Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .iiij. Capittel.

+ 1

⁺DOen werde Iesus gheleydt in die woestijne vanden gheest om dat hy ghetempteert soude worden van den duyuel,

+ A

2

Ende als hi gheuast hadde veertich daghen ende veertich nachten, daer nae heeft hy hongher ghehadt,

3

Ende siet die tempteerder aencomende heeft tot hem gheseyt. Eest dat ghy Godts sone sijt, soo segt dat dese steenen brooden worden,

4

Die welcke antwoordende heeft gheseyt. Daer is ghescreuen, die mensch en leeft alleene van den brooden niet, maer van allen woorde datter voort coemt wten monde Godts,

5

Doen heeft hem die duyuel opghenomen tot in die heylighe stadt, ende heeft hem ghestelt op die tinne vanden tempel,

6

ende hy heeft hem gheseyt. ⁺Eest dat ghy Godts sone sijt, soo worpt v nederwaerts, Want het is ghescreuen. Dat hy sijnen enghelen van v beuelen sal, ende in hen handen sullen sij v draghen, op dat ghy by auontueren uwen voet niet en stoot aenden steen,

+ B

7

Iesus seyde hem wederom daer is ghescreuen. Ghy en sult den Heere uwen Godt niet tempteren,

8

Wederom heeft hem die duyuel mede ghenomen op eenen seer hooghen berch ende heeft hem ghetoont alle die rijcken der werelt, ende haer glorie,

9

ende hy hem gheseydt. Alle dese dinghen sal ick v gheuen eest dat ghy nederuallende my aenbiddet,

10

Doen seyde hem Iesus. Ghaet henen Satana, want tis ghescreuen, Den Heere uwen Godt suldy aenbidden, ende hem alleene dienen,

11

Doen heeft hem die duyuel ghelaten, ende siet die Enghelen sijn by hem comen, ende hebben hem ghedient.

* 12

⁺+ Ende als Iesus ghehoort hadde dat Iohannes gheleuert was, soo is hy gheweken in Galileen,

+ C

13

ende verlatende die stadt Nazareth is hy ghecomen ende heeft ghewoont in Capharnaum aen die zee gheleghen, in die palen van Zabulon ende Nephthali,

14

om dat volbracht soude worden datter geseyt is door Isaiam den propheet,

15

Dlant van Zabulon ende dlant Nephthali den wech der zee ouer die Iordane van die heydensche Galilee,

16

Het volc dat in duysternissen sadt heeft ghesien een groot licht, ende den ghenen die sittende waren int lantscap van die scaduwe des doots, dien is een licht opghegaen,

17

Van dien tijt heeft Iesus begonst te preken ende te segghen. Doet penitencie, want het

[p. *760]

rijck der hemelen sal naken.

* 18

+ Ende Iesus wandelende by die zee van Galileen, heeft ghesien twee ghebroeders, Simon die ghenoemt wort Petrus ende Andreas sijnen broeder worpende het net in die zee (want het waren visschers)

19

ende hy seyde tot hen. Coemt nae my, ende ick sal v doen werden visschers der menschen,

20

⁺Ende sij ter stont verlatende die netten, sijn hem gheuolcht,

+ D

21

Ende voortgaende van daer, heeft hi ghesien twee ander ghebroeders Iacobum Zebedeus sone, ende Iohannem sijnen broeder int scip met Zebedeus haren vader, vermakende hen netten, ende hy heeftse gheroepen,

22

Ende sij ter stont verlatende die netten ende haren vader sijn hem gheuolcht.

* 23

+ Ende Iesus ghinck om gheheel Galileen, leerende in hen Sinagogen, ende prekende dat euangelie des rijcs, ende ghenesende alle siecten ende crancheden onder tvolck,

24

Ende sijnen naem is voortghegaen tot in gheheel Sirien, ende sij hebben voor hem ghebracht alle die qualijck te passe waren, met versceyden crancheden ende pijnen beuanghen, ende die de duyuelen binnen hadden, ende die maensuchtighe, ende die ghichtich waren, ende hy heeftse ghenesen,

25

ende hem sijn gheuolcht veel scaren van Galileen ende van dlantscap der thien steden, ende van Iherusalem, ende wt Iudeen, ende van ouer die Iordane.