Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺ENde alst morghenstont gheworden was, soo hebben alle die princen der priesteren, ende die ouders des volcs eenen raet ghehouden teghen Iesum, dat sij hem souden ter doot leueren,

+ A

2

Ende si hebben hem ghebonden ghebracht, ende gheleuert Pontio Pilato den president,

3

Doen siende Iudas die hem verraden hadde dat hy verwesen was, door berouw beweecht sijnde heeft die dertich silueren penninghen wederom ghebracht tot die princen der priesteren ende die ouders des volcs

4

segghende. Ick heb ghesondicht verradende dat onnoosel bloet, Maer sij hebben gheseyt. Wat leyt ons daer aen? Siet ghy toe,

5

Ende die silueren penninghen inden tempel wech worpende is hy van daer ghegaen, ende wechgaende heeft hy sij seluen met eenen strick verhanghen,

6

Ende die princen der priesteren nemende die silueren penninghen hebben gheseyt. Ten is niet gheorlooft die te worpen in die offerkiste want tis bloet gelt,

7

Ende hebbende raet ghenomen hebben sij daer mede ghecocht eens potbackers acker tot een begrauinghe der pelgrims,

8

Daerom soo is dien acker ghenoemt Hacel-dama, dat is eenen acker des bloets tot opden dach van heden toe,

9

⁺Doen was volbracht datter gheseyt is door Ieremiam den propheet segghende. Ende sij hebben ghenomen dertich silueren penninghen, die weerde vanden ghenen die daer mede vercocht was den welcken sij ghecocht hebben van die kinderen van Israhel,

+ B

10

Ende sij hebben die ghegheuen tot des potbackers acker, alsoo nu die Heere ghestelt heeft,

11

Ende Iesus heeft ghestaen voor den president, ende die president heeft hem gheuraecht segghende. Sijt ghy die coninck der Ioden? Iesus seyt hem. Ghy segghet,

12

Ende doen hi besculdicht worde van die princen der priesteren ende ouders, soo en heeft hy niet gheantwoort,

13

Doen seyde hem Pilatus. En hoordi niet hoe veel ghetuyghenisse dat sij teghen v segghen?

14

Ende hy en heeft hem niet gheantwoort op eenich woort, alsoo dat die president

[p. *778]

hem seer verwonderde,

15

Ende inden hooghen feestdach soo plach die president den volcke vrij te laten eenen gheuanghenen, den welcken sij wilden,

16

Ende hy hadde doen eenen vermaerden gheuanghen die Barabbas ghenaemt was,

17

Daerom als sij vergadert waren, soo heeft Pilatus gheseydt. Welcken wildy dat ick v vrij laet gaen Barabbam oft Iesum die ghenaemt is Christus?

18

Want hy wist wel dat sij hem door nijdicheyt gheleuert hadden,

19

⁺Ende als hy sadt inden rechter stoel, soo heeft sijn huysvrouwe aen hem ghesonden segghende. En hebt doch niet te doene met dien rechtuerdighen want ick heb heden veel gheleden door een visioen om sijnen wille,

+ C

20

Maer die princen der priesteren ende die ouders hebben die luyden onderwesen dat sij Barabban souden begheren, maer Iesum dooden,

21

Ende die president antwoordende heeft hen gheseyt. Den welcken wildi vanden tween dat v vrij ghelaten worde? Ende sij hebben gheseydt Barabban,

22

Ende Pilatus seyt hen. Wat sal ic dan doen van Iesu die Christus ghenaemt wort? Sij segghen alleghader. Laet hem ghecruyst worden

23

Die president heeft hen geseyt. Maer wat quaet heeft hy ghedaen? Ende sij riepen noch meer segghende. Laet hem ghecruyst worden,

24

Ende Pilatus siende dat hy niet en vorderde maer dattet meerder oploop worde, so heeft hy water ghenomen ende sijn handen voor tvolc ghewasschen seggende. Ic ben ontsculdich des bloets van desen rechtuerdighen, siet ghi lieden toe,

25

Ende alle dat tvolck antwoordende heeft gheseyt. Sijn bloet sij op ons ende op onse kinderen,

26

Doen heeft hy hen Barabban laten vrij gaen, Ende Iesum heeft hy hen ghegheeselt gheleuert dat hy soude gecruyst worden,

27

⁺Doen hebben die ruyters des presidents Iesum int recht huys nemende tot hem verghadert den gheheelen hoop

+ D

28

ende ontcleedende hebben sij hem eenen purpuren mantel omghehanghen,

29

ende vlechtende een croone van dornen hebben sij die op sijn hooft ghestelt, ende een riet in sijn rechter hant, Ende met gheboochde knien voor hem hebben sij hem bespot segghende. Weest ghegroet coninck der Ioden,

30

Ende wtspouwende op hem, hebben si een riet ghenomen ende sloeghen op sijn hooft,

31

Ende nae dat sij hem bespot hadden, soo hebben sij hem den mantel afghenomen, ende hem ghecleedt met sijnen cleederen ende sij hebben hem gheleydt dat sij hem cruycen souden,

32

Ende wtgaende hebben si eenen Cyreneusschen mensche gheuonden Simon ghenaemt, desen hebben sij ghedwonghen dat hy sijn cruys draghen soude,

