Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xviij. Capittel.

+ 1

⁺IN die vre sijn die discipelen tot Iesum ghecomen segghende, Wie meyndi dat die meeste is int rijck der hemelen?

+ A

2

Ende Iesus tot hem roepende een cleyn kindeken heeft dat ghestelt int midden van hen, ende hy heeft gheseyt.

3

Voerwaer ic segghe v, ten sij dat ghy bekeert wort, ende wort als cleyn kinderen, soe en suldi int rijck der hemelen niet comen.

4

Daer om soe wie hem verootmoedicht ghelijck dit cleyne kindeken, die is die meeste int rijck der hemelen.

5

Ende soe wie een sulck cleyn kindeken ontfanct in mijnen naem die ontfanct my,

6

maer soe wie een van desen cleynen, die in my gheloouen verarghet, Het waer hem orbaerlijck dat eenen molensteen aen sijnen

[p. *770]

hals ghehanghen worde, ende dat hy verdroncken worde in die diepte der zee.

7

Wee der werelt van die verarghernissen. Want het is van noode datter verarghernisse comen. Maer nochtans wee dien mensch doer den welcken die verarghernisse coemt.

8

Maer eest dat v hant oft uwen voet v verarghert, soe snydt dien af ende worpten van v, tes v beter int leuen te gaen cranck oft crepel, dan twee handen ende twee voeten hebbende gheworpen te worden int eewich vier.

9

Ende eest dat v ooghe v verarghert, soe trectse wt, ende worpse van v, tes v beter een ooghe hebbende int leuen te gaen, dan twee ooghen hebbende, gheworpen te worden in die helle des viers.

10

Siet dat ghi niet en versmaet een van desen cleynen. Want ick segghe v, dat hen enghelen in die hemelen altijt sien daenschijn mijns vaders die in die hemelen is.

* 11

Want die sone des menschen is ghecomen salich te maken tghene datter verloren was.

12

Wat dunct v lieden? eest dat iemant hondert scapen heeft, ende datter een van dien verdoelt is, en laet hy niet die neghen ende neghentich op die berghen, ende gaet soecken tghene datter verdoelt is?

13

ende eest dat ghebuert dat hijt vint, voerwaer ick segghe v, dat hy daer af hem meer verblijdt, dan van die neghen ende neghentich die niet ghedoelt en hebben.

14

Alsoe en eest ooc den wille niet voor uwen vader die in die hemelen is, datter een van desen cleynen sal verloren gaen.

+ 15

⁺Maer eest dat v broeder teghen v sondicht, soe gaet ende straft hem tusschen v ende hem alleen, eest dat hy v hoort, soe suldi uwen broeder ghewonnen hebben,

+ B

16

Maer eest dat hy v niet en hoort, soe neemt met v noch eenen oft twee, op dat inden mont van twee oft drij ghetuyghen, mach alle woert staen.

17

Maer eest dat hy die niet en hoort, soe segghet der kerken, maer eest dat hy die kercke niet en hoort, soe laet hem v wesen als een heydene ende een publicaen.

18

Voerwaer ick segghe v, al wat ghy bindt op die eerde, dat sal ghebonden sijn oock inden hemel, ende al wat ghi ontbindet opder aerden, dat sal ontbonden sijn oock inden hemel.

19

Wederom segghe ick v lieden dat, eest sake datter twee van v lieden ouer een comen opder eerden. Van alle dinck wat sij begheren sal hen ghescieden van mijnen vader die in die hemelen is.

20

Want waerder erghens twee oft drij vergadert sijn in mijnen naem, daer ben ick int midden van hen.

21

Doen heeft Petrus tot hem comende gheseyt, Heere hoe dicmael sal mijn broeder in my sondighen, ende dat ict hem vergheuen sal? tot seuenmael?

22

Ende Iesus heeft hem gheseyt, Ick en segghe v niet tot seuenmael, maer tot tseuentich werf seuenmael.

* + 23

Daer om is trijck der hemelen ghelijc eenen mensch wesende coninck, die rekeninghe houden wilde met sijnen knechten.

24

Ende doen hy begonste te rekenen, soe is hem een voerghebracht die hem sculdich was thien duysent ponden.

25

Ende doen hy niet en hadde daer af dat hijt betalen mochte, soe heeft die heere gheboden dat men hem vercoopen soude, ende sijn huysvrouwe ende kinderen, ⁺ende alle dat hy hadde ende betalinghe doen.

+ D

26

Maer die knecht nederuallende heeft hem ghebeden seggende, Hebt patiencie met my ende ick salt v al betalen.

27

Ende die heere ontfermende dies knechts heeft hem laten gaen, ende die scult heeft hy hem quijt ghescouden.

28

Ende die selue knecht wtghegaen sijnde heeft gheuonden een van sijnen mede knechten die hem sculdich was hondert penninghen, ende houdende heeft hy hem gheworcht segghende, Betaelt dat ghy sculdicht sijt.

29

Ende sijn medeknecht nederuallende badt hem segghende, Hebt patientie met my, ende ick salt v al betalen.

30

Maer hy en wildet niet, maer hy is wech ghegaen, ende heeft hem in den kerker gheworpen tot dat hy die scult betalen soude.

31

Maer sijn mede knechten siende datter ghesciedde, sijn seer bedroeft gheweest, ende sij sijn ghecomen ende hebben haren heere vertelt al datter ghesciet was.

32

Doen heeft hem sijn heere gheroepen, ende hem gheseyt. Ghy boose knecht, alle v scult heb ic v quijt ghescouden om dat ghy my ghebeden hebt,

33

en moeste ghy daer om oock ws mede knechts niet ontfermen, ghelijck ick ws ontfermt hebbe?

34

Ende sijn heere gram wesende heeft hem den pijnighers gheleuert, tot dat betalen soude alle die scult.

35

Alsoe sal oock mijn hemelsche vader v lieden doen, eest dat ghy een ieghelijck sijnen broeder niet en vergheeft van uwen herten.