Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xxvi. Capittel.

+ 1

⁺ENde tis ghesciet, als Iesus alle dese woorden voleynt hadde dat hy heeft gheseyt tot sijnen discipelen.

+ A

2

Ghy weet dat nae twee daghen sal paesschen worden, ende die sone des menschen sal gheleuert worden om ghecruyst te sijn,

3

Doen sijn verghadert die princen der priesteren ende die ouders des volcks int voorhof vanden prince der priesteren die ghenaemt was Cayphas,

4

ende sij hebben raet ghehouden dat sij Iesum met liste souden vanghen ende dooden,

5

Maer si seyden. Niet opden feestdach, op datter gheenen oploop ghescieden en soude onder tvolck.

6

Ende als Iesus was in Bethanien int huys van Simon den melaetschen,

7

soo is tot hem comen een vrouwe hebbende een busse van Alabasteren met costelijcke salue, ende sij heeft die wtghestort op sijn hooft daer hy ter maeltijt sittende was,

8

Ende die discipelen dit siende werden verbolghen, segghende. Waer toe dient dit verlies?

9

Want dit mocht diere vercocht worden, en den armen ghegheuen,

10

Ende Iesus dit wetende heeft tot hen gheseydt. Wat sijdi deser vrouwen moeyelijck? want sij heeft een goet werck ghedaen aen my,

11

want ghy hebt altijt armen met v, maer my en hebdy altijt niet,

12

Want dese stortende dese salue op mijn lichaem heuet ghedaen om my te begrauen.

13

⁺Voorwaer ic segghe v, al waer dit euangelie ghepreect sal worden ouer alle die werelt, daer sal oock gheseyt worden dat sij dit ghedaen heeft tot haerder ghedenckenissen,

+ B

14

Doen isser wech ghegaen een vanden twaeluen die ghenoemt was Iudas die Iscarioter tot die princen der priesteren

15

en seyde tot hen. Wat wildi my gheuen ende ick sal hem v lieden leueren? Ende sij hem hebben hem gheboden dertich silueren penninghen,

16

Ende van dier tijt socht hy bequame gheleghentheyt om hem te leueren.

17

Ende opden iersten dach der ongheheesder brooden, soo sijn die discipelen tot Iesum comen segghende. Waer wildi dat wij v bereyden om het paeschlam te eten?

18

Ende Iesus heeft gheseyt. Gaet in die stadt tot eenen ende segt hem. Die meester seyt. Mijnen tijt is nakende, by v houde ick mijnen paeschen met mijnen discipelen,

19

Ende die discipelen hebben ghedaen also hen Iesus gheboden hadde, ende si hebben tpaesch lam bereyt.

20

Ende alst auont was gheworden, so sadt hi ter tafelen met sijnen twaelf discipelen,

21

Ende doen sij aten heeft hy gheseyt. Voowaer ick segghe v dat een van v lieden my sal verraden,

22

ende sij seer bedroeft sijnde hebben elck begonst te segghen. ⁺Ben ict Heere?

+ C

23

Ende hy antwoordende heeft gheseydt. Die met my die hant dopt in die scotele, dese sal my verraden.

24

Die sone des menschen ghaet voorwaer ghelijck van hem ghescreuen is, maer wee dien mensche door den welcken die sone des menschen sal verraden worden, het waer hem beter dat die mensch niet gheboren en ware,

25

Ende Iudas die hem verraden heeft antwoordende seyde. Ben ict Rabbi? Hy seyde hem Ghy hebbet gheseyt.

