Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xxij. Capittel.

1

⁺ENde Iesus antwoerdende heeft hen wederom in gelijckenissen gesproken segghende.

+ A

+ 2

Het rijck der hemelen is ghelijck gheworden eenen mensch wesende een coninck, die sijnen sone een bruloft

[p. *773]

bereyt heeft.

3

Ende hy heeft sijn dienaeren ghesonden om te roepen die daer ghenoydt waren ter bruloft, ende sij en wilden niet comen,

4

Wederom heeft hy ander knechten ghesonden segghende, Segghet den ghenoodden. Siet ick heb mijnen maeltijt bereydt, mijn stieren ende ghemeste beesten sijn ghedoodt, ende alle dinghen sijn bereedt, coemt ter bruloft.

5

Maer die en hebbens niet gheacht, ende sij sijn wech ghegaen die eene in sijn lanthuys, ende die andere in sijn neringhe.

6

Maer die andere hebben sijn knechten ghenomen, ende als sij hen versmaetheden aenghedaen hadden, soe hebben sij die ghedoodt.

7

Ende doent die coninck ghehoort hadde, soe is hy gram gheworden, ende sijn heyren wt seyndende heeft hy die dootslaghers ghedoodt ende hen stadt verbrant.

8

Doen seyde hy sijnen knechten. Die bruloft is emmers bereyt, maer die ghenoodt waren en hebben dies niet waerdich gheweest,

9

daer om gaet tot die wtganghen der weghen, ende alle die ghi vint die roept ter bruloft.

10

Ende sijn knechten wtghegaen sijnde in die weghen hebben vergadert alle die sij vonden hebben, goede ende quade, ende die bruloft is vol gasten gheworden.

11

Ende die coninck is in ghecomen dat hy sien soude die gasten die daer ter tafel saten, ende hy heeft daer eenen mensch ghesien, niet ghecleedt wesende met een bruloft cleedt.

12

Ende hy seyde tot hem, ⁺Vrient, hoe sijdi hier inne comen sonder bruloft cleedt? Ende hy werde stom.

+ B

13

Doen seyde die coninck den dienaeren, Met ghebonden handen ende voeten worpt hem in die wterste duysternissen, daer sal screyinghe ende crijsselinghe der tanden sijn.

14

Want veel esser gheroepen, maer luttel wtuercoren.

* 15

+ Doen hebben die Phariseen, wechgaende, raet ghehouden, dat sij hem vanghen souden in sijn woerden.

16

Ende sij seynden tot hem haer lieder discipelen metten. Herodianen segghende, Meester wy weeten dat ghy warachtich sijt, ende den wech Gods inder waerheyt leert, ende ghy en vraecht nae niemanden, want ghy en neemt gheenen persoon der menschen wt,

17

daer om segt ons wat dunct v, eest gheorloft den cijnspenninck den Keyser te gheuen oft niet?

18

Ende Iesus kennende hen valscheyt, heeft gheseyt. Wat tempteerdi my ghi hypocrijten?

19

Toent my die munte vanden chijns penninck ende sij hebben hem voert bracht eenen Penninck.

20

Ende Iesus heeft tot hen gheseyt. Wiens is dit beelt, ende dit opscrift?

21

Sy segghen hem, Des keysers. Doen seyde hy tot hen. Daer om gheeft den keyser dat den keyser toebehoert, ende dat Gode toebehoert gheeft Gode.

* 22

Ende dit hoorende hebben sij hen verwondert, ⁺ende hem verlatende sijn sij wech ghegaen.

+ C

23

Op dien dach sijn tot hem comen die Saduceen, die segghen datter gheen verrijsenisse en is, ende sij hebben hem gheuraecht

24

segghende, Meester Moyses heeft gheseyt, Eest datter iemant ghestoruen is gheen kint hebbende, dat sijn broeder soude trouwen die huysvrouwe van dien, ende verwecken saet sijnen broedere.

25

Ende by ons waren seuen broederen, ende dierste hebbende een huysvrouwe ghenomen is ghestoruen ende gheen saet hebbende, heeft hy die huysvrouwe sijnen broedere achterghelaten.

26

Desghelijcs die tweede, ende derde totten seuensten toe.

27

Ende ten alderlaetsten, soe is die vrouwe ooc ghestoruen,

28

aldus in die verrijsenisse wiens huysvrouwe sal sij wesen van dien seuenen? Want sij hebbense alle gader ghehadt.

29

Ende Iesus antwoerdende heeft hen gheseyt, Ghy doelt, niet wetende die scriftueren, noch die cracht Godts.

30

Want in die verrijsenisse en sullen sij niet trouwen noch ghetrout worden, maer sij sijn als enghelen Gods inden hemel.

31

Ende en hebdi van die verrijsenisse der dooden niet ghelesen, datter gheseyt is van Gode tot v lieden segghende,

32

Ick ben die Godt van Abraham, ende die Godt van Isaac, ⁺ende die Godt van Iacob? Hy en is gheen Godt der dooder, maer der leuender.

+ D

33

Ende die scaren hoorende verwonderden hen in sijn leeringhe.

+ 34

Maer die Phariseen hoorende, dat hy die Saduceen hadde doen swijghen, sijn te samen ouercomen

35

ende een van haerlieden een leeraer der wet heeft hem ghevraecht, hem tempterende.

36

Meester welc is tgroot ghebodt in die wet?

37

Ende Iesus heeft hen gheseyt, Ghy sult den Heere uwen Godt liefhebben, wt v gheheel herte, ende in v gheheel ziele, ende in v gheheele verstandenisse.

38

Dat is dmeeste ende dierste ghebodt.

39

Ende het tweede is desen ghelijck. Ghy sult uwen naesten lief hebben, als v seluen.

40

In dese twee gheboden hanghet die gheheel wet, ende die Propheten.

41

Ende als die Phariseen vergadert waren, soe heeft hen Iesus ghevraecht

42

segghende, Wat dunct v van Christus? Wiens sone eest? Sij segghen tot hem Dauids.

43

Hy seyt tot hen, Hoe noemt Dauid hem dan inden gheest. Heere, segghende,

44

Die Heere heeft tot mijnen Heere gheseyt, sidt tot mijnder rechter sijden, tot dat ick v vianden stelle tot een voetbancke uwer voeten?

45

Eest dat hem Dauid dan Heere noemt. Hoe eest sijn sone?

46

Ende niemant en conste hem een woert gheantwoerden, noch niemant en heeft hem verstout van dien dach voerts hem meer te vraghen?