Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .ix. Capittel.

[p. *763]

+ 1

⁺ENde Iesus opclimmende in een sceepken is ouer de zee gheuaren ende is ghecomen in sijn stadt,

+ A

2

Ende siet sij hebben voor hem ghebracht eenen ghichtighen mensche ligghende in een bedde, Ende Iesus siende hen ghelooue heeft gheseyt totten ghichtighen mensch. Betrout sone, v sonden worden v vergheuen,

3

Ende siet sommighe vanden scriben seyden in hen seluen. Dese blasphemeert,

4

Ende als Iesus hen ghedachten ghesien hadde, soo heeft hy gheseyt. Waerom dencte ghy quaet in v herten?

5

Wat is lichter om segghen. V sonden worden v vergheuen, oft te segghen. Staet op ende wandelt?

6

Maer op dat ghi wetet dat die sone des menschen macht heeft op die eerde die sonden te vergheuen, doen seyde hi den ghichtighen mensch. Staet op, ende neem op v bedde, ende gaet in v huys,

7

Ende hy is opghestaen ende in sijn huys ghegaen,

8

Ende die scaren dit siende hebben ghevreest ende Godt gheglorificeert die sulcke macht den menschen ghegheuen heeft.

* § 9

Ende doen Iesus van daer voorts ghinc, soo heeft hy ghesien eenen mensche sittende int tolhuys Matheus ghenaemt, Ende hy seyde hem. Volcht my, Ende hy opstaende heeft hem gheuolcht,

10

Ende tis ghesciet doen hy ter tafelen sadt int huys, siet soo hebbender veel Publicanen ende sondaers comende ter maeltijt gheseten met Iesu ende met sijnen discipelen,

11

⁺Ende die Phariseen dit siende seyden tot sijnen discipelen. Waerom eedt v meester met die Publicanen ende sondaers?

+ B

12

Maer Iesus dit hoorende heeft gheseyt. Den ghesonden en is die medecijn van gheenen noode, maer den ghenen die qualijck te passe sijn,

13

maer gaende leert wat dat is. Bermherticheyt wil ic ende niet sacrificie, Want ick en ben niet ghecomen om die rechtuerdighe te roepen maer die sondaren.

* § 14

Doen sijn tot hem ghecomen Iohannes discipelen segghende. Waerom vasten wij ende die Phariseen dicmael, ende v discipelen en vasten niet?

15

Ende Iesus seyde tot hen. Moghen des brudegoms kinderen rouwich sijn so langhe als die brudegom met henlieden is? Maer die daghen sullen comen als die brudegom hen afghenomen sal worden, ende dan sullen sij vasten,

16

Niemant en stelt een stuck van een nieu laken in een out cleedt, Want het neemt wech sijn volheyt vanden cleede, ende het wort een argher scoere,

17

Noch men en doet gheenen nieuwen wijn in oude leren flesschen, Anders soo bersten die flesschen, ende den wijn wort wtghestort, ende die flesschen vergaen, Maer nieuwen wijn doetmen in nieuwe flesschen ende die worden beyde behouden.

* § 18

⁺Die wijle dat hi dese dinghen tot hen sprack, siet soo is daer een prince tot hem comen, ende aenbadt hem segghende. Heere mijn dochter is nv ghestoruen, maer coemt legt v hant op haer, ende sij sal leuen,

+ C

19

Ende Iesus opstaende volchde hem ende sijn discipelen,

20

Ende siet een vrouwe die den vloet des bloets gheleden hadde twaelf iaren lanck, is van achter aen hem comen, ende heeft gheraeckt den wtersten boort van sijnen cleede,

21

want sij seyde in haer seluen. Eest dat ic alleenlijc sijn cleedt gherake ick sal ghesont sijn,

22

Maer Iesus ommeghekeert sijnde ende haer siende heeft gheseyt. Betrout dochter, v ghelooue heeft v ghesont ghemaect, Ende die vrouwe is ghesont gheworden van dier vren,

23

Ende doen Iesus comen was in des princen huys, ende ghesien hadde die pijpers ende die scharen gherucht makende,

24

soo seyde hy. Ghaet wech want die ionghe dochter en is niet doot, maer sij slaept, ende si bespotten hem,

25

Ende als die scare wtgheworpen was soo is hy daer ingheghaen, ende heeft haer haut ghenomen, Ende die ionghe dochter is opghestaen,

26

Ende dese fame is wtghegaen in alle dat lant.

* § 27

⁺Ende als Iesus van daer ghinck, soo sijn hem twee blenden gheuolcht roepende ende segghende. Ontfermt v onser Dauids sone,

+ D

28

ende doen hy in huys ghecomen was, soo sijn die blenden by hem comen, Ende Iesus seyde tot hen. Gheloofdi dat ick v dit doen mach? Sij seyden hem Iae wij immer Heere,

29

Doen gheraecte hy hen ooghen segghende. Nae v ghelooue ghesciede v lieden,

30

ende hen ooghen sijn gheopent, Ende Iesus heeftse ghedreycht segghende. Siet toe dat niemant en wete?

31

Maer sij wtghaende hebben hem vermaert ghemaect in alle dat lant,

32

Ende als die wtghegaen waren, siet soo hebben sij voor hem ghebracht eenen stommen mensch eenen duyuel binnen hebbende,

33

Ende als die duyuel wtgheworpen was, soo heeft die stomme ghesproken, ende die scaren hebben hen verwondert segghende. Noyt en was desghelijcs ghesien in Israel,

34

Maer die Phariseen seyden. Door den prince der duyuelen, worpt hy die duyuelen wt,

35

Ende Iesus ghinck alomme die steden ende casteelen, leerende in hen Sinagogen ende prekende het euangelie des rijcs, ende ghenesende alle siecte ende alle cranchede,

36

Ende siende die scaren, heeft hy haerder ontfermt, want sij waren ghequelt, ende ligghende als scapen gheenen herder hebbende

37

Doen seyde hy tot sijnen discipelen. Den oochst is voorwaer vele, maer die werckluyden sijn luttel,

38

Daerom biddet den Heere vanden oochst dat hy werckluyden wtsende in sijnen oochst.