26

Ende doen sij den auontmael aten, soo heeft Iesus tbroot ghenomen ende ghebenedijt ende dat ghebroken, ende heeft dat sijnen discipelen ghegheuen ende gheseydt. Neemt ende etet, dit is mijn lichaem,

27

Ende nemende den kelck heeft hy ghedanct ende heeften hen ghegheuen segghende. Drinct hier wt alle gader,

28

Want dit is mijn bloet des nieuwen testaments, het welck voor vele sal wtghestort worden tot verghiffenisse der sonden,

29

Ende ick segghe v lieden. Ic en sal voortaen niet meer drincken van dit ghewas des wijnstruycs, tot op dien dach toe als ick dat sal met v lieden nieuwe drincken in mijns vaders rijck,

30

Ende als den lofsanck gheseyt was, soo sijn sij wtghegaen nae den berch van Oliueten,

31

Doen seyde Iesus tot hen. Ghy sult alle gader verarghernisse lijden in my in deser nacht? Want daer is ghescreuen. Ick sal slaen den herder, ⁺ende die scapen van dat cudde sullen verstroeyt worden,

+ D

32

maer nae dat ick opghestaen sal sijn, dan sal ick voor v lieden gaen in Galileen,

33

Ende Petrus antwoordende heeft tot hem gheseyt. Al waert ooc dat si alle in v verarghert worden, ick en sal nemmermeer verarghert worden,

34

Iesus heeft hem gheseyt. Voorwaer ick segghe v, dat ghy eer den haen craeyen sal my drijmael loochenen sult,

35

Ende Petrus seyde tot hem. Al moeste ick oock met v steruen, soo en sal ick v niet loochenen. Desghelijcs hebben alle die discipelen gheseyt.

36

Doen is Iesus ghecomen met hen in een dorp, dat ghenoemt wort Gethsemani, ende hy heeft tot sijnen discipelen gheseyt. Sidt hier, tot dat ic derwaerts gae ende bidde,

37

Ende met hem ghenomen hebbende Petrum ende die twee sonen van Zebedeus heeft hi begonne droeuich ende truerich te worden,

38

Doen seyde hy tot hen. Mijn ziele is bedroeft totter doot toe, Verbeyt hier, ende waect met my,

39

Ende een luttelken voorts ghegaen sijnde, is hi op sijn aensicht nedergheuallen biddende ende segghende. Mijn vader, eest moghelijc laet van my wech gaen desen kelc, maer noch tans niet alsoo ick wille, maer soo ghy,

40

Ende hy is

[p. *777]

tot sijn discipelen ghecomen, ende heeftse slapende gheuonden, ende hy seyde tot Petrum. Alsoo en hebdi niet een vre met my moghen waken?

41

Waect ende bidt dat ghy in gheen becoringhe en valt, Den gheest is voorwaer bereedt, maer tvleesch is cranck.

42

Wederom is hy ten tweede male wech ghegaen, ende heeft ghebeden segghende. Mijn vader, en mach desen kelc niet voor by gaen ten sij dat ick dien drincke, soo laet uwen wille ghescieden,

43

Ende hi is wederom ghecomen ende heeftse slapende gheuonden, want hen ooghen waren beswaert,

44

Ende die verlaten hebbende, is hy wederom wech ghegaen ende heeft ten derden male ghebeden dat selue woort segghende.

45

Doen is hy ghecomen tot sinen discipelen, ende seyt tot hen. Slaept nv ende rust, siet die vre is by ghecomen ende die sone des menschen sal gheleuert worden in die handen der sondaren,

46

⁺Staet op laet ons gaen, siet hy is by ghecomen die my leueren sal.

+ E

47

Als hy noch sprekende was, siet Iudas een van den twaeluen quam, ende met hem een groote scare met sweerden ende stocken ghesonden van die princen der priesteren, ende van die ouders des volcs,

48

Ende die hem verraden heeft, heeft hen een teeken ghegheuen segghende. Den welcken ick cussen sal, die eest, houdt hem.

49

Ende ter stont tot Iesum comende heeft hi geseyt. Weest ghegroet Rabbi, Ende hy heeft hem ghecust,

50

Ende Iesus heeft tot hem gheseyt. Vrint waer toe sijdi ghecomen? Doen sijn sij aenghecomen ende hebben hen handen aen Iesum gheslaghen ende hem gheuanghen ghenomen,

51

Ende siet een vanden ghenen die met Iesu waren, sijn hant wtstekende heeft sijn sweert wtghetrocken, ende slaende den knecht vanden prince der priesteren heeft hem sijn oore afghehouwen.

