Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .viij. Capittel.

+ 1

⁺IN dien daghen als daer weder een groote scare was, ende niet en hadden dat sij eten souden soo heeft Iesus sijn discipelen tsamen gheroepen ende gheseyt.

+ A

2

My ontfermt ouer die scare, want siet sij blijuen by my nv drij daghen ende sij en hebben niet dat sij eten mochten,

3

ende eest dat icse onghespijst laet gaen in hen huys, soo sullen sij op den wech flau worden, want die sommighe van henlieden sijn van verre ghecomen,

4

Ende sijn discipelen hebben hem gheantwoort. Waer mede soude iemant dese hier moghen versaden met brooden in die woestijne?

5

Ende hi heeft hen gheuraecht. Hoeveel brooden hebdi? Die welcke hebben gheseyt. Seuen,

6

ende hy heeft der scaren gheboden te sitten op die eerde, Ende nemende die seuen brooden danckende heeft hy die ghebroken, ende hi gafse sijnen discipelen dat sij die voorlegghen souden, ende sij hebben die der scaren voorghestelt,

7

ende sij hadden een luttel vischkens, ende die selue heeft hi oock ghebenedijt, ende gheboden datmense voor stellen soude

8

Ende sij hebben gheten ende sijn versaet, ende sij hebben opghenomen datter ouerbleuen was vanden brockelinghen seuen manden,

9

Ende die daer gheten hadden waren bi nae vier duysent, ende hi heeftse laten gaen.

* 10

Ende ter stont climmende in een scip met sijnen discipelen is hi ghecomen in die contreyen van Dalmanutha.

11

+ ⁺Ende die Phariseen sijn wtghegaen, ende hebben begonnen tsamen te bevraghen, begheerende van hem een teeken vanden hemel, hem tempterende,

+ B

12

Ende hi versuchtende inden gheest heeft geseyt. Waer toe soect dit gheslachte een teeken? Voorwaer ick segghe v lieden, desen gheslachte en sal gheen teeken ghegheuen worden,

13

Ende hen verlatende is hi wederom gheclommen in een scip, ende is wech gheuaren ouer die zee,

14

Ende si hebben vergheten brooden met te nemen, ende sij en hadden maer een broot met hen in tscip,

15

Ende hi gheboodt hen segghende. Siet toe ende wacht v voor den heue der Phariseen ende van Herodes heue,

16

Ende sij dachten tot malcanderen segghende. Wij en hebben gheen brooden,

17

Ende als Iesus dat kende soo heeft hi tot hen gheseyt. Waerom dencti dat ghi gheen brooden en hebt? en weet ghy noch niet noch en verstaedy niet? hebdi noch v herte verblint?

18

ooghen hebbende en siedi niet? ende ooren hebbende en hoordi niet?

19

Noch en sijdi niet ghedachtich doen ick vijf brooden brack onder vijfduysent ende hoe veel coruen vol brockelinghen dat ghi daer opnaemt? Sij segghen hem. Twaelue,

20

Ende als ick seuen brooden onder vier duysent brack, hoe veel manden brockelinghen hebdi daer opghenomen? Ende sij segghen hem. Seuen,

21

Ende hy seyde tot hen. Hoe en verstadi dan noch niet?

22

+ ⁺Ende sij comen tot Bethsaidam, ende sij brenghen tot hem eenen blenden, ende sij baden hem dat hy dien soude raken,

+ C

23

Ende nemende die hant vanden blenden, heeft hi hem gheleyt buyten dat dorp, ende wtspouwende in sijn ooghen legghende sijnen handen daer op heeft hy hem gheuraecht, oft hy iet sach,

24

Ende opsiende heeft hi gheseyt. Ick sien die menschen als boomen wandelende,

25

Daer nae heeft hy wederom sijn handen op sijn ooghen gheleydt, ende hi heeft begonnen te sien, ende hi is wederom wel ghestelt gheworden soo dat hi claerlijck alle dinghen sach,

26

Ende hi heeft hem in sijn huys ghesonden segghende. Gaet in v huys ende eest sake dat ghi in een dorp coemt, so en segghes niemanden.

* 27

Ende Iesus is wtgheghaen ende sijn discipelen in die casteelkens van Cesarea Philippi, ende onder weghen heeft hi sijn discipelen gheuraecht hen segghende. Wie segghen die menschen dat ick ben?

28

Ende sij hebben gheantwoort segghende. Iohannes die doopere, die andere Elias, maer die andere als een vanden propheten,

29

Doen seyt hi tot hen. Maer ghy wie segdi dat ick ben? Petrus antwoordende seyde tot hem Ghy sijt Christus,

30

ende hi heeft hen ghedreycht dat sij niemant segghen en souden van hem,

31

Ende hi heeft hen begonnen te leeren dat die sone des menschen soude veel moeten lijden, ende versmaet moeten worden van die ouders ende van die opperste priesteren ende Scriben ende ghedoot worden, ⁺ende nae drij daghen weder opstaen,

+ D

32

ende hi sprack dat woort openbaerlijc Ende Petrus hem aenveerdende, heeft hem begonnen te straffen,

33

Die welcke omghekeert sijnde ende siende sijn discipelen heeft Petrum ghedreycht segghende. Gaet achter my Satana, want ghi en smaect niet dat Godlijck is, maer dat menschelijck is,

34

Ende als hi tsamen gheroepen hadde die scare met sijnen discipelen, soo heeft hi hen gheseyt. Eest dat iemant mi volghen wilt, die verloochene sij seluen, ende neme op sijn cruys ende volghe mi,

35

want soo wie sijn ziele wilt behouden die salse verliesen, maer soo wie sijn ziele verliest om mijnen wille ende om dat euangelie, die salse behouden,

36

Want wat salt eenen mensch baten eest dat hi die gheheel werelt wint, ende dat hi sijnder zielen scade doet?

37

Oft wat manghelinghe sal een mensch gheuen voor sijn ziele?

38

Want soo wie hem mijns scaemt, ende mijnder woorden in dit ouerspelich ende sondich gheslachte, diens sal die sone des menschen hem oock scamen, als hi comen sal sijn in die glorie sijns vaders metten heylighen Enghelen.