Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xv. Capittel.

[p. *768]

1

⁺DOen sijn tot hem comen van Ierusalem die Scriben ende Phariseen seggende,

+ A

2

waer om ouertreden v discipelen die insettinghe der ouders? want sij en wasschen hen handen niet als sij broot eten.

3

Ende hy antwoerdende heeft tot hen gheseyt. Waer om ouertreedt ghi Gods gebot om uwe insettinghe? Want God heeft gheseyt.

4

Eert vader ende moeder, ende soe wie vader oft moeder vermalendijt die sterue die doot.

5

Maer ghy lieden segghet, Soe wie vader oft moeder seyt. Soe wat gaue van my coemt dat sal v baten,

6

ende hi en sal sijnen vader ende sijn moeder niet eeren, ende ghy hebt te niet ghedaen het ghebodt Godts om uwe insettinghe.

7

Ghy ypocrijten wel heeft van v ghepropheteert Isaias die Propheet segghende,

8

Dit volck eert my metten lippen, maer hen herte is verre van my.

9

Maer sonder sake dienen sij my leerende die leeringhen ende gheboden der menschen.

10

Ende als hy die scaren tot hem gheroepen hadde, soe heeft hy hen gheseyt, Hoort ende verstaet.

11

Dat inden mont gaet en besmet den mensche niet, maer dat wten mont coemt dat besmet den mensche.

12

Doen hebben sijn discipelen tot hem comende, hem gheseyt, Weet ghy wel dat die Phariseen dit woert ghehoort hebbende verarghert sijn gheweest?

13

Ende hy antwoerdende heeft gheseyt, Alle plantinghe die mijn hemelsche vader niet gheplant en heeft, sal wtgheroyt worden.

14

Laetse gheworden, sij sijn blent, der blinden leytsmannen. Maer eest dat een blinde eenen blinden leyt, soe vallen sy beyde in die grachte.

15

⁺Ende Petrus antwoerdende heeft tot hem gheseyt, Verclaert ons dese parabele.

+ B

16

Ende hy heeft gheseyt, Sijt ghy lieden noch sonder verstant?

17

En verstaedi niet, dat alle dat inden mont coemt, inden buyck gaet, ende doer den natuerlijcken wtganc wt gheworpen wort?

18

Maer die dinghen die wten mont gaen, die comen wter herten, ende die besmetten den mensch.

19

Want wter herten comen die quade ghedachten, dootslaghen, ouerspelen, oncuyscheden, dieuerien, valsche ghetuyghenissen, Gods lasteringhen.

20

Dit sijn die dinghen die den mensch besmetten. Maer met onghewasschen handen eten en besmet den mensch niet.

* + 21

Ende Iesus van daer wtghegaen sijnde is wten weghe ghegaen in die palen van Tyrus ende Sydon.

22

Ende siet een Chananeussche vrouwe van dien palen wt ghegaen sijnde heeft gheroepen segghende hem, Ontfermt v mijnder heere Dauids sone, mijn dochter wort qualijck ghequelt vanden duyuel.

23

Die welcke en heeft haer niet een woert gheantwoert. Ende sijn discipelen tot hem comende baden hem segghende, Laetse gaen, want sij roept ons nae.

24

Ende hy antwoerdende heeft gheseyt, Ick en ben niet ghesonden dan tot die verloren scapen des huys van Israel.

25

Maer sij is comen, ende heeft hem aenghebeden segghende, ⁺Heere helpt my.

+ C

26

Die welcke antwoerdende heeft gheseyt. Ten is niet goet te nemen der kinderen broot, ende worpen dat den honden.

27

Maer sij heeft gheseyt, Tes emmer Heere, want die hondekens eten oock van die broxkens die van haerder heeren tafel vallen.

28

Doen heeft Iesus antwoerdende haer gheseyt, O vrouwe groot is v ghelooue, v ghesciede ghelijck ghy wilt. Ende haer dochter is ghenesen van dier vren.

* 29

Ende doen Iesus van daer doerghegaen was, soe is hy ghecomen omtrent die zee van Galileen, ende climmende op eenen berch heeft hy daer gheseten.

30

Ende veel scaren quamen tot hem, hebbende met hen stomme, blinde, crepele, crancke ende veel andere, ende sij hebben die gheworpen aen sijn voeten, ende hy heeftse ghenesen,

31

alsoe dat die scaren hen verwonderden, siende die stomme sprekende, die crepele wandelende, die blinde siende, ende sij loofden grootelijck den Godt van Israel.

32

⁺Ende Iesus sijn discipelen tsamen gheroepen hebbende heeft gheseyt, My ontfermt der scaren, Want sij nu drij daghen by my ghestadelijck blijuen, ende sij en hebben niet dat sij eten moghen, ende ick en wilse niet vastende laten gaen, dat sij onder weghen niet flau en worden.

+ D

33

Ende die discipelen segghen hem, Van waer sullen wy dan soe veel brooden moghen hebben in die woestijne, dat wy soe groote menichte mochten versaden?

34

Ende Iesus seyde tot hen. Hoe veel brooden hebdi? Ende sij antwoerden, Seuen, ende een luttel vischkens.

35

Ende hy heeft der scaren gheboden dat sij souden neder sitten op die aerde.

36

Ende nemende die seuen brooden ende visschen, ende danckende heeft hy die ghebroken ende sijnen discipelen ghegheuen, ende die discipelen hebbent den volcke ghegheuen.

37

Ende sij hebben alle gheten ende sijn versaet gheworden. Ende van datter gheouert was vanden brockelinghen hebben sij opghenomen seuen volle manden.

38

Ende die daer gheten hadden waren vier duysent menschen, sonder die vrouwen ende cleyn kinderen.

39

Ende als hy die scare ghelaten hadde, soe is hy in een sceepken opghegaen ende is ghecomen in die palen van Magedan.