52

Doen seyde Iesus tot hem Keert v swaert weder in sijn plaetse, want alle die tswaert nemen, sullen metten swaerde vergaen,

53

Oft meyndi dat ick niet en mach mijnen vader bidden ende hy sal my nv toe scicken meer dan twaelf Legioenen der Enghelen?

54

Hoe sullen dan die scriftueren volbracht worden? want het moet alsoo ghescieden,

55

In die vre heeft Iesus gheseydt tot den scaren. Sijdy als eenen moordenaer wtghegaen met swaerden ende stocken om my te vanghen? Daghelijcs sadt ick by v lieden leerende inden tempel, ende ghy en hebt my niet gheuanghen

56

Maer dits al ghesciet om dat volbracht souden worden die scriftueren der propheten, ⁺Doen sijn alle die discipelen hem verlatende gheuloden,

+ F

57

Maer dese Iesum gheuanghen houdende hebben hem gheleyt tot Caipham den prince der priesteren, daer die scriben ende ouders tsamen ghecomen waren,

58

Ende Petrus heeft hem gheuolcht van verre, tot in dat voorhof vanden prince der priesteren, Ende binnen ghegaen sijnde sadt hy metten dienaers, om het eynde te siene,

59

Ende die princen der priesteren ende alle den raet sochten valsch ghetuyghenis teghen Iesum, dat sij hem ter doot leueren souden,

60

ende sij en hebben gheen vonden al waert datter vele valsche ghetuyghen bi comen waren, Maer ten laetsten sijnder twee valsche ghetuyghen comen,

61

ende hebben gheseyt. Dese heeft gheseyt. Ick mach den tempel Godts verderuen, ende nae drij daghen dien weder optimmeren,

62

Ende die prince der priesteren opstaende heeft tot hem gheseyt. En antwoordi niet op tghene dat dese teghen v ghetuyghen?

63

Maer Iesus sweech. Ende die prince der priesteren heeft tot hem gheseyt. Ick beswere v by den leuenden God, dat ghy ons segt oft ghy Christus sijt Godts sone,

64

Iesus seyde hem. Ghy hebbet gheseyt, maer nochtans ick segghe v lieden, voortaen suldi sien den sone des menschen sittende ter rechter hant van die cracht Godts, ende comende in die wolcken des hemels,

65

Doen heeft die prince der priesteren sijn cleederen ghescoert segghende. Hi heeft gheblasphemeert, wat behoeuen wi noch ghetuyghen Siet nv hebdi blasphemie ghehoort

66

wat dunct v? Ende sij antwoordende hebben gheseyt. Hi is die doot sculdich,

67

⁺Doen hebben sij in sijn aensicht ghespoghen, ende hem gheslaghen met halslaghen, maer die andere hebben hem met platte handen in sijn aensicht slaghen ghegheuen

+ G

68

segghende. Propheteert ons Christe, wie eest die v gheslaghen heeft?

69

Maer Petrus sadt buyten int voorhof, ende een dienstvrouwe is tot hem ghecomen segghende. Ende ghi waert met Iesu den Galileusschen

70

Ende hy heuet gheloochent voor hen allegader segghende. Ick en weet niet wat ghy segt,

71

Ende als hi ter doeren wt ghinck soo heeft hem een ander dienstvrouwe ghesien, ende seyde den ghenen die daer waren. Dese was ooc met Iesu van Nazareth,

72

Ende hy heuet wederom gheloochent met eede. Ick en heb den mensch niet ghekent,

73

Ende nae een luttelken sijn sij aencomen die daer stonden, ende hebben tot Peeteren gheseyt. Voor waer ghy sijt oock een van dien want v sprake maect v openbaer,

74

Doen begonste hy te veruloecken ende te sweren dat hy den mensch niet ghekent en hadde, Ende ter stont heeft den haen ghesonghen,

75

ende Petrus is ghedachtich worden Iesus woort dat hy gheseyt hadde. Eer den haen singhen sal, soo suldy my drijmael loochenen, Ende wtghegaen sijnde heeft hy bitterlijck gheweent.