Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xxi. Capittel.

+ 1

⁺ENde als sij Ierusalem ghenaecten ende comen waren tot Bethphage totten berch van Oliueten, doen heeft Iesus twee discipelen ghesonden, segghende tot hen,

+ A

2

Gaet int casteel dat teghen v lieden ouer is, ende ter stont suldi vinden een ezelinne ghebonden, ende een vuelen met haer. Ontbintse ende brenchtse tot my,

3

ende eest dat v iemant iet seyt, segt dat die Heere dese van doene heeft, ende ter stont sal hy die laten gaen.

4

Ende dit is ghedaen om dat volbracht soude worden, datter gheseyt is door den Propheet seggende,

5

Segt der dochter van Sion. Siet v coninck coemt v saechtmoedich, ende sittende op een ezelinne ende op

[p. *772]

een vuelen het Ionck van een iocdraghende beeste.

6

Ende die discipelen gaende hebben ghedaen, alsoe hen Iesus gheboden hadde.

7

Ende sij hebben die ezelinne ende dat vuelen tot hem ghebracht, ende sij hebben daer op hen cleederen gheleyt, ende hebben hem daer op doen sitten.

8

Ende een seer groote scare hebben hen cleederen in den wech ghespraeyt, die andere hebben tacken vanden boomen ghehouwen, ende stroydden die inden wech,

9

ende die scaren die voere ghinghen, ende die nae volchden riepen al segghende, Hosanna den sone van Dauid, ghebenedijt sij hij, die daer coemt inden naem des Heeren, Hosanna in dalder hoochste.

* + 10

Ende als hy in Ierusalem comen was, soe is alle die stadt beroert gheworden segghende, Wie is dese?

11

Ende die luyden seyden, Dit is Iesus die Prophete van Nazareth Galilee.

12

Ende Iesus is binnen ghegaen inden tempel Godts, ende hy dreef wt alle die vercoopers ende coopers inden tempel, ende die tafelen der wisselaers, ende die setelen der duyuen vercoopers heeft hy om gheworpen,

13

ende hy seyt hen, Tes ghescreuen. Mijn huys sal een bede huys ghenoemt worden, ende ghy hebt dat een moerdenaers speluncke ghemaect.

14

Ende tot hem sijn ghecomen blinde ende crepele inden tempel, ende hy heeftse ghenesen.

15

Maer die princen der Priesteren ende die Scriben siende het wonder dat hy ghedaen hadde, ende die kinderen roepende inden tempel, ende segghende, Hosanna den sone van Dauid, sijn verbolghen gheweest,

16

ende hebben tot hem gheseyt, Hoordi wat dese segghen? ⁺Maer Iesus heeft tot hen gheseyt, Ia ic voerwaer, en hebdi noyt ghelesen, dat wten mont der onmondigher kinderen ende der suyghelinghen hebdi den lof volmaect?

+ B

17

Ende hem latende is hy buyten wter stadt ghegaen in Bethanien, ende aldaer is hy ghebleuen.

* 18

Maer des morghens nae die stadt keerende, heeft hy hongher ghehadt.

19

Ende siende eenen vigheboom omtrent den wech, is hy tot dien ghegaen, ende en heeft daer niet in gheuonden dan alleen bladeren, ende hy heeft tot dien gheseyt, Nemmermeer en wasse van v vrucht inder eewicheyt. Ende den vijchboom is terstont drooghe gheworden.

20

Ende die discipelen dit siende hebben hen verwondert segghende, Hoe is dien terstont verdroocht?

21

Ende Iesus antwoerdende, heeft hen gheseyt, Voerwaer ick segghe v, eest dat ghy ghelooue hebt, ende niet en twijfelt, soe en suldi dit niet alleen vanden vigheboom doen. maer ooc eest dat ghi desen berch segt. Neemt v op, ende worpt v in die zee, het sal ghescieden.

22

Ende al wat ghy begheert, int ghebedt gheloouende dat suldi ontfanghen.

+ 23

Ende als hy inden tempel comen was, soe sijn tot hem (daer hy was leerende) ghecomen die princen der Priesteren, ende die ouders segghende, Doer wat macht doedi dese dinghen? Ende wie heeft v dese macht ghegheuen?