33

Ende sij sijn ghecomen ter plaetsen die ghenaemt is Golgatha, welck is die plaetse van Caluarien,

34

Ende sij hebben hem wijn te drincken ghegheuen met gallen ghemenghet, Ende als hijt ghesmaect hadde, soo en wilde hijt niet drincken,

35

Ende nae dat sij hem ghecruyst hadden, soo hebben sij sijn cleederen ghedeelt het lot worpende, om dat volbracht soude worden datter gheseyt is door den propheet segghende. Sij hebben voor hen mijn cleederen ghedeelt, ende op mijn cleedt hebben sij dlot gheworpen,

36

⁺Ende sittende hebben sij hem bewaert

+ E

37

Ende sij hebben op sijn hooft ghestelt sijn sake ghescreuen. Dit is Iesus die coninc der Ioden,

38

Doen sijnder met hem ghecruyst twee moordenaren, die een ter rechter sijden, ende dander ter slincker sijden,

39

Ende die voorby ghinghen blasphemeerden hem scuddende hen hoofden ende segghende.

40

Tfij v die den tempel Godts verderft ende binnen drij daghen dien wederom optimmert verlost v seluen, eest dat ghy Gods sone sijt, so coemt af vanden cruyce,

41

Desghelijcs ooc die princen der priesteren hem bespottende metten scriben ende ouders seyden.

42

Ander menschen heeft hy ghesont ghemaect, sij seluen en can hy niet verlossen, eest dat hy coninc van Israel is come nv af vanden cruyce, ende wi gheloouen hem.

43

Hy heeft in God betrout die verlosse hem nv eest dat hy wilt, want hi heeft gheseyt. Ic ben die sone Gods

44

Ende het selue hebben die moordenaers die met hem ghecruyst waren, hem oock verweten,

45

Ende van die seste vre sijnder duysternissen gheworden ouer alle dat eertrijck tot die neghenste vre,

46

Ende omtrent die neghenste vre heeft Iesus gheroepen met een groote stemme seggende. Eli Eli lamma sabacthani? Dat is, mijn Godt, mijn Godt, waerom hebdi my verlaten?

47

Ende die sommighe daer staende, ende hoorende seyden. Dese roept Eliam,

48

Ende ter stont een van dien loopende heeft een spongie ghenomen ende die gheuult met edic, ⁺ende ghesteken op een riet, ende gaf hem te drincken

+ F

49

Maer die andere seyden. Ontbeyt, laet ons besien oft Elias comen sal hem verlossende,

50

Ende Iesus wederom roepende met een groote stemme heeft sijnen gheest ghegheuen,

51

Ende siet het voorhancsel des tempels is ghescoert in twee stucken van bouen tot beneden toe ende die aerde heeft ghebeeft, ende die steenen sijn ghescoert,

52

ende die grauen sijn open ghegaen, ende veel lichamen der heylighen die ontslapen gheweest hadden sijn opghestaen,

53

Ende gaende wt die grauen nae sijn verrijsenisse sijn sij ghecomen in die heylighe stadt, ende hebben hen vele menschen gheopenbaert,

54

Maer als die honderste man ende die met hem waren Iesum bewarende ghesien hadden die eertbeuinghen ende tghene dat daer ghesciede, so hebben sij seer gheureest segghende. Voorwaer dese was die sone Gods,

55

Ende daer waren vele vrouwen van verre die Iesum gheuolcht waren van Galileen, hem dienende,

56

onder die welcke was Maria Magdalene, ende Maria Iacobi, ende Iosephs moeder, ende die moeder van Zebedeus kinderen,

57

Ende alst auont gheworden was, soo isser een rijck man ghecomen van Arimathea Ioseph ghenoemt, die welcke selue ooc was Iesus discipel,

58

dese is tot by Pilatum ghegaen ende heeft Iesus lichaem begheert. Doen heeft Pilatus gheboden datmen lichaem wederom gheuen soude,

59

⁺Ende als Ioseph dlichaem ontfanghen hadde, so heeft hy dat in een suyuer lijnen cleedt ghewonden,

+ G

60

ende dat gheleydt in sijn nieu graf dat hi wtghehouwen hadde in een steenrootse, Ende hy heeft eenen grooten steen aen ghewentelt voor die doere des graefs, ende is wech ghegaen,

61

Ende Maria Magdalene was daer ende die ander Maria sittende teghen ouer dat graf,

62

Maer des anderen daechs welck is nae den parasceues dach sijn die princen der priesteren ende Phariseen tsamen ghecomen tot Pilatum

63

segghende. Heere wij sijn ghedachtich gheworden, dat die verleyder gheseyt heeft noch leuende. Nae drij daghen sal ick weder opstaen

64

Daerom ghebiedt datmen tgraf beware tot opden derden dach, dat by auontueren sijn discipelen niet en comen ende hem stelen, ende segghen den volcke. Hy is van der doot opghestaen, Ende die laetste dwalinghe sal argher wesen dan dierste,

65

Ende Pilatus heeft tot hen gheseyt. Ghy hebt bewaringhe, gaet henen bewaert dat alsoo ghy condt,

66

Ende sij wechgaende hebben dat graf bewaert metten wachters seghelende den steen.