Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

+ 1

⁺ENde doen hy vanden berghe nedercomen was soo sijn hem veel scaren gheuolcht,

+ A

2

ende siet een melaetsch mensch comende aenbadt hem segghende. Heere eest dat ghy wilt, ghy moecht my reynighen,

3

Ende Iesus wtstekende sijn hant heeft hem ghenaect segghende. Ick wille, wert reyne, Ende ter stont is sijn melaetscheyt ghesuyuert,

4

Ende Iesus seyde tot hem. Siet dat ghijt niemant en segghet, maer gaet henen ende vertoont v den priester, ende offert die ghifte welc Moyses gheboden heeft tot haren ghetuygenis.

* 5

+ Ende doen hy in Capharnaum comen was, so is tot hem comen een honderste man biddende hem ende segghende.

6

Heere mijn knecht leghet in mijn huys ghichtich, ende wort swaerlijck ghepijnicht,

7

Ende Iesus heeft tot hem gheseyt. Ick sal comen ende hem ghenesen

8

Ende die honderste man antwoordende heeft gheseyt Heere ick en bens niet weerdich dat ghy binnen gaen soudt onder mijn dack, maer segghet alleen met eenen woorde, ende mijn knecht sal ghesont worden,

9

Want ick ben ooc een mensch onder eens anders macht ghestelt hebbende onder my crijschknechten, ⁺ende ic segghe desen gaet henen, ende hi gaet, ende den anderen coemt hier, ende hy coemt, ende mijnen dienaer doet dat, ende hy doet dat,

+ B

10

Ende Iesus hoorende heeft hem verwondert, ende den ghenen die hem nae volchden heeft hy gheseyt, Voorwaer ick segghe v, ic en hebbe soo grooten ghelooue niet gheuonden in Israel,

11

Maer ick segghe v datter veel van oosten ende westen somen sullen, ende rusten met Abraham, ende Isaac, ende Iacob int rijck der hemelen,

12

maer die kinderen des rijcs sullen daer wtgheworpen worden in die wterste duysternisse, daer sal gheschrey sijn ende crijselinghe van tanden,

13

Ende Iesus heeft tot den hondertman gheseyt. Gaet henen, ende ghelijck ghy ghelooft hebt alsoo ghescie v, Ende die knecht is ghesont worden op die vre.

* 14

+ Ende als Iesus comen was in Petrus huys, soo heeft hy sijns wijfs moeder ghesien ligghende ende die cortse hebbende,

15

ende hy heeft haer hant gheraect, ende die cortse heeftse verlaten, ende sij is opghestaen, ende heeft hem ghedient.

16

Maer alst auont gheworden was, soo hebben si voor hem ghebrocht veel die duyuelen binnen hadden ende hy wierp die gheesten wt metten woorde, Ende alle die qualijck te passe waren heeft hy ghenesen,

17

om dat volbracht soude worden datter gheseyt is door den propheet Isaiam segghende. Hy heeft onse crancheden ontfanghen, ende onse siecten ghedraghen.

* 18

⁺Ende Iesus siende veel scharen rontsomme hem heeft gheboden dat sij ghaen souden ouer die zee,

+ C

19

Ende een Scribe tot hem comende heeft gheseydt. Meester ick sal v volghen al waer ghy henen gaen sult,

20

Ende Iesus seyde tot hem. Die vossen hebben holen ende die voghelen des hemels nesten, maer die sone des menschen en heeft niet daer hi sijn hooft op neder legghen mach,

21

Maer een ander van sijnen discipelen seyde tot hem. Heere laet my eerstmael gaen ende begrauen mijnen vader,

22

Ende Iesus seyde hem volcht my, ende laet die dooden hen dooden begrauen.

* 23

+ Ende als hy in een sceepken opclam, soo sijn hem sijn discipelen gheuolcht,

24

ende siet een groote beroerte is in die zee opghestaen, alsoo dat het sceepken metten baren ouerdect worde, maer hy sliep,

25

Ende si sijn tot hem ghegaen, ende hebben hem ghewect segghende. Heere behoudt ons, wij vergaen,

26

Ende hy seyde hen. Waerom sijdi veruaert, ghy van cleynen ghelooue? Doen heeft hy opstaende gheboden den winden, ende der zee, ende daer is een groote stillicheyt gheworden,

27

Maer die menschen hebben hen verwondert seggende. Wie is dese, dat die winden ende die zee hem onderdanich sijn?

* 28

⁺Ende als hy ghecomen was ouer die zee int lantscap vanden Gerasenen, soo sijn hem twee te ghemoete ghecomen die duyuels binnen hadden wt die grauen comende bouen maten seer wreet, also dat niemant en mocht passeren door dien wech,

+ D

29

Ende siet sij riepen segghende. Wat hebben wi met v te doene Iesu Godts sone? Sijdi hier comen om voor den tijt ons te pijnighen?

30

Ende niet verre van hen was een cudde van veel verkenen weydende,

31

Ende die duyuelen baden hem segghende. Eest dat ghy ons wtworpt, soo sendt ons int cudde der verkenen,

32

Ende hy seyde hen. Gaet henen, Ende sij wtgaende sijn wech gheuaren in die verkenen, ende siet met eenen ghedruyssche is alle dat cudde wech gheloopen steylijck neder in die zee, ende sij sijn ghestoruen in die wateren,

33

Ende die herders sijn gheuloden ende comende in die stadt, hebben sij alle die dinghen vercondicht, ende van die ghene die duyuels binnen ghehadt hadden,

34

Ende siet die gheheel stadt is wtghecomen Iesu te ghemoete, Ende doen sij hem ghesien hadden, soo baden sij dat hy voorts wech gaen soude van haren palen.