Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xvij. Capittel.

+ 1

⁺ENde nae ses daghen soe neemt hy tot hem Petrum ende Iacobum ende Iohannem sijnen broedere, ende hy leytse op eenen hooghen berch besijden,

+ A

2

ende hy is in een ander ghedaente verandert gheweest voer hen. Ende sijn aensicht heeft claer ghescenen als die sonne, ende sijn cleederen sijn wit gheworden ghelijck sneu.

3

Ende siet hen hebben gheopenbaert Moyses ende Elias met hem sprekende.

4

Ende Petrus antwoerdende heeft tot Iesum gheseyt. Heere het is ons goet hier te sijn, eest dat ghy wilt, soe laet ons hier maken drij tabernakelen V een, Moysi een, ende Elie een.

5

Doen hy noch sprack, siet soe heeft een claer wolcke hen ouer lommert. Ende siet een stemme vander wolcken segghende. Dit is mijn beminde sone inden welcken ic my wel behaecht hebbe, hoort hem.

6

Ende die discipelen dit hoorende sijn op hen aensicht gheuallen, ende hebben seer ghevreest.

7

Ende Iesus is by hen comen, ende heeftse gheraect ende hen gheseyt, Staet op, ende en wilt niet vreesen.

8

⁺Ende opheffende hen ooghen en hebben sij niemanden ghesien dan alleen Iesum.

+ B

9

Ende als sij vanden berch neder ghinghen, soe heeft hen Iesus beuolen segghende, Niemanden en segt dit visioen tot dat die sone des menschen van die dooden opstae.

* 10

Ende die discipelen hebben hem gheuraecht segghende, Wat eest dan dat die Scriben segghen dat Elias ierst mael comen moet?

11

Ende hy antwoerdende heeft hen gheseyt, Elias sal sekerlijck comen ende alle dinghen weder te recht brenghen,

12

maer ick segghe v lieden dat Elias nu comen is, ende sij en hebben hem niet ghekent, maer sij hebben in hem ghedaen alle dat sij ghewilt hebben. Ende alsoe sal die sone des menschen van hen lijden.

13

Doen hebben die discipelen verstaen dat hy hem van Iohannes den dooper gheseyt hadde.

14

Ende doen hy by die scare ghecomen was, soe is tot hem comen een mensch op sijn knyen voor hem nedergheuallen, segghende, Heere ontfermt v mijns soens, want hy is maensuchtich, ende is qualijck te passe, want dicmael valt hy int vier, ende dicmael int water,

15

ende ic hebben voer v discipelen ghebracht, ⁺ende sij en hebben hem niet connen ghenesen,

+ C

16

Iesus antwoerdende heeft gheseyt, O ghy ongheloouich ende verkeert gheslachte, hoe langhe sal ick met v lieden wesen? Hoe langhe sal ick v lijden? Brengt hem her waerts tot my.

17

Ende Iesus heeft dien ghestraft, ende die duyuel is daer wtghegaen ende tkint is ghenesen gheweest van dier vren,

18

Doen sijn die discipelen secretelijck ghecomen tot Iesum ende hebben gheseyt, Waer om en hebben wy dien niet connen wtworpen?

19

Iesus heeft hen gheseyt, Om uwer ongheloouicheyt wille. Want voerwaer ick segghe v lieden, eest dat ghi ghelooue hebt als een mostaerts saet, soe suldi segghen tot desen berch, gaet van hier ouer derwaerts ende hy sal daer ouergaen, ende niet en sal v onmoghelijck sijn.

20

Maer desen aert en wort niet wt gheworpen dan doer bidden ende vasten.

21

Ende doen sij verkeerden in Galileen, soe heeft Iesus tot hen gheseyt. Die sone des menschen sal gheleuert worden in die handen der menschen,

22

ende sij sullen hem dooden, ende ten derden daghe sal hy verrijsen. ⁺Ende sij sijn seer bedroeft gheworden.

+ D

+ 23

Ende doen sij te Capharnaum ghecomen waren, soe quamen tot Petrum die den tolpenninck ontfinghen ende sij hebben tot hem gheseyt, V meester en betaelt hy den tolpenninck niet?

24

Hy seyde, Iae hy. Ende doen hy in huys ghecomen was, soe voerquam hem Iesus segghende, Wat dunct v Simon? Die coninghen der aerden van wien nemen sij tribuyt oft chijns? Van haren kinderen oft van die vreemde.

25

Ende hy seyde, Van die vreemde, Iesus seyde tot hem. Soe sijn die kinderen dan vrij.

26

Maer op dat wy hen niet en verargheren, gaet henen ter zee ende worpt eenen henghel wt, ende den visch die ten iersten op coemt, dien neemt, ende sijnen mont openghedaen hebbende suldi eenen stater penninck vinden, dien nemende gheeft hen lieden voor my ende v.