Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .x. Capittel.

§ 1

⁺ENde tsamen gheroepen hebbende sijn twaelf discipelen, heeft hy hen macht ghegheuen ouer die onsuyuer gheesten, dat sij die wtworpen souden, ende ghenesen alle siecten ende alle crancheden,

+ A

2

Ende der twaelf apostelen namen sijn dese, Dierste was Simon die ghenoemt wort Petrus, ende Andreas sijn broeder,

3

Iacobus Zebedeus sone, ende Iohannes sijn broeder, Philippus, ende Bartholomeus, Thomas, ende Matheus die publicaen, ende Iacobus Alpheus sone? ende Thadeus,

4

Simon die Cananeus, ende Iudas die Iscarioter die welcke hem ooc verraden heeft.

* § 5

Dese twaelue heeft Iesus ghesonden, ghebiedende hen, segghende. Inden wech der heydenen en gaet niet, ende in die steden der Samaritanen en coemt niet binnen,

6

Maer lieuer gaet tot die scapen die verloren ghegaen sijn des huys van Israel,

7

Ende gaende preect seggende. Dat het rijc der hemelen is bi ghecomen,

8

Die crancke maect ghesont, die dooden verwect, die melaetsche suyuert, worpt wt die duyuelen, Om niet hebdijt ontfanghen, gheuet om niet,

9

En wilt niet besitten gout, noch siluer, noch ghelt in v borsen,

10

noch male opden wech, noch twee rocken noch scoenen, noch roede, want een werckman is sijnen cost weerdich,

11

⁺Maer in wat stadt oft casteel dat ghi in coemt, soo vraecht wie daer binnen weerdich is, ende aldaer blijft tot dat ghi daer wt gaet,

+ B

12

Ende in huys comende soo groet dat segghende. Vrede sij desen huyse,

13

Ende eest alsoo dattet huys weerdich is, soo sal uwen vrede daer op comen, Maer eest des niet weerdich soo sal uwen vrede weder tot v keeren,

14

Ende soo wie v niet en ontfanghet, nocht v woorden en hoort, wtghaende buyten van dien huyse oft stadt, scuddet dat stubbe af van uwen voeten,

15

Voorwaer ick segghe v. Verdrachelijcker salt den lande der Sodomiten ende der Gomorrithen sijn inden dach des ordeels dan dier stadt.

[p. *764]

* § 16

Siet ick seynde v ghelijck scapen int midden der woluen, Daer om sijt voersienich als serpenten ende simpel ghelijck duyuen,

17

Maer wacht v van die menschen, Want sij sullen v leueren in die raethuysen, ende in hen synagogen sullen sij v ghesseelen,

18

ende tot presidenten ende coninghen suldi gheleydt worden om mijnen wille, tot eenen ghetuyghenisse hen ende den Heydenen.

19

Ende als sij v leueren sullen, soe en wilt niet dencken, hoe ende wat ghy spreken sult, Want het sal v lieden ghegheuen worden op die vre wat ghy spreken sult,

20

Want ghy en sijt niet die ghene die daer spreect, maer tes den gheest ws vaders die in v lieden spreect,

21

Ende deen broeder sal den anderen broeder leueren in die doot, ende die vader sijnen sone, ende die kinderen sullen opstaen teghen hen ouders, ende sij sullen hen die doot aendoen,

22

ende ghy sult van allen menschen ghehaet worden om mijnen naem, maer soe wie volherdet totten eynde toe die sal salich wesen.

* § 23

Ende als sij v veruolghen sullen in dese stadt, soe vliet in dandere, Voerwaer ic segghe v, ghi en sult die steden van Israel niet voleynden die sone des menschen en sal comen.

24

Gheen discipel en is bouen sijnen meester, noch knecht bouen sijnen Heere,

25

⁺tes eenen discipel ghenoech dat hy sij ghelijck sijn meester, ende eenen knecht, ghelijck sijn heere, Eest dat sij den vader des huysghesins, Beelzebub ghenaemt hebben, hoe veel te meer sijn huysghenooten?

+ C

26

Daeromme en vreest hen niet, Want daer en is niet bedect dat niet en sal ontdect worden, ende verberghen, dat niet en sal gheweten worden.

27

Dat ick v int doncker segghe, segt dat int licht, ende dat ghy in die oore hoort, Preect dat op die daken,

28

Ende en wilt hen niet vreesen die dlichaem dooden, maer die ziele niet en connen dooden, maer veel meer vreest hen die de ziele ende dlichaem mach verdoemen in die helle.

29

En worden twee musschen niet vercocht om eenen cleynen penninck ende een van dien en valt op die aerde niet sonder uwen vader?

30

Maer oock die hairen ws hoofts sijn al ghetelt.

31

Daer om en wilt niet vreesen, ghy sijt beter dan veel musschen.

* 32

Hier om alle die my belijden sal voer die menschen, dien sal ick oock belijden voor mijnen vader die inde hemelen is,

33

maer soe wie my loochent voer die menschen, dien sal ick oock loochenen voor mijnen vader die in die hemelen is.

* § 34

⁺En wilt niet meynen dat ick ghecomen ben om vrede te seynden op die aerde, Ic en ben niet ghecomen om vrede te seynden, maer tsweert,

+ D

35

want ick ben ghecomen om te sceyden den mensch teghen sijnen vader, ende die dochter teghen haer moeder, ende die behoude dochter teghen haer behoude moeder,

36

ende des menschen vianden sullen sijn huysghenooten sijn,

37

Wie vader oft moeder bemint meer dan mij die en is mijns niet weerdich, ende soe wie sone oft dochter lief heeft bouen my, die en is mijns niet weerdich,

38

Ende wie sijn cruys niet en neemt ende my volcht, die en is mijns niet weerdich,

39

Wie sijn ziele vint die salse verliesen, ende wie sijn ziele verliest om mijnen wille, die salse vinden.

40

Die v lieden ontfanct, die ontfanct my, ende die my ontfanct, die ontfanct hem die my ghesonden heeft,

41

Die eenen Propheet ontfanct inden naem van eenen propheet, die sal den loon eens propheets ontfanghen, ende wie eenen rechtuaerdighen ontfanct inden naem van eenen rechtuaerdighen, die sal den loon van eenen rechtuerdighen ontfanghen,

42

Ende soe wie te drincken gheeft yemanden van desen alderminsten eenen croes couts waters, alleenlijck inden naem van eens discipels, voerwaer ick segghe v, die en sal sijnen loon niet verliesen.