Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde hy is wederom in Capharnaum ghegaen nae sommighe daghen,

+ A

2

ende tis ghehoort dat hy in huys was, ende daer isser vele tot hem vergadert, also dat die plaetse oock tot die doere die niet begrijpen en mocht, ende hi sprack hen dwoort,

3

Ende sij sijn tot hem ghecomen brenghende eenen ghichtighen mensch, die van vier menschen ghedraghen worde,

4

Ende doen sij dien voor hem niet ghebrenghen en consten om der scaren wille, hebben sij tdack ontdect daer hi was, ende een gat open doende hebben sij tbedde neder ghelaten daer die ghichtige mensch in lach,

5

Ende doen Iesus ghesien hadde hen ghelooue, seyde hy tot den ghichtighen mensch. Sone v sonden worden v vergheuen,

6

Ende daer waren sommighe van die Scriben sittende ende denckende in hen herten,

7

Hoe spreect dese also? hy blasphemeert. Wie mach die sonden vergheuen dan alleene Godt?

8

⁺Dwelc als Iesus ter stont ghekent heeft in sijnen gheest dat sij also dachten in hen seluen, soo seyt hi tot hen. Waerom dencti dese dinghen in v herten?

+ B

9

Wat is lichter om segghen den ghichtighen, Die sonden worden v vergheuen oft te segghen. Staet op, draecht v bedde, ende wandelt?

10

Ende op dat ghi weten moecht dat die sone des menschen ooc macht heeft opder eerden die sonden te vergheuen (soo seyt hy tot den ghichtighen mensch)

11

ick seg v. Staet op, ende neemt op v bedde, ende ghaet in v huys,

12

Ende ter stont is die opghestaen ende opnemende dat bedde is hi wech ghegaen voor hen allegader, alsoo datse hen alle verwonderden ende eerden God segghende. Noyt en hebben wij sulcs ghesien,

13

Ende hi is wederom wtghegaen ter zee, ende alle die scare quam tot hem, ende hy leerderse.

14

+ Ende doen hi voorby ghinck soo heeft hi ghesien Leui Alpheus sone sittende aen het tolhuys, ende hy heeft tot hem gheseyt. Volcht my, Ende hy opstaende is hem gheuolcht,

15

Ende het is gheschiet doen hy ter maeltijt sadt in sijn huys datter veel publicanen ende sondaren tsamen ter tafelen saten met Iesu ende sijnen discipelen, want daer wasser vele die hem ooc volchden,

16

⁺Ende die Scriben ende Phariseen siende dat hy adt met die publicanen ende sondaren seyden tot sijnen discipelen. Waerom eedt ende drinct v meester met die publicanen ende sondaren?

+ C

17

Doen Iesus dit ghehoort hadde heeft hi tot hen gheseyt. Die ghesonde en hebben den medecijn niet van noode, maer die qualijc te passe sijn, want ic en ben niet ghecomen om te roepen die rechtuerdighe, maer die sondaren.

* 18

Ende Iohannes ende der Phariseen discipelen waren vastende, ende sij comen ende segghen tot hem. Waerom vasten die discipelen Iohannis ende der Phariseen, maer v discipelen en vasten niet?

19

Ende Iesus seyde tot hen lieden. Moghen die bruloft kinderen soo langhe als die brudegom met hen is vasten? Soo langhen tijt sij den brudegom by hen hebben, en moghen sij niet vasten,

20

maer die daghen sullen comen dat die brudegom hen sal afghenomen worden, ende dan sullen sij vasten in die daghen,

21

Niemant en naeyt een stuck nieu lakens aen een oudt cleedt, oft anders soo neemt dat nieuwe stuck die volheyt af van dat oude

[p. *780]

cleedt ende het wort alsoo een meerder schoere,

22

Ende niemant en ghiet nieuwen wijn in oude flesschen, ⁺oft anders soo schoort den wijn die flesschen, ende den wijn sal wtghestort worden ende die flesschen verdoruen Maer nieuwen wijn moet in nieuwe flesschen ghegoten worden,

+ D

23

Ende het is wederom gheschiet doen hy op die sabboth daghen wandelde doort coren ende sijn discipelen begonsten voorts te gaen ende die aeren af te plucken,

24

Ende die Phariseen seyden tot hen. Siet wat sij doen in die sabboth daghen dat niet gheorloft en is,

25

Ende hy heeft hen gheseyt. En hebdi noyt ghelesen wat Dauid dede als hy noot hadde ende dat hy ende sijn knechten hongher hadden?

26

Hoe dat hy gheghaen is int huys Gods onder Abiathar den prince der priesteren, ende heeft die brooden der voorlegghinghen gheten, die welcke niet en was gheorloft te eten dan den priesteren, ende hy heeftse ghegheuen den ghenen die met hem waren?

27

Ende hy seyde henlieden. Den sabboth is om des menschen wille ghemaect, ende niet den mensch om den sabboth.

28

Daerom is die sone des menschen oock een Heere vanden sabboth.