Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .xij. Capittel.

+ 1

⁺IN dien tijt is Iesus wech ghegaen doert coren op eenen Sabboth ende sijn discipulen hongher lijdende hebben begonst die aren te plucken ende te eten.

+ A

2

Ende die Phariseen dit siende hebben hem gheseyt, Siet v discipulen doen dat hen niet gheorloft en is te doen op die Sabbothen.

3

Maer hy seyde hen, En hebdi niet ghelesen wat Dauid ghedaen heeft, doen hy hongher hadde ende die ghene die met hem waren.

4

Hoe dat hy inghegaen is in Gods huys, ende heeft die brooden der voerlegghinghen gheten die welcke hem niet gheorloft en was te eten, noch den ghenen die met hem waren, dan alleen den priesteren?

5

Oft en hebdi niet ghelesen in die wet, dat die priesters op die Sabbothen in den tempel den sabboth breken, ende sijn sonder sonde?

6

Maer ick segghe v datter een meerder dan den tempel hier is.

7

Maer waert alsoe dat ghy wist wat dat is. Bermherticheyt wil ick, ende niet sacrificie, soe en soudi noyt die onnosele verdoemt hebben.

8

Want die sone des menschen is een heere oock ouer den sabboth.

* 9

Ende doen hy van daer ghegaen was, soe is hy comen in hen Synagoge.

10

Ende siet daer was een man hebbende een dorre hant, ende sij vraechden hem segghende, Eest oock gheorlooft op die Sabbothen te ghenesen? om dat sij hem besculdighen souden.

11

Ende hy seyde hen, wat mensch sal daer sijn van v lieden die een scaep hebbe, ende eest dat dit valt in een grachte op die Sabbothen, en sal hy dat niet nemen ende opheffen?

12

⁺Hoe veel te meer is een mensch beter dan een scaep? Hier om soe eest gheorloft op die Sabboth daghen wel te doen.

+ B

13

Doen seyde hy totten mensche, Steect wt v hant. Ende hy heeftse wtghesteken, ende sij is weder ghesont gheworden ghelijck die andere.

14

+ Ende die Phariseen wt gaende hielen raet tseghen hem, hoe dat sij hem dooden souden.

15

Ende Iesus dit wetende is wten weghe van daer ghegaen, ende hem isser vele gheuolcht, ende hy heeftse alle ghenesen,

16

ende hy heeft hen beuolen datse hem niet melden en souden,

17

op dat volbrocht soude worden datter gheseyt is door Isaiam den Propheet segghende,

18

Siet mijn kint den welcken ick vercoren hebbe, mijn beminde in den welcken mijn ziele goet behaghen heeft. Ick sal mijnen gheest stellen op hem ende hy sal het ordeel den heydenen vercondighen.

19

Hy en sal niet kijuen, noch roepen, noch daer en sal niemant sijn stemme op die straten hooren,

20

dat ghecroecte riet en sal hy niet heel breken, ende dat rookende vlas en sal hy niet wt blusschen, tot dat hy het ordeel wt worpe ter victorien,

21

ende in sijnen naem sullen die heydenen hopen.

* 22

Doen is voor hem gebrocht eene die eenen duyuel hadde blent ende stom, ende hy heeft dien ghenesen, alsoe dat hy sprack ende sach.

23

Ende alle die scaren verwonderden hen seere, ende sij seyden, Es dit Dauids sone?

24

Maer die Phariseen dit hoorende hebben gheseyt, Dese en worpt gheen duyuelen wt dan doer Beelzebub den prince der duyuelen.

25

Maer Iesus wetende hen ghedachten heeft hen gheseyt, Alle rijck tseghen sij seluen ghesceyden sal verwoest worden, ende alle stadt oft huys tseghen sij seluen ghedeylt en sal niet staen.

26

Ende eest dat Sathanas Sathanam wt worpt, soe is hy teghen sij seluen ghedeelt, hoe sal dan sijn rijck staen?

27

Ende eest dat ick doer Beelzebub die duyuelen wt worpe, Waer doer worpen v kinderen die wt? Daer om sullen sij v rechters wesen.

