Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde van daer wtgheghaen sijnde, is hi wech ghegaen in sijn lant, ende sijn discipelen volchden hem,

+ A

2

ende als den sabboth ghecomen was, soo heeft hi begonnen in die Sinagoge te leeren, ende veel hoorende hebben hen verwondert in sijn leeringhe, segghende. Van waer comen desen, alle dese dinghen? ende wat wijsheyt is dit die hem ghegheuen is, ende sulcke mirakelen die door sijn handen ghewracht worden

3

En is dit niet die timmerman Marien sone die broeder van Iacobus ende Ioseph ende Iudas ende Simon? en sijn ooc sijn susters hier by ons niet? Ende sij worden verargert in hem,

4

Ende Iesus seyde hen. Datter gheenen propheet en is sonder eere, dan in sijn lant ende in sijn huys, ende in sijn gheslachte,

5

Ende hi en mocht daer gheen mirakel doen, dan een luttel siecken die hi sijn handen oplegghende ghenesen heeft,

6

ende hi verwonderde hem om hen ongheloouicheyt, ende hi ghinc die casteelen alomme leerende,

7

Ende hi heeft die twaelue gheroepen ende die begonst te senden twee tsamen, ende hi gaf hen macht ouer die onsuyuer gheesten,

8

⁺Ende hi heeft hen beuolen dat si niet met draghen en souden ouer den wech, dan alleen een roede, Noch male, noch broot, noch gelt in haren buydel

+ B

9

maer gescoeyet met solen, ende dat sij niet met twee cleederen en souden ghecleedt sijn,

10

Ende hi seyde hen. Soo waer ghi gaet in een huys blijft daer tot dat ghy daer wt gaet,

11

ende so wie v niet en ontfanghen, nocht v en hooren, van daer wt gaende scuddet dat stof van uwen voeten dien tot een ghetuyghenisse,

12

Ende wtgaende hebben sij ghepreect dat sij penitencie doen souden,

13

ende sij wierpen veel duyuels wt, ende sij salfden met olie veel siecken ende sij ghenasen die,

14

Ende die coninc Herodes heuet ghehoort (want sijnen naem was openbaer gheworden) ende hi seyde. Iohannes die dooper is van die dooden opghestaen, ende daerom wercken die crachten in hem,

15

Ende dandere seyden. Tis Helias, Maer dander seyden. Tis een propheet als een van den propheten,

16

Dwelc als Herodes ghehoort hadde, soo seyde hi. Iohannes den welcken ic onthalst hebbe, ⁺die is van die dooden opghestaen.

+ C

+ 17

Want die selue Herodes heeft ghesonden ende Iohannem gheuanghen ende hem inden kerker ghebonden, om Herodias sijns broeders Philippi huysvrouwe wille, want hi hadde die ten wijue ghenomen,

18

Want Iohannes seyde tot Herodes. Ten is v niet gheorloft te hebben ws broeders huysvrouwe

19

Ende Herodias leyde hem laghen, ende sij wilde hem dooden, maer sij en mochts niet,

20

Want Herodes ontsach Iohannem wetende dattet een rechtuerdich, ende heylich man was, ende hi bewaerde hem, ende hem ghehoort hebbende soo dede hi vele, ende hi hoorde hem gheerne,

21

ende alsser eenen bequamen dach ghecomen was, so heeft Herodes een auontmael van sijnder gheboorten ghegheuen den princen ende hooftmannen ouer duysent ende den principaelsten van Galileen,

22

ende doen die dochter van die selue Herodias binnen ghecomen was, ende ghedanst hadde, ende dat Herodi behaecht hadde, ende ooc mede den ghenen die daer ter maeltijt saten, so heeft die coninc totter iongher dochter gheseyt. Begheert van my dat ghi wilt, ende ic salt v gheuen,

23

ende hi heuet haer ghesworen. Alle tghene dat ghi begheren sult, dat sal ick v gheuen al waert die helicht van mijnen rijcke,

24

Die welcke als sij wtgheghaen was heeft tot haer moeder gheseydt. ⁺Wat sal ick begheren? Ende sij heeft gheseydt. Het hooft van Iohannes den doopere,

+ D

25

Ende als sij binnen ghecomen was ter stont met haesten totten coninck soo heeft sij begheert seggende. Ic wille dat ghi mi ter stont gheeft in een scotele thooft van Iohannes den doopere,

26

Ende die coninc werde bedroeft, nochtans om den eedt ende om die ghene die daer tsamen ter maeltijt saten, soo en heeft hi haer niet willen bedroeuen,

27

maer sendende den scerprichter heeft hi gheboden dat men sijn hooft brenghen soude in een scotele,

28

ende die heeft hem onthalst inden kerker, Ende hi heeft sijn hooft ghebracht in een scotele ende dat ghegeuen der iongher dochter, ende die ionghe dochter heeft dat haer moeder ghegheuen,

29

Dwelc als sijn discipelen ghehoort hebben, soo sijn sij ghecomen ende hebben sijn lichaem gehaelt ende dat geleyt in een graf.

