Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .vij. Capittel.

+ 1

⁺ENde tot hem vergaderden die Phariseen ende sommighe vanden Scriben comende van Iherusalem,

+ A

2

Ende als sij ghesien hadden die sommighe van sijnen discipelen met ghemeynen handen, dat is met onghewasschen handen broot eten, so mispresen sijt,

3

want die Phariseen ende alle die Ioden en eten niet ten sij dat sij dicmael haer handen wasschen houdende die insettinghe der ouders,

4

ende vander merct comende en eten sij niet ten si datse ghewasschen sijn, ende veel ander dinghen sijnder die hen ghegheuen sijn te houden, het wasschen der croesen ende der potten, ende der metalen vaten, ende der bedden,

5

Ende die Phariseen ende Scriben hebben hem ghevraecht. Waerom en wandelen v discipelen niet nae die insettinghe der ouders, maer eten broot met ghemeynen handen?

6

Ende hy antwoordende heeft tot hen gheseyt. Wel heeft Isaias ghepropheteert van v hypocrijten ghelijck daer ghescreuen is. ⁺Dit volck eert my metten lippen, maer hen herte is verre van my,

+ B

7

ende te vergheefs dienen sij my leerende leeringhen der menschen gheboden,

8

Want ghi achterlatende die gheboden Gods houdt die insettinghen der menschen, Dat wasschen der potten ende der croesen ende veel ander der ghelijcke doedi,

9

Ende hy seyde henlieden. Ghy breect wel het ghebodt Gods, op dat ghi v insettinghe moecht houden,

10

want Moyses heeft gheseyt. Eert uwen vader ende v moeder, ende soo wie sijn vader oft moeder vermalendijt, die sterue die doot,

11

maer ghy segghet. Eest dat een mensch seyt sijnen vader oft moeder Corban (dat is een ghifte) soo wat van my coemt, dat sal v baten,

12

ende voorts en laet ghy hem niet meer doen sijnen vader oft moeder

13

brekende het woort Godts door v lieden insettinghe die welcke ghy ingheset hebt, ende deser ghelijcke doedi veel,

14

Ende roepende wederom die scare tot hem seyde hi henlieden. Hoort my allegader ende verstaet dit,

15

Daer en is niet buyten den mensch in hem ghaende dat hem mach besmetten, Maer die dinghen die vanden mensche wt comen die sijnt die den mensch onsuyuer maken.

16

Eest datter iemant ooren heeft om te hooren die hoore,

17

Ende doen hy in huys ghecomen was vander scaren, soo hebben hem sijn discipelen die parabele gheuraecht,

18

Ende hy heeft tot hen gheseyt. Sijdi ooc ghy soo onwijs? ⁺En verstady niet dat alle tghene dat van buyten inden mensch gaet hem niet en can besmetten,

+ C

19

want ten gaet in sijn herte niet, maer tgaet in sijnen buyck, ende tghaet wt door den achterganck, reynighende alle die spijsen?

20

Maer hy seyde dat alle die dinghen die wt den mensch gaen die maken den mensche onreyn,

21

Want van binnen wt die herten der menschen comen voorts quade ghedachten, ouerspelen, oncuyscheden, dootslaghen,

22

dieften, ghiericheden, archeden, bedroch, onsuyuerheden, die quade ooghe, blasphemie, houerdicheyt, dwaesheyt,

23

Alle dese quaden comen van binnen, ende maken den mensch onreyn.

+ 24

Ende van daer opstaende is hi wech gheghaen in die palen van Tyrus ende Sidon, Ende als hy in huys ghegaen was, soo en heeft hijt niemant willen laten weten, ende hy en mocht niet verborghen blijuen,

25

Want een vrouwe ter stont als sij van hem ghehoort heeft wiens dochter hadde eenen onsuyueren gheest is daer inghecomen ende gheuallen aen sijn voeten.

26

Want het was een heydensche vrouwe een Syrophenisse van gheboorte, Ende sij badt hem dat hy den duyuel wtdrijuen souden wt haer dochter,

27

Die welcke heeft tot haer gheseyt. Laet ierstmael die kinderen versaet worden, Want ten is niet goet te nemen het broot der kinderen, ⁺ende dat den honden te worpen,

+ D

28

Ende si antwoorde ende heeft tot hem geseyt. Tis emmer waer Heere, Maer nochtans eten die cleyn hondekens ooc onder die tafele van die brockelinghen der kinderen,

29

Ende hi seyde haer. Om die woort, so gaet, den duyuel is wt uwer dochter ghegaen

30

Ende als si wech ghegaen was in haer huys, soo heeft si die ionghe dochter gheuonden ligghende opt bedde, ende dat den duyuel wtghegaen was.

* 31

Ende hi wederom wtgaende wt die palen van Tyrus is ghecomen door Sidon tot aen die zee van Galileen tusschen die middelste palen van dlant der thien steden,

32

Ende si brenghen tot hem eenen doouen ende stommen, ende si baden hem dat hi hem die hant oplegghen wilde,

33

Ende nemende hem wt der scaren besijden heeft hy sijn vingheren ghesteken in sijn ooren, ende wtspouwende heeft hi sijn ton-

[p. *784]

ghe gheraect,

34

ende opsiende inden hemel heeft hi versucht, ende tot hem gheseydt. Ephphetha, dat is, wort gheopent,

35

Ende ter stont sijn zijn ooren gheopent ende den bant sijnder tonghen wert ontbonden, ende hi sprac volcomelijc,

36

Ende hi heeft hen verboden dat sijt niemanden segghen en souden, Maer hoe hi hen meer verboodt soo sijt meer vercondichden,

37

ende soo veel te meer verwonderden sij hen segghende. Hy heuet al wel ghedaen, ende die dooue heeft hi doen hooren, ende die stomme spreken.