Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺IN dien tijde heeft Herodes, een vanden vier vorsten, ghehoort die fame van Iesus,

+ A

2

ende hy seyde sijnen knechten. Dit is Iohannes die doopere, hy is van die dooden opghestaen, ende daer om wercken die crachten doer hem.

3

Want Herodes heeft Iohannem gheuanghen ende hem ghebonden, ende ghestelt inden kerker, om Herodias wille sijns broeders huysvrouwe.

4

Want Iohannes seyde hem, Ten is v niet gheorloft die te hebben.

5

Ende willende hem dooden heeft hy tvolck ghevreest, want sij hadden hem als eenen Propheet.

6

Ende op den dach van Herodes gheboorte, soe heeft Herodias dochter ghedanst int midden, ende theeft Herodi behaecht.

7

Waer om dat hy met eenen eede haer beloeft heeft te gheuen wat sij van hem begheren soude.

8

Ende te voren vermaent wesende van haer moeder. Gheeft my (seyt sij) hier in een scotel thooft van Iohannes den doopere.

9

Ende die coninck is bedroeft gheweest, maer om den eedt, ende om die ghene die tsamen ter tafelen saten, soe heeft hy gheboden datment gheuen soude.

10

Ende hy heeft ghesonden ende Iohannem onthooft inden kerker,

11

ende sijn hooft is ghebracht in een scotele, ende is der Iongher dochter ghegheuen, ende sij heeft dat haerder moeder ghedraghen.

12

Ende sijn discipelen daer comende hebben dlichaem ghehaelt ende dat begrauen, ende comende hebben sij Iesu dat ghebootscapt.

13

Dwelc als Iesus ghehoort hadde, soe is hy van daer gheweken in een sceepken, tot een woeste plaetse wten weghe. Ende alst die scaren ghehoort hadden, soe sijn sij hem te voete gheuolcht van die steden.

14

Ende wtcomende heeft hy die groote scare ghesien, ende hy heeft haerder ontfermt, ende hen ziecken ghenesen.

15

Ende alst auont gheworden was, soe sijn zijn discipelen tot hem ghecomen segghende, Die plaetse is woest ende die vre is nu ouerleden. Laet die scaren gaen, dat sij gaende tot die casteelen moghen spijse voer hen seluen coopen.

16

⁺Maer Iesus seyde hen. Ten is hen gheen noot te gaen, gheeft hen ghy teten,

+ B

17

Sy hebben hem gheantwoert, wy en hebben hier maer vijf brooden ende twee visschen.

18

Die welcke heeft hen gheseyt, Haelt my die herwaerts.

19

Ende als hy der scaren gheboden hadde te sitten opt hoy, ghenomen hebbende die vijf brooden ende twee visschen, siende ten hemelwaerts heeft hy die ghebenedijt, ende ghebroken, ende heeft sijnen discipelen die brooden ghegheuen, ende die discipelen der scaren.

20

Ende sij hebben alle gheten ende sijn versaet gheworden. Ende sij hebben die bleuelinghen opghenomen twaelf coruen vol brockelinghen.

21

Ende der gheender die daer aten was tghetal vijf duysent mans, wtghenomen die vrouwen ende cleyn kinderen.

22

+ Ende ter stont gheboodt Iesus sijnen discipelen dat sij opgaen souden in een sceepken, ende voer hem varen ouer die zee, tot dat hy die scaren verlaten soude.

23

⁺Ende als hy die scare ghelaten hadde, soe is hy op eenen berch gheclommen alleen om te bidden. Ende alst auont gheworden was, soe was hy daer alleen,

+ C

24

ende dat sceepken worde int midden der zee metten baren gheworpen, want den wint was contrarie.

25

Maer in die vierde wake des nachts, soe is hy tot hen ghecomen wandelende op die zee.

26

Ende sij siende hem op die zee wandelen sijn verbaest gheweest segghende, Het is een Phantasie. Ende van vreesen hebben sij gheroepen,

27

Ende terstont heeft Iesus tot hen ghesproken segghende, Hebt betrouwen, ic bent, en wilt niet vreesen.

28

Ende Petrus antwoerdende heeft gheseyt, Heere eest dat ghijt sijt, soe ghebiet dat ick tot v come opt water.

29

Ende hy heeft gheseyt, Coemt. Ende Petrus nedergaende wten sceepken wandelde opt water om dat hy comen soude tot Iesum,

30

⁺Maer siende eenen stercken wint heeft hy ghevreest, ende als hy begonst te sincken soe heeft hy gheroepen segghende, Heere behoudt my.

+ D

31

Ende Iesus ter stont sijn hant wtreyckende heeft hem ghegrepen, ende tot hem gheseyt. Ghy van cleynen ghelooue waerom hebdi ghetwijfelt?

32

Ende als sij opgheclommen waren int sceepken soe heeft den wint ophehouden.

33

Ende die int sceepken waren sijn ghecomen, ende hebben hem aenbeden segghende, Voerwaer ghy sijt Gods sone.

34

Ende als sij ouersghesceept waren, soe sijn sij ghecomen int lant van Genesar.

35

Ende als die mannen van dier plaetsen hem bekent hadden, soe hebben sij ghesonden in alle dat lantscap, ende sij hebben voer hem ghebracht alle die qualijc te passe waren,

36

ende sij baden hem dat sij te minsten die vesen van sijnen cleede souden raken, ende alle diese raecten, sijn ghesont gheworden.