Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xxiij. Capittel.

+ 1

⁺DOen heeft Iesus ghesproken tot die scaren, ende tot sijn discipelen

+ A

2

segghende, Op den stoel van Moyses hebben gheseten die Scriben ende Phariseen.

3

Daer om al wat sij v ghebieden dat bewaert ende doet, maer nae hen wercken en wilt niet doen, want sij segghent ende sij en doens niet.

4

Want sij binden te samen sware ende onuerdrachelijcke lasten, ende legghen die op der menschen scouderen, maer met haren vingher en willen sij die niet roeren.

5

Maer alle hen wercken doen sij, dat sij ghesien souden worden van die menschen. Want sij verbreyden hen ghedenck cedullen, ende maken hen zoomen der cleederen groot.

6

Ende sij hebben lief dierste sitplaetsen in die auontmalen, ende dierste setelen in die synagogen,

7

ende die groetenissen op die merct, ende vanden menschen ghenoemt te worden Rabbi.

8

Maer ghy lieden en wilt niet Rabbi ghenoemt worden. Want v meester is een, ende ghy sijt alle gader broeders.

9

Ende en wilt v gheenen vader noemen op die eerde. Want een is v vader die in die hemelen is.

10

⁺Noch en wort gheen meesters ghenoemt, want een is v meester Christus,

+ B

11

Soe wie die meeste is van v lieden, die sal v lieder dienaer sijn.

12

Ende soe wie hem verheft die sal vernedert worden, ende soe wie hem vernedert die sal verheuen worden.

* + 13

Maer wee v ghi Scriben ende Phariseen hypocrijten, want ghy sluyt dat rijck der hemelen voer die menschen, want ghy en gaet daer niet inne, ende die daer inne gaen en laet ghy niet inne gaen.

14

Wee v ghy Scriben ende Phariseen hypocrijten, want ghi eet die huysen der weduwen, biddende langhe ghebeden, daer om suldi swaerder ordeel ontfanghen.

15

Wee v ghy Scriben ende Phariseen hypocrijten, want ghy gaet die zee ende die aerde al omme dat ghy

[p. *774]

eenen nieuwen Iode maken soudt, ende als die ghemaect is, soe maecti hem een kint der hellen tweemael meer dan ghy sijt.

16

Wee v ghy blinde leytsluyden die segghet. Soe wie dat sweert byden tempel, dat en is niet. Maer soe wie sweert by dat gout des tempels, die eest sculdich.

17

Ghy dwase ende blende, wat is doch meerder, tgout oft den tempel die dat gout heylich maect?

18

Ende soe wie sweert by den outaer dat en is niet, Maer soe wie sweert by die ghifte die daer op is, die is sculdich.

19

Ghy blende, wat is doch meerder, die ghifte, oft den outaer die de ghifte heylich maect?

20

⁺Daerom soe wie by den outaer sweert die sweert by dien, ende by alle tghene dat daer op is,

+ C

21

ende soe wie sweert by den tempel, die sweert by dien, ende by hem die daer in woont,

22

ende soe die by den hemel sweert, die sweert by Gods throon, ende by hem die daer op sidt.

23

Wee v ghi Scriben ende Phariseen Hypocrijten, want ghy gheeft thiende van munte, ende anijs, ende camijn, ende ghi hebt achter ghelaten dalder swaerste vander wet, als dat recht ordeel, ende die bermherticheyt ende tghelooue, dese haddi moeten doen, ende die andere niet achterlaten.

* 24

Blende leytsluyden, wt siftende een mugghe, ende eenen kemel doerswelgende.

25

Wee v ghy Scriben ende Phariseen Hypocrijten, want ghi maect suyuer dat buytenste vanden croes, ende scotele, maer van binnen sijdi vol roofs ende onsuyuerheden.

26

Ghy blende Phariseus, suyuert ierstmael dat binnenste vanden croes oft scotele, op dat het buytenste oock suyuer mach worden.

27

Wee v ghy Scriben ende Phariseen Hypocrijten, want ghy sijt ghelijck die ghewitte grauen, die van buyten den menschen schoone schijnen, maer binnen sijnse vol van der dooden beenderen, ende van alle onreynicheyt,

28

alsoe schijndi oock den menschen van buyten rechtuerdich, maer binnen sijdi vol gheueynstheyt ende boosheyt.

29

⁺Wee v ghi Scriben ende Pharijseen Hypocriten, want ghi timmert op die grauen der propheten, ende ghi verciert die grauen der rehtuerdigher,

+ D

30

ende segt. Hadden wy gheweest in die daghen onser vaderen, wy en souden haer ghesellen niet gheweest hebben in der propheten bloet.

31

Daer om sijdi v seluen tot een ghetuyghenis dat ghy kinderen sijt der gheender die die Propheten ghedoot hebben.

32

Veruult ghy oock uwer vaderen mate.

33

Ghy serpenten der aderen ghebroetsele, hoe suldi vlieden van dat ordeel der hellen?

+ 34

Daer om siet ick seynde tot v Propheten, ende wijse, ende Scriben, ende van dien suldi dooden ende cruycen, ende van dien suldi sommighe gheesselen in v synagogen, ende veruolghen van deen stadt in dander stadt,

35

op dat op v come alle dat rechtuerdich bloet datter wt ghestort is op die eerde, van dat bloet des rechtuerdighen Abels, tot dat bloet van Zacharias den sone van Barachias, den welcken ghi ghedoodt hebt tusschen den tempel ende den outaer.

36

Voerwaer ick segghe v, alle dese dinghen sullen comen op dit gheslachte,

37

Ierusalem Ierusalem die dootslaet die Propheten, ende steent die ghene die tot v ghesonden sijn, hoe dicmael heb ick v kinderen willen vergaderen, ghelijck een hinne vergadert haer kiekenen onder haer vloeghelen, ende ghi en hebbes niet ghewilt?

38

Siet v huys sal verwoest verlaten worden,

39

Want ick segghe v, ghi en sult my voerts niet meer sien tot dat ghi segghet, Ghebenedijt is hy die daer coemt inden naem des Heeren.