24

Iesus antwoerdende heeft hen gheseyt, Ick sal v lieden oock een reden vraghen, eest dat ghy my die segghet, soe sal ick v lieden oock segghen, doer wat macht dat ick dese dinghen doe,

25

⁺Iohannes doopsel van waer was dat, vanden hemel oft vanden menschen? Ende sij dachten in hen seluen segghende,

+ C

26

Eest dat wy segghen vanden hemel, soe sal hy ons segghen, Waerom en hebdi dan hem niet ghelooft? Maer eest dat wy segghen vanden menschen, soe vreesen wy die scare, want sij houden Iohannem allegader als eenen Propheet.

27

Ende sij antwoerdende Iesu hebben gheseyt, Wy en weetens niet. Ende hy heeft hen oock gheseyt, Noch ick en segghe v lieden oock niet doer wat macht dat ick dese dinghen doe.

* 28

Maer wat dunct v lieden? + Een man hadde twee sonen, ende gaende totten iersten heeft hy gheseyt, Sone gaet heden wech ende werct in mijnen wijngaert.

29

Ende die antwoerdende heeft gheseyt, Ic en wils niet doen. Ende namaels doer berouwe beweecht sijnde, is hy daer henen ghegaen.

30

Ende gaende totten anderen heeft hy des ghelijcs ghedaen. Ende die antwoerdende heeft gheseyt, Ick gae Heere, Ende hy en heefter niet ghegaen,

31

wie vanden tween heeft des vaders wille ghedaen? Sij segghen hem dierste, Iesus seyde hen, Voerwaer ick segghe v lieden, dat die Publicanen ende ghemeyn vrouwen gaen voer v lieden int rijcke Godts.

32

Want Iohannes is tot v lieden comen in den wech der rechtuaerdicheyt, ende ghy en hebt hem niet ghelooft, maer die publicanen, ende die ghemeyn vrouwen hebben hem ghelooft, maer ghy dat siende, en hebt namaels gheen berou ghehadt dat ghy hem gheloouen soudt.

* 33

Hoort noch een ander ghelijckenisse. + Daer was een mensch een vader des huysghesins die eenen wijngaert gheplant hadde, ende hy heefter eenen thuyn ommegheleydt, ende een persse in ghegrauen, ende eenen torre op ghericht, ende hy heeft dien den lantlieden verhuert, ende hy is buytens lants ghereyst.

34

Ende als den tijt der vruchten aenghecomen was, soe heeft hy sijn knechten ghesonden tot die lant lieden, dat sij die vruchten van dien ontfanghen souden.

35

Ende die lantlieden sijn knechten gripende, ⁺hebben den eenen gheslaghen, den anderen ghedoot, maer den anderen hebben sij ghesteent.

+ D

36

Weder om heeft hy ander knechten ghesonden, meer in ghetale dan dierste waren, ende sij hebben dien desghelijcs ghedaen.

37

Maer ten laetsten heeft hy tot hen sijnen sone ghesonden, segghende, Sij sullen mijnen sone ontsien.

38

Ende die lantluyden den sone siende, hebben gheseyt onder hen. Dit is die erfghename, coemt ende laet ons hem dooden, ende wy sullen sijn erffenisse hebben.

39

Ende dien aengripende hebben sij hem wtgheworpen buyten den wijngaert, ende ghedoot.

40

Hier om als die heere des wijngaerts sal ghecomen sijn, wat sal hy dien lantlieden doen?

41

Ende sij segghen hem, Die quade sal hy qualijck verdoen, ende sijnen wijngaert sal hy anderen lantluyden verhueren, die hem vruchten sullen betalen te sijnen tijden.

42

Iesus seyt tot hen, En hebdi noyt ghelesen in die scriftueren. Dien steen den welcken die timmerlieden verworpen hebben, es gheworden tot dat hooft van eenen hoecke. Vanden Heere is dit gheseyt, ende tes wonderlijck in onsen ooghen?

43

Daer om segghe ick v lieden, het rijck Godts sal van v ghenomen worden, ende tsal ghegeuen worden den heydenschen volcke sijn vrucht voertbrenghende.

44

Ende soe wie op desen steen valt die sal ghebroken worden. Maer op den welcken hy valt, dien sal hy al te male in cleyne stucken breken.

45

Ende doen die princen der Priesteren ende Phariseen ghehoort hadden sijn ghelijckenisse, soe hebben sij verstaen, dat hy van haerlieden seyde.

46

Ende soeckende hem te vanghen hebben sij die scaren ghevreest. Want sij hielen hem als eenen Propheet.