Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

+ 1

⁺EN wilt niet ordeelen op dat ghy niet gheoordeelt en wort,

+ A

2

want met wat ordeel dat ghy ordeelt, daer mede suldi gheordeelt worden, ende met wat maten dat ghy metet, daer mede sal v ghemeten worden,

3

Maer waer toe siet ghy een splinterken in ws broeders ooghen, ende en merct niet den balck die in v ooghe is?

4

Oft hoe segdi uwen broeder latet gheschieden dat ick dat splinterken wt uwer oogken trecke, ende siet daer is eenen balck in v ooghe?

5

Ghy ypocrijt worpt ierstmael den balck wt v ooghe ende dan suldy sien dat splinterken wt te worpen wt ws broeders ooghe,

6

En wilt dat heylich den honden niet gheuen, noch en worpt v peerlen niet voor die verkenen, op dat sij by auontueren die niet en vertreden met haren voeten, ende dat sij hen omkeerende v niet en verscoeren,

7

Begheert, ende v sal ghegheuen worden, soect, ende ghy sult vinden, clopt ende, v sal open ghedaen worden,

8

Want alle die begheert die ontfanct, ende wie dat soect die vint, ende den cloppende sal gheopent worden,

9

Oft wat mensch isser van v lieden, eest dat sijn sone broot van hem begheert, sal hy hem eenen steen bieden?

10

⁺Oft eest dat hy eenen visch begheert sal hi hem een serpent gheuen?

+ B

11

Daerom eest sake dat ghy, die doch quaet sijt, wel weet goede gauen uwen kinderen te gheuen, hoe veel te meer sal v vader die in die hemelen is, goede gauen gheuen den ghenen diese van hem begheren?

* 12

+ Daerom alle dinghen die ghy wilt dat die menschen v doen, doet ghi hen dat ooc, want dat is die wet ende die propheten,

13

Ghaet in door die enghe poorte, want breedt is die poorte, ende ruym is den wech die

[p. *762]

daer leydt ter verdoemenissen, ende veel isser die door dese in gaen,

14

Hoe enghe is die poorte ende hoe nauwe is den wech die ten leuen leydt? ende luttel isser die dien vinden.

* 15

+ Wacht v voor die valsche propheten die tot v comen in scapen cleederen, maer binnen sijnt grijpende woluen,

16

van haren vruchten suldise kennen, Vergadertmen druyuen van dornen, oft vijghen van distelen?

17

Alsoo alle goede boom brengt goede vruchten voorts, maer eenen quaden boom brengt quade vruchten voorts,

18

Eenen goeden boom en mach gheen quade vruchten voorts brenghen, noch eenen quaden boom goede vruchten,

19

Alle boom die gheen goede vrucht voorts en brengt, sal afghehouwen worden ende int vier gheworpen,

20

Daerom wt haren vruchten suldise kennen.

21

Sij en sullen alle int rijc der hemelen niet comen die my segghen Heere Heere, maer die mijn vaders wille doet die in die hemelen is, die sal int rijc der hemelen comen.

* 22

⁺Vele sullen tot my segghen op dien dach Heere Heere, en hebben wi in uwen naem niet ghepropheteert, ende in uwen naem duyuels wtgheworpen, ende in uwen naem veel crachtighe wercken ghedaen?

+ D

23

Ende dan sal ick hen openlijc segghen. Ick en hebbe v noyt ghekent, gaet van my ghi die onrechtuerdicheyt doet.

24

Daerom een ieghelijc die dese mijne woorden hoort ende die doet, sal gheleken worden bi eenen wijsen man die sijn huys ghetimmert heeft op eenen steen,

25

ende daer is eenen reghen nedergheuallen, ende daer sijn vloeden ghecomen, ende daer hebben winden ghewaeyt ende die sijn gheuallen op dat huys, ende ten is niet gheuallen want het was ghefundeert opden steen,

26

Ende een ieghelijc die dese mijn woorden hoort, ende die niet en doet sal sijn ghelijck eenen dwasen man, die sijn huys ghetimmert heeft opt sandt

27

ende daer is reghen nedergheuallen, ende daer sijn vloeden ghecomen, ende daer hebben winden ghewaeyt, ende die sijn op dat huys gheuallen, ende het is geuallen ende sijnen val was groot,

28

Ende tis ghesciet doen Iesus dese woorden voleynt hadde, soo verwonderden haer die scaren van sijnder leeringhen,

29

want hy was hen leerende als macht hebbende, ende niet ghelijc hen Scriben ende Phariseen.