28

⁺Maer eest dat ick doer den gheest Gods die duyuels wt worpe, soe is dan tot in v lieden comen het rijck Gods.

+ C

29

Oft hoe mach iemant comen int huys van eenen stercken, ende sijnen huysraet beroouen, ten sij dat hy ierstmael den stercken ghebonden hebbe, ende dan sal hy sijn huys beroouen?

30

+ Wie met my niet en is, die is teghen my, Ende soe wie met my niet en vergadert, die verstroyt.

31

Daer om segghe ick v lieden, alle sonde ende blasphemie sal den menschen vergheuen worden, maer die blasphemie des gheests en sal niet vergheuen worden.

32

Ende soe wie een woert seyt teghen den sone des menschen, dat sal hem vergheuen worden, maer die seyt teghen den heyleghen gheest, dat en sal hem niet vergheuen worden, noch in dese werelt, noch in die toecomende.

33

Oft maect den boom goet ende sijn vrucht goet, oft maect den boom quaet ende sijn vrucht quaet. Want voer waer wt die vrucht wort den boom ghekent.

34

Ghy ghebroetsele der aderen, hoe moechdi goede dinghen spreken daer ghy quaet sijt? Want wt die ouervloedicheyt des herten spreect den mont.

35

Een goet mensch wten goeden scat brengt goede dinghen voerts, ende een quaet mensch wten quaden scat, brengt voerts quade dinghen.

36

Maer ic segghe v, dat alle ydel woert dat die menschen ghesproken hebben, daer af sullen sij reden gheuen inden dach des ordeels.

37

Want wt uwen woerden suldi gherechtuerdicht worden, ende wt uwen woerden suldi ghedoemt worden.

* 38

+ Doen hebben hem gheantwoert sommighe van den Scriben ende Phariseen segghende, Meester wy willen van v een teeken sien.

39

⁺Die welcke antwoerdende heeft hen gheseyt, Dit quaet ende ouerspelich gheslachte soect een teeken, ende hem en sal gheen teeken ghegheuen worden, dan het teeken van Ionas den Propheet.

+ D

40

Want ghelijck Ionas gheweest heeft inden buyck vanden walvisch drij daghen ende drij nachten, alsoe sal die sone des menschen wesen int herte der aerden drij daghen ende drij nachten.

41

Die mannen van Niniue sullen opstaen int ordeel met desen gheslachte, ende sij sullen dat verdoemen, om dat sij penitencie ghedaen hebben, doer die predicatie van Ionas, ende siet hier is meer dan Ionas.

42

Die coninghinne van zuyden sal opstaen int ordeel met dit gheslachte, ende sij sal dat verdoemen, want sij is ghecomen van die eynden der aerden om te hooren die wijsheyt van Salomon, ende siet meer dan Salomon is hier.

43

Ende als den onsuyueren gheest vanden mensche wtgegaen is, soe wandelt hy doer die drooghe plaetsen soeckende ruste, maer hy en vintse niet.

44

Dan seyt hy, Ick sal wederkeeren in mijn huys daer ic wt ghegaen ben. Ende comende soe vint hy dat ledich, met bessemen ghekerijt, ende verciert.

45

Dan gaet hy

[p. *766]

ende neemt tot hem seuen ander gheesten argher dan hy is, ende inghaende woonen sij daer, ende dies menschen laetsten worden argher dan sijn ierste. Alsoe sal oock desen alderquaetsten gheslachte ghescieden.

46

Doen hy noch sprack tot die scaren, siet soe stonden sijn moeder ende sijn broeders buyten, begerende hem te spreken.

47

Ende een seyde tot hem, Siet v moeder ende v broeders staen daer buyten begherende v?

48

Ende hy antwoerdende den ghenen diet hem seyde heeft gheseyt, Wie is mijn moeder, ende wie sijn mijn broeders?

49

Ende wtstekende sijn hant tot sijnen discipelen, heeft hy gheseyt, Siet hier mijn moeder ende mijn broeders.

50

Want soe wie doet den wille mijns vaders, die in die hemelen is, dese is mijn broeder, ende suster, ende moeder.