Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

+ 1

⁺ENde sij sijn ghecomen ouer die enghicheyt der zee in dat lantscap der Gerasenen,

+ A

2

Ende als hy wten scepe ghinc, soo is hem ter stont te ghemoete comen wt die grauen een mensch met eenen onsuyueren gheest,

3

die sijn wooninghe hadde in die grauen, ende niemant en mocht hem ooc voortaen met ketenen binden,

4

want hi dickmael met veteren ende ketenen ghebonden sijnde die ketenen ghebroken hadde ende die veteren gheheel vernielt, ende niemant mocht hem temmen,

5

ende hi was altijt nacht ende dach in die grauen ende op die berghen roepende ende met steenen si seluen quetsende,

6

Ende siende Iesum van verre quam hi gheloopen ende heeft hem aenghebeden,

7

ende roepende met luyder stemmen heeft hi gheseyt. Wat heb ic met v te doene Iesu des alderhoochsten Godts sone? Ick besweere v by God dat ghi mi niet en pijnicht,

8

Want hi seyde tot hem. Gaet wt ghi onsuyuer gheest vanden mensch,

9

Ende hi vraechde hem. Wat is uwen naem, Ende hi seyt tot hem Legioen is mijnen naem, want wi sijnder vele,

10

Ende hi badt hem seer vele dat hi hem niet en soude wechdrijuen wt dat lantscap,

11

Ende daer omtrent eenen berch was een groot cudde verkenen weydende,

12

Ende die gheesten baden hem segghende. Sendt ons in die verkenen dat wi daer in moghen gaen,

13

Ende Iesus heuet hen ter stont toeghelaten, Ende die onsuyuer gheesten wt gaende sijn in die verkenen ghegaen, ⁺ende met eenen grooten ghedruysche is dat cudde in die zee van bouen nedergheuallen tot twee duysent toe, ende sij sijn versmacht in die zee,

+ B

14

Maer diese hoedden sijn wech gheuloden, ende si hebbent ghebootscapt in die stadt ende op die velden, Ende sij sijn wtghegaen om te besien watter ghesciet was,

15

Ende si comen tot Iesum, ende hebben dien mensch ghesien die vanden duyuel ghequelt was gheweest sittende ghecleedt ende gansch van sinnen, ende si hebben ghevreest,

16

Ende diet gesien hadden hebbent hen vertelt hoe dat hem ghesciet was die den duyuel binnen ghehadt hadde, ende vanden verkenen,

17

Ende si begonsten hem te bidden dat hi wech gaen soude wt haren palen,

18

Ende doen hi int scip clam so begonste hem te bidden die ghene die vanden duyuel ghequelt gheweest hadde, dat hy met hem soude sijn,

19

ende hy en heeft hem dat niet toegelaten, maer hi seyde tot hem. Gaet in v huys tot die uwe, ende vercondicht dien hoe groote dingen dat v die Heere ghedaen heeft, ende hoe dat hy ws ontfermt heeft,

20

Ende hi is wech ghegaen ende heeft beginnen te preken int lantscap der thien steden, hoe groote dinghen dat hem Iesus ghedaen hadde, ende sij verwonderden hen allegader.

* 21

Ende doen Iesus ouerghetrocken was in een scip wederom ouer die zee, soo isser een groote scare tot hem vergadert, ende hy was omtrent der zee

22

Ende daer is ghecomen een vanden ouersten der Sinagogen ghenaemt Iairus, ende hem siende is hi neder gheuallen aen sijn voeten,

23

ende hy badt hem seere segghende. Mijn dochter is in haer wterste. ⁺Coemt legt v handen op haer dat si mach ghesont worden ende leuen,

+ C

24

Ende hy is met dien wech gheghaen, ende hem volchde een groote scare, ende sij dronghen hem,

25

Ende een vrouwe die inden vloet des bloets was twaelf iaren lanck,

26

ende hadde veel gheleden van seer veel medecijn meesters ende hadde allen haer goet daer aen ghehanghen, ende en hadde met allen gheen bate gheuonden maer was noch qualijcker te passe,

27

als si gehoort hadde van Iesu, so is si comen in die scare van achter, ende heeft sijn cleedt ghenaect,

28

want sij seyde. Eest dat ick soo vele als sijn cleedt gherake, soo sal ick ghesont sijn

[p. *782]

29

Ende ter stont is verdroocht den oorspronc haers bloets ende sij gheuoelde in haer lichaem dat sij ghenesen was van die siecte,

30

Ende Iesus ter stont in hem seluen kennende die cracht die van hem wtghegaen was keerende hem omme totter scaren seyde. Wie heeft mijn cleederen gheraect?

31

Ende sijn discipelen seyden tot hem. Ghi siet die scare v dringhende, ende ghi segt. Wie heeft my gheraect?

32

Ende hi sach al rontsomme om haer te siene die dat ghedaen hadde,

33

Maer die vrouwe (vreesende ende beuende wetende wat in haer ghesciet was) is ghecomen ende voor hem nedergheuallen, ende heeft hem gheseyt alle die waerheyt,

34

Ende hi heeft haer gheseyt. ⁺Dochter v ghelooue heeft v ghesont ghemaect. Gaet in vreden ende weest ghesont van uwer siecten,

+ D

35

Ende als hy noch sprekende was, soo sijnder ghecomen totten ouerste der Sinagogen segghende. V dochter is doot wat queldi voorts meer den meester?

36

Maer Iesus (ghehoort hebbende dwoort datter gheseyt worde) heeft gheseyt totten ouersten der Sinagogen. En wilt niet vreesen alleenlijck soo ghelooft,

37

Ende hi en heeft niemanden toeghelaten hem te volghen, dan Petrum ende Iacobum ende Iohannem Iacobus broedere,

38

Ende si comen int huys vanden ouerste der Sinagogen, ende hi siet daer een beroerte des volcs ende die weenende ende seer iammerlijc screyende,

39

Ende als hy inghegaen was so heeft hi tot hen gheseyt. Waerom sijdi verslaghen ende weent ghi? die ionghe dochter en is niet doot, maer sij slaept,

40

Ende sij begecten hem, Maer nae dat hijse allegader hadde wtghedreuen, soo neemt hy tot hem den vader ende die moeder van die ionghe dochter, ende die met hem waren ende sij gaen binnen daer die ionghe dochter ligghende was,

41

Ende houdende die hant vander iongher dochter heeft hy tot haer gheseyt. Talitha cumi, Dwelc is te segghen. Ionghe dochter (ick segghe v) staet op,

42

Ende ter stont is die ionghe dochter opghestaen ende wandelde, ende sij was van twaelf iaren, ende sij sijn seer verwondert gheweest met een seer groote verbaestheyt,

43

Ende hy heeft hen seer neerstelijck gheboden dat niemant dit weten en soude, ende hy heeft gheseyt datmen haer teten soude gheuen.