Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

+ 1

⁺ENde die Phariseen ende Saduceen sijn tot hem ghecomen tempterende. Ende sy hebben hem ghebeden dat hy hen een teeken vanden hemel toonen soude.

+ A

2

Maer hy antwoerdende heeft hen gheseyt, Alst auont worden is soe segdi. Tsal claer weder sijn, want den hemel is root.

3

Ende des smorghens. Heden salt tempeest sijn, want den droeuighen hemel is root schijnende. Aldus weet ghy die ghedaente des hemels te onderkennen, ende en condi die teekenen der tijden niet onderkennen?

4

Dit quaet ende ouerspelich gheslachte begheert een teeken, ende hem en sal gheen teeken gegheuen worden, dan het teeken van Ionas den Prophete, ende als hy die verlaten hadde, soe is hy wech ghegaen.

5

Ende doen sijn discipelen ghecomen waren ouer die zee, soe hebben sij vergheten brooden te nemen.

6

Die welcke heeft hen gheseyt, Siet aen, ende wacht v voer den heue der Phariseen ende Sadduceen.

7

⁺Ende sij dachten in hen seluen segghende. Wy en hebben gheen brooden ghenomen.

+ B

8

Ende Iesus dit wetende heeft gheseyt. Wat dencti onder v lieden ghy van cleynen ghelooue dat ghy gheen brooden en hebt?

9

En verstadi noch niet, noch en sijdi niet ghedachtich der vijf brooden onder die vijf duysent menschen, ende hoe veel coruen dat ghy opnaemt?

10

noch der seuen brooden onder die vier duysent menschen, ende hoe veel manden dat ghi opnaemt?

11

Waer om en verstaedi niet ick v vanden broode niet gheseyt en hebbe. Wacht v vanden heue der Phariseen ende Sadduceen?

* 12

Doen hebben sij verstaen dat hy niet gheseyt en hadde datmen wachten moet vanden heue der brooden, maer van die leeringhe der Phariseen ende Sadduceen.

+ 13

Ende Iesus is comen in die palen van Cesarien Philippi, ende hy vraechde sijn discipelen segghende, Wien segghen die menschen te sijn den sone des menschen?

14

Ende sij hebben gheseyt, Die sommighe Iohannem den dooper, die ander Eliam, maer die an-

[p. *769]

dere Ieremiam, oft een vanden Propheten.

15

Ende Iesus seyt to hen. Maer wie segt ghi my te wesen?

16

Simon Petrus antwoerdende heeft gheseyt, Ghy sijt Christus die sone des leuende Gods.

17

Ende Iesus antwoerdende heeft hem gheseyt, Salich sijdi Simon Bariona, want vleesch ende bloet en heuet v niet gheopenbaert, maer mijn vader die in die hemelen is.

18

Ende ic segghe v dat ghy Petrus sijt, ende op desen steen sal ick timmeren mijn kercke, ende die poorten der hellen en sullen tseghen haer niet verwinnen.

19

Ende v sal ick gheuen die slotelen van dat rijck der hemelen. Ende al wat ghi bindt op die eerde, sal oock ghebonden sijn in die hemelen. Ende al wat ghi ontbint op die eerde, dat sal ontbonden sijn ooc in die hemelen.

* 20

Doen heeft hy sijnen discipelen gheboden dat sij niemanden segghen en souden dat hy Iesus Christus was.

21

Van doen begonste Iesus sijnen discipelen te toonen, dat hy soude moeten gaen te Ierusalem, ende veel lijden vanden ouders ende Scriben ende princen der Priesteren ende ghedoot worden, ende ten derden daghe verrijsen.

22

⁺Ende Petrus hem te hemwaerts nemende heeft hem begonst te straffen segghende. Verre sij dat van v Heere, dat en sal v niet ghescieden.

+ D

23

Die welcke hem ommekeerende heeft Petro gheseyt. Gaet achter my sathana, ghi sijt mij tot verarghenisse. Want ghi en smaect niet dat goddelijck is, maer dat menschelijck.

24

Doen seyde Iesus tot sijnen discipelen. + Isser iemant die na my comen wilt, die verloochene sij seluen, ende neem sijn cruys, ende volghe my nae.

25

Want soe wie sijn ziele wilt behouden die salse verliesen, maer die sijn ziele om mijnen wille verliest dat salse vinden.

26

Want wat batet den mensche eest dat hy alle die werelt wint, maer sijn der zielen verlies lijdet? Oft wat manghelinghe sal een mensch gheuen voor sijn ziele?

27

Want die sone des menschen sal comen in die glorie sijns vaders met sijnen enghelen, ende dan sal hy eenen ieghelijcken weder gheuen nae sijn wercken.

28

Voerwaer ick segghe v lieden, daer esser sommighe vanden ghenen die hier staen, die die doot niet smaken en sullen tot dat sij sien sullen den sone des menschen comende in sijn rijck.