Den gheheelen Bybel, Inhoudende het oude ende nieuwe Testament (Leuvense bijbel 1548)

* Dat .iij. Capittel.

1

⁺ENde in dien daghen is ghecomen Iohannes die dooper prekende in die woestijne van Iudeen

+ A

2

ende segghende. Doet penitencie, want het rijck der hemelen sal naken,

3

Want dit is die ghene die gheseyt is door Isaiam den propheet segghende. Die stemme des gheens die roepende in die woestijne. Bereyt den wech des Heeren, maect recht sijn paden,

4

Ende dese Iohannes hadde een cleedt van kemels hayr, ende eenen leren gordel aen sijn lendenen, ende sijn spijse was sprinckhanen ende wilt honich,

5

⁺Doen ghinghen wt tot hem die van Ierusalem ende tgheheel landt van Iudeen, ende alle dlantscap omtrent die Iordane,

+ B

6

ende sij worden van hem ghedoopt in die Iordane belijdende hen sonden.

7

+ Ende siende veel vanden Phariseen, ende Saduceen comende tot sijn doopsel heeft hy hen gheseyt. Ghy ghebroetsele der aderen, wie heeft v bewesen te vlieden van die toecomende gramscap?

8

Daerom doet weerdighe vrucht der penitencien,

9

Ende en wilt niet segghen in v seluen, Wij hebben eenen vader Abraham, ⁺want ick segghe v lieden, dat Godt machtich is van desen steenen te verwecken Abrahams kinderen,

+ C

10

Want het bijl is nv aen die wortel der boomen ghestelt, Daerom alle boom die gheen goede vrucht voorts en brengt, sal wtghehouwen worden, ende int vier gheworpen,

11

Ick doope v voorwaer int water tot penitencien, maer die nae my comen sal (die is stercker dan ick, wiens schoenen ick niet weerdich en ben te draghen) dese sal v doopen in den heylighen gheest ende den viere,

12

Wiens wan in sijn hant is, ende hy sal sijnen dorschuloer heel suyueren, ende sijn terwe verghaderen in tschuere, maer dat caf sal hy verbranden met eenen onblusschelijcken viere.

* 13

⁺+ Doen quam Iesus van Galileen aen die Iordane tot Iohannem om dat hy van hem soude ghedoopt worden,

+ D

14

Maer Iohannes verboot hem, segghende. Ic moet van v ghedoopt worden, ende coemt ghi tot my?

15

Ende Iesus antwoordende heeft tot hem gheseyt. Latet nv ghescieden, want alsoo betamet ons te volbringhen alle rechtuerdicheyt, Doen heeft hijt hem toeghelaten,

16

Ende Iesus ghedoopt sijnde is ter stont opgheclommen wt dat water, ende siet die hemelen sijn hem gheopent, ende hy heeft ghesien den gheest Godts nederdalende als een duyue, ende op hem comende,

17

Ende siet een stemme wten hemel segghende. Dit is mijnen beminden sone, inden welcke ic my wel behaecht hebbe.