Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .vi. Capittel.

1

⁺SIet toe dat ghy uwe rechtuerdicheyt niet en doet voor die menschen, om dat ghi van hen soudt ghesien worden, oft anders soo en suldy gheenen loon hebben by uwen vader die in die hemelen is,

+ A

2

Daerom als ghi aelmoessen doet, so en wilt met gheen trompet voor v blasen, ghelijck die hypocrijten doen in die Sinagogen ende wijcken, op dat sij souden gheeert worden vanden menschen, voorwaer ick segghe v sij hebben haren loon ontfanghen,

3

Maer als ghy aelmoessen doet, soo en laet v slincke hant niet weten wat v rechte hant doet,

4

op dat v aelmoesse int heymelijc sij, ende v vader die int heymelijc siet salt v loonen,

5

Ende als ghi bidt soo en suldi niet sijn als die hypocrijten, die beminnen in die Sinagogen ende in die hoecken der straten staende te bidden, op dat sij souden ghesien worden vanden menschen, Voorwaer ick segghe v, sij hebben haren loon ontfanghen,

6

Maer als ghy bidt, soo gaet binnen v slaepcamer, ende met gheslotender doeren soo bidt uwen vader int heymelijck, ende v vader diet siet int heymelijck salt v loonen,

7

Ende biddende en wilt niet veel spreken ghelijck die heydenen want sij meynen dat sij door hen veel sprekens verhoort worden,

8

Daerom en wilt henlieden niet ghelijck wesen, want v vader weet wel wat v van noode is, eer ghy hem bidt,

9

⁺Daerom sult ghy aldus bidden.

Onse vader die in die hemelen sijt, gheheylicht sij uwen naem,

+ B

10

laet toecomen v rijc, ghescieden moet uwen wille opder eerden als inden hemel,

11

gheeft ons heden ons ouerweselijck broot,

12

Ende vergheeft ons onze sculden, ghelijck wij oock vergheuen onsen sculdenaren,

13

Ende en leydt ons niet in becoringhe, Maer verlost ons van tquaet, Amen.

14

Want eest dat ghi den menschen vergheeft hen sonden, soo sal v hemelsche vader v oock vergheuen uwe sonden,

15

Maer eest dat ghi den menschen niet en vergheeft, soo en sal v hemelsche vader v sonden v oock niet vergheuen.

16

+ Ende als ghy vastet, soo en wilt niet droeuich worden als die hypocrijten, want sij ontstellen hen aensichten, om dat sij den menschen souden scijnen vastende, Voorwaer ick segghe v, dat sij haren loon ontfanghen hebben,

17

Maer als ghy vast, soo salft v hooft, ende wascht v aensicht,

18

dat ghi den menschen niet en scijnt vastende, maer uwen vader die int verborghen is, ende v vader diet int verborghen siet salt v loonen,

19

⁺En wilt voor v gheen schatten vergaderen in die eerde, daert den roest ende die motten verderuen, ende daert die dieuen wtgrauen ende stelen,

+ C

20

Maer vergadert voor v scatten inden hemel, daert den roest noch die motten niet en verderuen, ende daert die dieuen niet wt en grauen nocht en stelen,

21

Want daer uwen scadt is, daer is oock v herte.

* 22

Dat licht ws lichaems is v ooghe, Eest dat v ooghe simpel is, soo sal v gheheel lichaem claer wesen,

23

Maer eest dat v ooghe quaet is, soo sal alle v lichaem duyster wesen, Daerom eest so dat het licht dat in v is, duysternisse is, hoe groot sal dan die duysternisse wesen.

24

+ Niemant en can twee heeren ghedienen, Want hy sal den eenen haten ende den anderen lief hebben, oft hy sal den eenen verdraghen ende den anderen versmaden, Ghy en cont Gode niet ghedienen ende den Mammon,

25

Daerom segghe ick v lieden, en sijt niet sorchuuldich voor v ziele wat ghy eten sult, noch voor v lichaem wat ghy aendoen sult, En is die ziele niet weerdigher dan die spijse, ende dlichaem weerdigher dan het cleedt?

26

Aensiet die voghelen des hemels, want si en sayen nocht en maeyen niet, noch sij en vergaderen in die scueren niet, ende v hemelsche vader voedtse, ⁺En sijdi niet veel weerdiger dan die?

+ D

27

Ende wie isser van v lieden die al denckende mach tot sijnder lengden eenen cubitus doen?

28

Ende waerom sijdi om die cleedinghe oock besorcht? Aenmerct die lelien des velts hoe sij wassen, sij en arbeyden noch en spinnen niet,

29

Maer ick segghe v dat Salomon in alle sijn glorie niet ghecleedt en is gheweest als een van desen?

30

Maer eest dat Godt het gras des velts dwelc heden is, ende morghen inden ouen gheworpen wort alsoo cleedt, hoe veel te meer v, ghy van seer cleynen ghelooue?

31

Daerom en wilt niet sorchuuldich sijn, segghende. Wat sullen wij eten oft drincken, oft waer mede sullen wij ghedect worden?

32

want alle dese dinghen soecken die heydenen, Want v hemelsche vader weet wel dat ghy alle dese dinghen behoeft,

33

Daerom soect ierstmael trijc des hemels ende sijn rechtuerdicheyt, ende alle dese dinghen sullen v toegheworpen worden.

* 34

Daerom en wilt niet sorchuuldich sijn voor den morghen, want den dach van morghen sal voor hem seluen sorghen, want den dach heeft ghenoech met sijn eyghen quaetheyt.