Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xiij. Capittel.

1

⁺OP dien dach Iesus wtgaende wt den huyse sadt omtrent die zee.

+ A

2

Ende daer sijn tot hem vergadert veel scaren, alsoe dat hy in een sceepken climmende sadt, ende alle die scare stont op den oeuere,

3

ende hy heeft hen vele ghesproken in parabelen segghende. + Siet hy is wtghegaen die daer saeyt om te sayen,

4

Ende als hy saeyt, soe sijn die sommighe saden gheuallen by den wech, ende die voghelen des hemels sijn comen ende hebben die gheten.

5

Ende die andere sijn gheuallen in steenachtighe plaetsen, daer sij niet veel aerden en hadden, ende sij sijn ter stont wtghesproten, om dat sij gheen diepte vander eerden en hadden.

6

Maer als die sonne opghegaen was, soe sijnse verscout, ende om dat sij gheen wortel en hadden soe sijnse verdroocht.

7

Ende die andere sijn gheuallen onder die dornen, ende die dornen sijn ghewassen, ende die hebbense versmacht.

8

Maer die andere sijn gheuallen in goede eerde, ende sij gauen vrucht dat eene hondertfout, dat ander tsestichfout, het andere dertichfout.

9

Die ooren heeft om hooren, die hoore.

10

Ende sijn discipelen by hem comende, hebben tot hem gheseyt, Waer om spreect ghy hen in parabelen?

11

Die welcke antwoerdende heeft hen gheseyt. ⁺Om dat v lieden ghegheuen is te kennen die verborghentheden van dat rijck der hemelen, maer hen lieden en eest niet ghegheuen.

+ B

12

Want die ghene die heeft, dien salmen gheuen, ende hy sal oueruloeden. Maer soe wie niet en heeft, oock tghene dat hy heeft sal van hem wech ghenomen worden.

13

Daer om spreke ic tot hen lieden in parabelen, want sij siende niet en sien, ende hoorende niet en hooren, noch en verstaen,

14

ende in hen wort volbracht die prophetie van Isaias segghende, Metten ghehoor suldi hooren, ende niet verstaen, ende siende suldi sien, ende niet aenmercken.

15

Want het herte van desen volcke is grof gheworden, ende metten ooren hebben sij swaerlijck ghehoort, ende hen ooghen hebben sij toe ghesloten, dat sij te gheenen tijde en souden sien metten ooghen, ende hooren metten ooren, ende metter herten verstaen, ende alsoe bekeert worden, ende dat icse ghenase.

16

+ Maer v ooghen sijn salich om dat sij sien, ende v ooren om dat sij hooren.

17

Want voerwaer ick segghe v, dat veel propheten ende rechtuerdighe hebben beghert te siene dat ghy siet, ende sij en hebbens niet ghesien, ⁺ende te hooren dat ghy hoort, ende sij en hebbens niet ghehoort.

+ C

18

Daer om hoort ghy die parabel vanden sayere.

19

Soe wie het woert des rijcs hoort ende niet en verstaet, daer coemt die quade, ende hy neemt wech datter ghesaeyet is in sijn herte, dit is die ghene die by den wech ghesayet is,

20

Maer die op die steenachtighe plaetsen ghesaeyt is, dit is die ghene die dwoert hoort, ende ter stont ontfanct hy dat met blijscappen,

21

maer hy en heeft in sij seluen gheen wortele, maer hy is eenen cleynen tijt duerende, Maer alsser tribulatie ghebuert ende veruolghinghe om dwoert, soe wort hy ter stont verarghert.

22

Maer die in die doornen ghesaeyt is, dat is dese die dwoert hoort, ende die sorchfuldicheyt van deser werelt, ende die bedrieghelijcheyt der rijcdommen versmachten dwoert, ende het wort sonder vrucht.

23

⁺Maer die in goede aerde ghesaeyt is, dit is die ghene diet woert hoort, ende verstaet ende brengt vrucht voerts, ende doet het eene honderfout, het ander tsestichfout, ende het ander dertichfout.

+ D

* 24

Een ander parabel heeft hy hen te voren gheleyt segghende. + Het rijck der hemelen is ghelijck gheworden eenen mensch die goet saet ghesaeyt heeft in sijnen acker,

25

maer doen die menschen sliepen, soe is sijn viant comen, ende hy heeft daer oncruyt op ghesaeyt intmidden der terwen, ende hy is wech ghegaen.

26

Ende doent cruyt ghewassen was, ende vrucht voerts ghebracht hadde soe openbaerde hem oock dat oncruyt.

27

Ende die knechten van den vader des huysghesins tot hem comende hebben hem gheseyt. Heere en hebdi niet goet saet ghesaeyt in uwen acker? Waer af heeft dien dan oncruyt?

28

Ende hy heeft hen gheseyt, Die viandelijcke mensch heeft dat ghedaen, ende die knechten hebben hen gheseyt wildi dat wy gaen ende dat vergaderen?