* 30

Ende die apostelen tsamen comende tot Iesum hebben hem ghebootscapt alle tghene dat sij ghedaen hadden ende gheleert,

31

Ende hi seyde tot hen. Coemt alleene in een woeste plaetse ende rust v een luttelken, Want daer wasser vele die quamen ende wederom keerden, ende sij en hadden gheenen ledighen tijt om teten,

32

⁺Ende climmende in een scip, sijn sij wech ghegaen in een woeste plaetse alleene,

+ E

33

Ende sij hebben hem ghesien wech gaen, ende veel hebbent gheweten, ende sij sijn te voete van allen die steden derwaerts tsamen gheloopen ende voor henlieden daer ghecomen,

34

Ende Iesus wtgaende heeft die groote scare ghesien, ende hi heeft op hen bermherticheyt ghehadt, want si waren ghelijc scapen gheenen herder hebbende, ende hi heeft hen begonnen veel te leeren.

35

+ Ende alsser nv veel vren ouerleden waren, soo sijn tot hem ghecomen sijn discipelen segghende. Dese plaet-

[p. *783]

se is woest, ende die vre is ouerleden,

36

laetse ghaen op dat sij gaende in die naeste lantwooninghen ende dorpen voor hen spijse coopen die sij eten moghen,

37

Ende hi antwoordende heeft tot hen gheseyt. Gheeft hen ghy teten, Ende sij hebben hem gheseyt. Laet ons gaen coopen om twee hondert penninghen broot, ende wij sullen hen teten gheuen,

38

Ende hi seyt tot hen, Hoe veel brooden hebdi? gaet henen ende besieghet, Ende als sij dat wisten soo segghen sij. Vijue ende twee visschen

39

Ende hy heeft hen gheboden dat sijse alle souden doen sitten by gheselscappen opt groene gras,

40

Ende sij sijn gheseten by deelen by honderden, ⁺ende vijftighen,

+ F

41

Ende ghenomen hebbende die vijf brooden ende twee visschen opsiende inden hemel heeft hy ghebenedijt, ende die brooden ghebroken, ende hi heeftse sijnen discipelen ghegheuen dat sij die voor hen stellen souden, ende die twee visschen heeft hi hen allen ghedeylt,

42

Ende sij hebben alle gheten, ende sijn versaet gheweest,

43

Ende si hebben opghenomen die bleuelinghen twaelf coruen vol, ende vanden visschen,

44

Ende die daer gheten hadden waren vijf duysent mans.

* 45

Ende ter stont heeft hi sijn discipelen ghedwonghen om te climmen in tscip, dat si voor hem gaen souden ouer die zee tot Bethsaida die wijle dat hi het volc soude laten gaen.

46

+ Ende doen hy die verlaten hadde soo is hi wech ghegaen opden berch bidden,

47

Ende alst auont was, soo was tscip int midden der zee ende hi alleen op die eerde

48

ende siende henlieden arbeydende int riemen (want den wint was hen tseghen) ende omtrent die vierde wake des nachts is hy tot hen ghecomen wandelende op die zee, ende hy wilde voorby hen gaen,

49

Ende als sij hem ghesien hebben wandelende op die zee soo hebben si ghemeynt dat een phantasie was, ⁺ende hebben seer gheroepen,

+ G

50

Want si saghen hem allegader, ende sij waren verbaest, Ende ter stont heeft hy met hen ghesproken, ende hen gheseyt. Betrout, Ick bent, en wilt niet vreesen,

51

Ende hi is tot hen int scip gheclommem, ende den wint is opghehouden, Ende sij hebben noch meer in hen seluen verwondert,

52

want sij en hebben niet verstaen van die brooden, want hen herte was verblint,

53

Ende als sij ouer die zee gheuaren waren, sijn sij ghecomen int lant Genezareth, ende si sijn te lande aencomen,

54

Ende als sij wten scepe gheghaen waren, hebben sij hem ter stont ghekent,

55

ende doorloopende alle dat lantscap hebben sij begonnen in bedden omme te draghen die ghene die qualijc te passe waren daer sij hoorden dat hy was,

56

Ende al waer hi in ghinc in dorpen, oft in lanthuysen, oft in steden, daer leyden sij die siecken op die straten, ende si baden hem dat die te minsten den boort van sijnen cleede soude moghen raken, ende al die hem raecten worden ghesont.