Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xxiiij. Capittel.

1

⁺ENde Iesus wten tempel ghegaen sijnde ghinc wech. Ende sijn discipelen sijn tot hem ghecomen, om dat sij hem toonen souden die timmeringhe des tempels.

+ A

2

Ende hy antwoerdende heeft tot hen gheseyt, Siedi alle dese dinghen? Voer waer ick segghe v, hier en sal den eenen steen op den anderen steen niet ghelaten worden, die niet en sal verdoruen worden.

+ 3

Ende als hy sittende was op den berch van Oliueten, soe sijn tot hem sijn discipelen al heymelijck ghecomen segghende, Segt ons wanneer sullen dese dinghen sijn? ende welck is het teeken van uwer toecoemst ende van die voleyndinghe der werelt?

4

Ende Iesus antwoerdende heeft tot hen gheseyt, Siet toe dat v niemant en verleyde,

5

want daer salder veel comen in mijnen naem segghende, Ick ben Christus, ende sij sullender veel verleyden.

6

Want ghi sult orloghen hooren, ende gheruchten van orloghen. Siet toe dat ghi niet verslaghen en wort, want dese dinghen moeten ghescieden, maer noch en eest het eynde niet.

7

Want dat een volck sal teghen dander volck opstaen, ende deen rijck teghen dander rijck, ende daer sullen wesen wesen pestilencien ende diere tijden, ende aertbeuinghen op sommighe plaetsen,

8

ende alle dese ghesciedenissen sullen die beghinselen der droefheden wesen.

9

Dan sullen sij v leueren in tribulatien, ende sij sullen v dooden, ende ghi sult ghehaet sijn van allen luyden om mijnen naem.

10

⁺Ende dan salder vele verarghert worden, ende sij sullen malcanderen verraden, ende malcanderen haten.

+ B

11

Ende daer sullen veel valsche propheten opstaen, ende die sullender vele verleyden.

12

Ende aenghesien dat die boosheyt oueruloedich wesen sal, soe sal die liefde van veel menschen vercouden,

13

maer die volstandich blijft totten eynde toe, dese sal salich wesen.

* 14

Ende dit Euangelie des rijcs sal ghepreect worden in die gheheel werelt, tot een ghetuyghenis alle den volcken, ende dan sal die vol eyndinghe comen.

15

Daer om als ghi sien sult, die afgrijselijcheyt der verwoestinghen, die gheseyt is van Daniel den Propheet, staende in die heyleghe plaetse (diet leest die verstae dat)

16

soe wie dan in Iudeen is die vliede tot die berghen,

17

ende die opt dack is, die en come niet af om iet te halen van sijnen huyse,

18

ende soe wie int velt is die en keere niet wederom om te halen sijnen rock.

19

Ende wee den ghenen die kinderen draghen, ende voesteren, in die daghen.

20

Maer biddet dat v vluchte niet en ghesciede in den winter oft op den sabboth dach.

21

⁺Want tsal dan sulcke groote tribulacie wesen, dat sulcke niet gheweest en heeft, van tbeghinsel der werelt, tot nu toe, noch ghescieden en sal.

+ C

22

Ende ten ware dat die daghen ghecort waren, soe en soude alle vleesch niet salich worden, maer om die wtuercorene sullen die daghen ghecort worden.

23

Eest dat iemant dan v segghen sal. Siet hier is Christus, oft daer, soe en willet niet gheloouen,

24

want daer sullen opstaen valsche christen ende valsche propheten, ende sij sullen groote teekenen ende wonder wercken gheuen, alsoe dat in dwalinghen gheleyt souden worden (waert moghelijck) ooc die wtuercorene.

25

Siet ic hebt v te voren gheseyt.

26

Daer om eest dat sij v lieden segghen, siet hy is in die woestijne, soe en wilt niet wtgaen, siet hy is int binnenste des huys, soe en wilt dat niet ghelouen.

27

Want ghelijck den blixem wtcoemt vanden oosten, ende schijnt totten westen, alsoe sal oock wesen die toecoemst van den sone des menschen.

28

Soe waer een lichaem es, daer sullen die aerents vergaderen.

29

Ende

[p. *775]

ter stont nae die tribulacie van die daghen, sal die sonne verduystert worden, ende die mane en sal haer licht niet gheuen, ende die sterren sullen vanden hemel vallen, ende die crachten der hemelen sullen beroert worden,

30

ende dan sal het teeken van den sone des menschen ghesien worden inden hemel, ende dan sullen alle die gheslachten der aerden groot ghescrey maken, ende sij sullen sien den sone des menschen comende in die wolcken des hemels, met grooter cracht ende maiesteyt.

31

Ende hy sal sijn enghelen seynden met een trompet, ende met een groote stemme ende die sullen sijn wtuercorenen vergaderen van die vier winden, van die wterste der hemelen, tot haren eynden toe.

32

Ende vanden vijgheboom leert die ghelijckenisse, als sijn tacken teer sijn ende sijn bladeren voert ghecomen, soe weeti dat den somer by is.

33

Alsoe oock wanneer ghy lieden siet alle dese dinghen, soe weet dattet by is in die doore.

34

Voerwaer ick segghe v dat dit gheslachte niet en sal voerby gaen, tot dat alle dese dinghen ghescieden sullen.

35

Hemel ende aerde sullen voerby gaen, maer mijn woerden en sullen niet voerby gaen.

36

Maer van dien dach ende vre en weet niemant, noch die enghelen der hemelen, dan die vader alleen.

37

Maer alst was in die daghen van Noe, alsoe sal oock wesen die toecoemst van den sone des menschen.

38

Want ghelijck sij waren in die daghen voer den ouervloet, etende ende drinckende, ⁺houwende ende ten houwelijcke bestedende, tot op dien dach dat Noe in die arcke ghinck,

+ D

39

ende sij en hebbens niet bekent tot dat den ouervloet quam, ende hen allen wech nam, alsoe sal sijn die toecoemste van den sone des menschen.

40

Dan salder twee inden acker wesen, die eene sal op ghenomen worden ende die andere achterghelaten,

41

twee malende in eene molen, die een sal opghenomen worden, ende die andere achterghelaten.

+ 42

Daer om waect, want ghi en weet niet wat vre v heere comen sal.

43

Ende weet datte, waert sake dat die vader des huysghesins wist wat vren dat die dief comen soude, hy soude voerwaer waken, ende en soude sijn huys niet laten doergrauen.

44

Daer om soe weest ghy lieden ooc bereedt, want in die vre die ghy niet en weet, sal die sone des menschen comen.

45

Wie meyndi datter is een ghetrouwe ende voersienich knecht, den welcken sijn heere ghestelt heeft ouer sijn huysghesin, dat hy hen spijse gheue ten tijde?

46

Salich is die knecht den welcken sijn heere (als hy sal comen) bevint alsoe doende,

47

Voerwaer ick segghe v dat hy hem ouer alle sijn goet stellen sal.

* 48

Maer eest dat die quaden knecht seyt in sijn herte. Mijn heere vertrect langhe te comen,

49

ende dat hy beghint te slaen sijn mede knechten, ende dat hij etet ende drincket met die dronckaerts.

50

Soe sal die heere van dien knecht comen op den dach, opden welcken dat hy niet en hoopt, ende op die vre die hy niet en weet,

51

ende hy sal hem deylen, ende sijn deel sal hy stellen met die Hypocrijten daer sal weeninghe sijn ende cryselinghe der tanden.