Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

+ 1

⁺DAn sal het rijck der hemelen ghelijc sijn thien maechden die haer lampen nemende wtghegaen sijn te ghemoete den brudegom ende der bruyt.

+ A

2

Ende vijue van die waren dwaes, ende vijue wijs,

3

maer die vijf dwase, als sij haer lampen ghenomen hadden, soe en hebben sij gheen olie met hen ghenomen,

4

Maer die wijse hebben olie in hen vaten ghenomen metten lampen.

5

Ende als die brudegom vertoefde, soe hebben sij alle ghesluymert ende gheslapen.

6

Ende inder middernacht isser een gheroep ghesciedt. Siet die brudegom coemt, gaet wt hem te ghemoete,

7

doen sijn alle die maechden opghestaen ende hebben hen lampen bereyt.

8

Maer die dwase hebben tot die wijse gheseyt, Gheeft ons van uwer olien, want ons lampen gaen wt.

9

Die wijse hebben gheantwoert segghende, Op dat by auontueren v ende ons die niet ghenoch en sij, soe gaet lieuer tot die vercoopers ende coopter voer v,

10

Maer doen sij ghinghen om te coopen soe is die brudegom ghecomen, ende die bereedt waren sijn met hem inghegaen totter bruloft, ende die dore is ghesloten,

11

maer ten laetsten soe comen die ander maechden seggende, Heere, Heere, doet ons open.

12

Ende hy antwoerdende heeft gheseyt, Voerwaer ick seg v ic en kenne v niet.

13

Daerom waect, want ghy en weet den dach niet noch die vre.

* + 14

Want ghelijck een mensch buytens lants reysende, heeft gheroepen sijn knechten, ende heeft hen sijn goeden gheleuert.

15

Ende den eenen heeft hy ghegheuen vijf ponden, ende den anderen twee, maer den anderen een, eenen ieghelicken nae sijn eyghen vermoghen, ende hy is ter stont ghereyst.

16

Ende die vijf ponden ontfanghen hadde is wech ghegaen, ende heeft daer mede ghecomenscapt ende ghewonnen noch ander vijue.

17

⁺Desghelijcs ooc dier twee ontfanghen hadde, heefter ander twee ghewonnen.

+ B

18

Maer die een ontfanghen hadde wechgaende heeft dat in die aerde ghegrauen, ende sijns heeren ghelt gheborghen.

19

Ende nae veel tijts soe is die heere van dien knechten ghecomen, ende heeft rekeninghe ghehouden met hen lieden.

20

Ende by hem comende die vijf ponden ontfanghen hadde, heeft voertsbracht die ander vijf ponden segghende, Heere ghy hadt my vijf ponden gheleuert, siet ander vijf ponden heb ick daer bouen ghewonnen.

21

Sijn heere syde tot hem, Wel aen goede knecht ende ghetrouwe, want ghy ouer luttel goets ghetrouwe hebt gheweest, soe sal ick v ouer vele stellen, gaet binnen in die blijscap ws heeren.

22

Ende hy is oock by comen die twee ponden ontfanghen hadde ende hy heeft gheseyt, Heere twee ponden hebdi my gheleuert, siet twee ander heb ick ghewonnen.

23

Sijn heere seyde tot hem, Wel aen goede knecht ende ghetrouwe, want ghy ouer luttel hebt ghetrouwe gheweest, soe sal ick v ouer vele stellen.

24

Maer oock by comende die een pondt ontfanghen hadde heeft gheseyt, ⁺Heere ick weet wel dat ghy een straf mensch sijt, ghy maeyt daer ghy niet ghesaeyt en hebt, ende ghy vergadert daer ghi niet ghestroeyt en hebt,

+ C

25

ende vreesende ben ick wech ghegaen, ende ick heb v pondt in die aerde gheborghen, siet ghy hebt dat uwe is.

26

Ende sijn heere antwoerdende heeft tot hem gheseyt, Ghy quade ende traghe knecht ghy wist wel dat ick maye daer ick niet en saye, ende vergadere daer ick niet ghestroyt en hebbe.

27

Daerom haddi mijn ghelt moeten beuelen den wisselaers, ende ic comende soude emmer dat mijn is ontfanghen hebben met winninghe.

28

Daer om neempt van hem dat pondt, ende gheuet den ghenen die thien ponden heeft.

29

Want alle den ghenen die heeft, sal ghegheuen worden, ende hy sal oueruloedich wesen, maer den ghenen die niet en heeft, sal ooc dat hy schijnt te hebben afghenomen worden.

30

Ende den onnuten knecht worpt buyten in die wterste duysternissen, daer sal weeninghe sijn ende crijsselinge der tanden.

* + 31

Maer als die sone des menschen comen sal in sijn maiesteyt, ende alle sijn enghelen met hem, dan sal hy sitten opden stoel sijnder maiesteyt

32

ende voer hem sullen vergadert worden alle die volcken, ende hy salse sceyden van malcanderen ghelijck een herder die scapen sceyt van

[p. *776]

die bocken,

33

Ende die scapen sal hy stellen tot sijnder rechter hant, ende die bocken ter slincker hant,

34

Dan sal die coninck segghen den ghenen die aen sijn rechte sijde wesen sullen. Coemt ghebenedijde mijn vaders besidt het rijck dat voor v bereydt is van tbeghin der werelt,

35

want ick heb hongher ghehadt, ende ghy hebt my ghespijst, ick heb dorst ghehadt, ende ghy hebt my te drincken ghegheuen, ick was een pelgrim, ende ghi hebt mi geherbercht,

36

naect, ende ghi hebt my ghecleet, cranck, ende ghy hebt my besocht, ick was inden kerker, ende ghy sijt tot my ghecomen,

37

⁺Dan sullen hem die rechtuerdighe antwoorden seggende. Heere wanneer hebben wij v ghesien hongherich, ende hebben v ghespijst dorstich, ende v te drincken ghegheuen?

+ D

38

ende wanneer hebben wy v een pelgrim ghesien, ende hebben v gheherbercht, oft naect ende v ghecleedt?

39

oft wanneer hebben wij v sieck ghesien oft inden kerker, ende dat wij tot v comen sijn?

40

Ende die coninc antwoordende sal hen segghen. Voorwaer ick segghe v lieden, soo langhe als ghijt eenen van desen mijnen alderminsten broederen ghedaen hebt, soo hebdijt my ghedaen,

41

Dan sal hy ooc segghen den ghenen die aen sijn slincke hant wesen sullen, Gaet wech van my ghy vermalendijde int eewich vier, dat bereydt is den duyuel ende sijnen enghelen,

42

want ick ben hongherich gheweest, ende ghy en hebt my niet teten ghegheuen, Ick heb dorst ghehadt, ende ghy en hebt my niet te drincken ghegheuen

43

Ick was een pelgrim ende ghy en hebt my niet gheherbercht, naect, ende ghy en hebt my niet bedect, Ick was sieck ende inden kerker, ende ghy en hebt my niet besocht,

44

Dan sullen hem oock die antwoorden segghende. Heere wanneer hebben wij v ghesien hongher oft dorst lijdende, oft pelgrim, oft naect, oft sieck, oft inden kerker, ende dat wij v niet ghedient en hebben,

45

Dan sal hy dien antwoorden segghende. Voorwaer ic segghe v lieden, soo langhe als ghijt niet ghedaen en hebt eenen van desen minsten, soo en hebdijs my oock niet ghedaen,

46

Ende dese sullen gaen in die eewighe pijne maer die rechtuerdighe int eewich leuen.