Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

+ 1

⁺ALs dan Iesus gheboren was in Bethlehem Iude, in die daghen van Herodes den coninck, siet doen sijn die wijse wt den oosten lande ghecomen te Ierusalem

+ A

2

segghende. Waer is hi die gheboren is der Ioden coninck? want wij hebben sijn sterre ghesien inden oosten, ende wi sijn ghecomen om hem te aenbidden,

3

Dit hoorende die coninck Herodes is ontstelt gheweest ende gheheel Ierusalem met hem,

4

Ende vergaderende alle die princen der priesteren, ende die scriben des volcks heeft van hen ondersocht, waer Christus soude gheboren worden,

5

Ende sij hebben hem gheseyt. In Bethlehem Iude, Want alsoo isser ghescreuen door den propheet.

6

Ende ghy Bethlehem lant van Iuda, in gheender manieren en sijt ghy die minste onder die princen van Iuda, want wt v sal gaen een vorst die regeren sal mijn volck Israel,

7

Doen heeft Herodes die wijse stillijck tot hem gheroepen ende van hen naerstelijc vernomen den tijt vander sterren die hen gheopenbaert hadde,

8

⁺ende sendende hen in Bethlehem heeft hi gheseyt. Gaet henen ende vraecht naerstelijc vanden kinde, ende als ghijt vonden hebt soo bootscapt my dat wederom, op dat ick ooc comende dat aenbidde,

+ B

9

Die welcke als sij den coninc ghehoort hadden, sijn wech ghegaen, ende siet die sterre die sij ghesien hadden int ooste, ghinck voor hen, tot dat sij comende, stont bouen daer tkint was,

10

Ende sij die sterre siende sijn verblijt gheweest met een seer groote blijscappe,

11

Ende ghaende int huys, hebben sij tkint gheuonden met Maria sijn moeder, ende nederuallende hebben si

[p. *759]

dat aenbeden, ende als sij hen scatten open ghedaen hadden, so hebben sij hem gauen gheoffert, gout, wierooc, ende myrrhe,

12

Ende antwoorde ontfanghen hebbende inden slaep dat si niet wederkeeren en souden tot Herodem, soo sijn si door eenen anderen wech wederghekeert in hen lantscap.

* 13

⁺+ Ende als die wech ghereyst waren, siet so heeft die Enghel des Heeren gheopenbaert Ioseph inden slaep, segghende. Staet op ende nemet tkint ende sijn moeder, ende vliedt in Egipten, ende weest daer tot dat ict v segghen sal, Want het sal sijn, dat Herodes tkint soecken sal om dat te dooden,

+ C

14

Die welcke opstaende heeft dat kint ende sijn moeder ghenomen des nachts ende hy is wten weghe ghegaen in Egipten, Ende hy was daer tot die doot van Herodes

15

om dat volbracht soude worden tghene datter gheseyt is vanden Heere door den propheet segghende. Wt Egipten heb ick mijnen sone gheroepen,

16

Herodes siende doen dat hy bedroghen was vanden wijsen, is seer gram gheweest, ende sendende heeft hy ghedoot alle die kinderen die in Bethlehem waren, ende in alle sijn palen van die ouderdom van twee iaren ende daer beneden, nae den tijt den welcken hy onderuraecht hadde vanden wijsen,

17

Doen is veruult gheworden datter gheseyt is door Ieremias den propheet segghende,

18

Een stemme is in Rama ghehoort, een groot gheween ende ghehuyl Rachel beweenende haer kinderen, ⁺ende sij en heeft niet willen vertroost sijn om dat die niet en sijn.

+ D

* 19

+ Ende als Herodes doot was, siet soo is die Enghel des Heeren gheopenbaert Ioseph inden slaep in Egipten

20

segghende. Staet op ende neemt dat kint ende sijn moeder, ende gaet henen int lant van Israel, want sij sijn ghestoruen die des kints ziele sochten,

21

Die welcke opstaende heuet tkint ghenomen ende sijn moeder, ende hy is ghecomen int lant van Israel,

22

Maer hoorende dat Archelaus in Iudeen regneerde voor Herodes sijnen vader, soo heeft hy ghevreest daer te ghaen, ende vermaent sijnde inden slaep, is hi gheweken in die landen van Galileen,

23

Ende comende heeft hy ghewoont in een stadt die ghenoemt is Nazareth om dat volbrocht soude worden datter gheseyt is door die propheten. Hy sal Nazareus ghenaemt worden.