende dander aen v slincke hant in v glorie,

38

Ende Iesus seyde tot hen. Ghi en weet niet wat ghy begheert, moechdi den kelck drincken die ick drincke, oft metten doopsel ghedoopt worden, daer ick mede ghedoopt worde?

39

⁺Ende sij hebben gheseyt. Wij moghent, Ende Iesus seyde tot hen. Mijnen kelck die ick drincke suldi voorwaer drincken, ende metten doopsel daer ick mede ghedoopt worde, suldy ghedoopt worden,

+ F

40

maer te sitten aen mijn rechte hant oft aen die slincke en behoort my niet v te gheuen, maer den ghenen diet bereydt is,

41

Ende die thien dit hoorende hebben hen begonnen te veronwaerdighen van Iacobus ende Iohannes,

42

Maer Iesus hen roepende heeft hen gheseydt. Ghy weet wel dat die ghene die scijnen douerheyt te hebben van den heydenen heerscappie ouer hen ghebruycken, ende hen princen hebben macht ouer hen,

43

Maer ten is also niet onder v lieden, Maer soo wie wilt die meeste worden, die sal v lieder dienaer sijn,

44

Ende soo wie wilt onder v lieden dierste sijn, die sal die knecht van alle gader sijn,

45

Want oock die sone des menschen en is niet ghecomen om datmen hem dienen soude, maer om dat hy dienen soude, ende gheuen zijn ziele tot een verlossinghe voor veel menschen,

46

Ende sij comen te Iericho, ende doen hy vertrock van Iericho ende sijn discipelen ende een seer groote menichte, soo sadt die sone van Thimeus Barthimeus die blende by den wech om aelmisse biddende,

47

⁺Die welcke doen hy ghehoort hadde dattet Iesus Nazarenus was, soo heeft hy begonnen te roepen ende te segghen. Iesu Dauids sone ontfermt v mijner,

+ G

48

Ende vele dreychden hem dat hi swijghen soude, Maer hy riep noch veel te meer Dauids sone ontfermt v mijnder,

49

Ende Iesus staende heeft gheboden datmen hem roepen soude, Ende sij riepen den blenden seggende tot hem. Weest wel ghemoet, staet op, hy roept v,

50

Die welcke als hy sijn cleedt wechgheworpen hadde soo is hy opspringhende tot hem ghecomen,

51

Ende Iesus antwoordende heeft tot hem gheseyt. Wat wildy dat ick v doe? Ende die blende heeft tot hem gheseydt, Rabboni dat ick sien mach,

52

Ende Iesus seyde tot hem. Gaet henen v ghelooue heeft v ghesont ghemaect, Ende ter stont heeft hy ghesien, ende hy volchde hem inden wech.