Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DAT beghinsel van dat Euangelie Iesu Christi des sone Gods

+ A

2

Ghelijck ghescreuen is in Isaia den propheet.

+ (Siet ick sende mijnen Enghel voor v aensicht die uwen wech bereyden sal voor v)

3

Een stemme des ghenen die daer roepende is in die woestijne. Bereyt den wech des Heeren, maect recht sijn voetpaden,

4

Iohannes heeft gheweest doopende ende prekende tdoopsel der penitencien tot verghiffenisse der sonden,

5

Ende tot hem is wtghegaen alle dat lantscap van Iudeen, ende alle die Ierosolymiters ende sij worden van hem ghedoopt inden vloet der Iordanen belijdende hen sonden,

6

Ende Iohannes was ghecleedt met kemels hayre, ende eenen leren riem omtrent sijn lendenen, ende hy adt sprinchanen ende wilt honich

7

Ende hy preecte segghende. Daer coemt een nae my die stercker is dan ick, van wiens schoenen ick nederghebuycht niet weerdich en ben den riem te ontbinden,

8

Ick heb v met water ghedoopt, maer die sal v doopen door den heylighen gheest.

* 9

Ende het is ghesciet in die daghen dat Iesus is ghecomen van Nazareth wt Galileen, ende hy is van Iohannes ghedoopt in die Iordane,

10

Ende ter stont opclimmende wten water heeft hy die hemelen open ghesien, ende den gheest als een duyue nederdalende ende blijuende in hem,

11

Ende daer is een stemme ghesciet van die hemelen. Ghi sijt mijn beminde sone, in v heb ick behaghen,

12

⁺Ende ter stont heeft hem den gheest wtghedreuen in die woestijne,

+ B

13

Ende hy was in die woestijne veertich daghen ende veertich nachten, ende hy worde van satanas ghetempteert, ende was met die beesten, ende die Enghelen dienden hem,

14

Ende nae dat Iohannes gheuanghen was, soo is Iesus in Gali-

[p. *779]

leen ghecomen prekende dat Euangelie van Godts rijck,

15

ende segghende. Den tijt is veruult, ende het rijck Gods is by ghecomen, doet penitencie ende ghelooft dat Euangelie,

16

Ende hi gaende voorbi die zee van Galileen heeft ghesien Simon ende Andream sijnen broeder worpende netten in die zee (want het waren visschers)

17

ende Iesus heeft hen gheseyt. Coemt nae mi, ende ick sal v doen worden visschers der menschen,

18

Ende ter stont achterlatende die netten sijn sij hem gheuolcht,

19

Ende van daer een luttelken voorts ghegaen sijnde heeft hi ghesien Iacobum Zebedeus sone ende Iohannem sijnen broeder, ende dese hermakende netten int scip,

20

ende ter stont heeft hi die gheroepen, Ende sij verlatende haren vader Zebedeus int scip metten huerlinghen, sijn hem gheuolcht,

21

Ende sij sijn ghegaen in Capharnaum, ende ter stont in die sabboth daghen gaende in die Sinagoge leerde hi henlieden,

22

⁺Ende sij verwonderden hen seere van sijnder leeringhen, want hi was hen leerende als macht hebbende ende niet als die Scriben,

+ C

23

Ende als in hen Sinagoge was een mensch met eenen onsuyueren gheest, ende die heeft luyde geroepen

24

seggende. Wat hebben wi met v te doene Iesu van Nazareth? Sijdi gecomen om ons te verderuen? Ic weet wel wie ghy sijt, Die heylighe Gods

25

Ende Iesus heeft hen ghedreycht segghende. Wert stom ende gaet wt den mensch,

26

Ende den onsuyueren gheest hem verscorende ende hooghe crijschende met luyder stemmen is van hem wtghegaen,

27

Ende sij hebben hen alle verwondert, alsoo dat si onder malcanderen vraechden segghende. Wat is dit? Wat is dese nieuwe leeringhe dat hi ooc met machte den onsuyueren gheesten ghebiedt, ende dat sij hem onderdanich sijn?

28

Ende sijn fame is ter stont voorts verbreyt in alle dlantscap van Galileen,

29

Ende ter stont gaende wter Sinagogen sijn sij ghecomen in Simons ende Andreas huys met Iacobus ende Iohannes,

30

Ende Simons huysvrouwe moeder lach te bedde sieck van die febris, ende ter stont segghen si hem van haer,

31

Ende hi bi haer comende heeft haer op ghehauen nemende haer hant, ende ter stont heeft haer die febris ghelaten, ende sij diende henlieden,

32

Maer alst auont gheworden was doen die sonne onderghegaen was, soo hebben sij tot hem ghebracht alle die qualijck te passe waren, ende die duyuels binnen hadden,

33

ende alle die stadt was vergadert aen die doere,

34

Ende hy heefter vele ghenesen die ghequelt worden van verscheyden crancheden ende veel duyuelen wierp hy wte, ende hy en lietse niet spreken om dat sij hem kenden,

35

⁺Ende seer vroech opstaende is hi wtgaende wech ghegaen in een woeste plaetse, ende daer badt hi,

+ D

36

Ende Simon is hem naegheuolcht, ende die met hem waren,

37

Ende als sij hem gheuonden hadden hebben sij tot hem gheseyt. Sij soecken v alle,

38

Ende hy heeft tot hen gheseyt. Laet ons gaen in die naeste dorpen ende steden, dat ic daer oock preken mach, want daerom ben ick ghecomen,

39

Ende hy was prekende in hen Sinagogen, ende in gheheel Galileen ende wtworpende die duyuelen,

40

Ende tot hem is ghecomen een melaetsch mensch hem biddende, ende met gheboochder knien seyt hi tot hem. Eest dat ghi wilt ghy moecht my suyueren,

41

Ende Iesus sijns ontfermende heeft sijn hant wtghesteken, ende hem rakende heeft hi tot hem gheseyt. Ick wilt, wert suyuer,

42

Ende als hijt gheseyt hadde, soo is ter stont die melaetscheyt van hem ghegaen, ende hy is suyuer gheworden,

43

Ende hi heeft hem ghedreycht, ende ter stont heeft hi hem wech ghestiert,

44

ende seyt tot hem. Siet toe dat ghi dit niemant en segghet, maer gaet henen, ende verthoont v den prince der priesteren, ende offert voor v suyueringhe die dinghen die Moyses gheboden heeft hen tot eenen ghetuyghenis,

45

Ende die wtgheghaen sijnde heeft beghinnen te preken, ende te verbreyden dit woort, alsoo dat Iesus nv niet en mocht openbaerlijck in die stadt ghaen, maer was buyten in die woeste plaetsen, ende sij quamen tsamen tot hem van allen sijden.