29

Ende hy heeft gheseyt, Neen, op dat ghy het oncruyt vergaderende, by auontueren oock die terwe daer mede niet te samen metten wortelen wt en trect.

30

Laetse beyde wassen totten oochst, ende ten tijde vanden oochst, sal ick den mayers segghen, ⁺Vergadert ierstmael dat oncruyt ende bindet in bondelkens om te verbranden, maer die tarwe vergadert in mijn schuere.

+ E

* 31

Een ander parabel heeft hy hen te voren gheleyt seggende, Het rijcke der hemelen is ghelijck den mostaert sade, dwelck een mensch nemende ghesaeyt heeft in sijnen acker,

32

het welck emmer het minste is van allen saden, maer alst ghewassen is, soe eest meerder dan alle die cruyden, ende het wort eenen boom, alsoe dat die voghelen des hemels comen ende woonen in sijn tacken.

33

Een ander parabel heeft hy hen gheseyt, Het rijck der hemelen is ghelijck den heue, den welcken een vrouwe nemende heeft gheborghen in drij maten meels tot dat gheheel versuert worde.

34

Alle dese dinghen heeft Iesus in parabelen ghesproken tot die scaren, ende sonder parabelen en sprack hy hen niet,

35

om dat volbracht soude worden datter gheseyt was door den Propheet segghende, Ick sal in parabelen mijnen mont open doen, ick sal op worpen verborghen dinghen van dat beghinsel der werelt.

36

⁺Doen hy die scaren ghelaten hadde, soe is hy in huys ghecomen, ende sijn discipelen sijn tot hem comen segghende, Verclaert ons die parabele vanden oncruyde des ackers.

+ F

37

Die welcke antwoerdende heeft hen gheseyt, Die tgoet saet sayet dats die sone des menschen.

38

Ende den acker is die werelt. Maer tgoet saet dat sijn die kinderen des rijcs. Maer dat oncruyt sijn die quade kinderen.

39

Ende die viant diese ghesaeyt heeft, dat is die duyuel. Maer den oochst dats tvoleynden der werelt. Ende die maeyers dat sijn die enghelen.

40

Aldus ghelijc die oncruyden vergadert worden, ende metten viere verbrant, alsoe salt wesen int voleynden der werelt,

41

die sone des menschen sal sijn enghelen seynden, ende die sullen vergaderen van sijnen rijcke alle argher-

[p. *767]

nissen, ende die ghene die boosheyt doen,

42

ende sij sullen die worpen inden ouen des viers. Daer sal ghescrey sijn ende crijsselinghe der tanden.

43

Dan sullen die rechtuerdighe blincken als die sonne in haers vaders rijck. Die ooren heeft om te hooren die hoore.

44

+ Het rijck der hemelen is ghelijck eenen scadt die verborghen is inden acker. Den welcken een mensch (dien vonden heeft) verborght ende wt blijscap van dien soe gaet hy, ende vercoopet al dat hy heeft, ende coopt dien acker.

45

Wederom is het rijck der hemelen ghelijck eenen coopman, soeckende goede peerlen.

46

Ende gheuonden hebbende een costelicke peerle, soe is hy wech ghegaen, ende heuet al vercocht dat hy hadde, ende heeft die ghecocht.

47

Wederom is dat rijck der hemelen ghelijck een visschers net dat in die zee gheworpen is, ende van alle manieren van visschen vanghende is.

48

Het welck alst vol was wtreckende, ende omtrent den oeuer sittende hebben sij die goede visschen wtghecoren in hen vaten, maer die quade hebben sij wech gheworpen.

49

Alsoe salt wesen in dat voleynden der werelt, die enghelen sullen wtgaen, ende sij sullen die quade wtsceyden, wt dat midden der rechtuerdigher,

50

ende die worpen inden ouen des viers, daer sal ghescrey sijn ende crijsselinghe der tanden.

51

⁺Hebdi alle dese dinghen verstaen? Sy segghen hem Iae wy,

+ G

52

Hy seyde hen, Daerom een ieghelijck gheleert scribe int rijck der hemelen is ghelijck eenen mensch die een vader des huysghesins is, die wt sijnen scadt voerts brengt oude dinghen, ende nieuwe.

* 53

Ende het is ghesciet doen Iesus dese parabele voleyndt hadde dat hy van daer is doer ghegaen.

54

Ende comende in sijn lant leerde hy hen lieden in hen sinagogen, alsoe dat sij hen verwonderden ende seyden. Van waer comen desen dese wijsheyt ende crachtighe wercken.

55

En is dit niet eens timmermans sone? En heet sijn moeder niet Maria? ende sijn broeders Iacobus ende Ioseph ende Simon ende Iudas,

56

ende sijn susters en sijn die niet allegader by ons? Van waer comen dan desen alle dese dinghen?

57

Ende sij worden in hem verarghert. Maer Iesus seyde hen, Gheen propheet en is sonder eere dan in sijn lant, ende in sijn huys.

58

Ende hy en heeft daer niet veel mirakelen ghedaen om haerlieder ongheloouicheyt wille.