Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺INt hondertste ende neghen ende veertichste iaer heeft Iudas vernomen dat Antiochus Eupator quam met een menichte teghen Iudeen,

+ A

2

ende met hen Lysias die besorgher ende prouoost van die saken, hebbende met hem hondert ende thien duysent voet volcs, ende vyf duysent rosvolcs, ende tweentwintich elephanten, drijhondert waghenen met seysenen ghewapent.

3

Ende met hen heeft hem ghemengt Menelaus, ende met groote bedrieghelijcheyt badt hij Antiochum, niet voor slants welvaert, maer hopende dat hy wederom soude ghestelt werden int prinscap.

4

Maer die coninck der coninghen heeft Antiochus moet verwect teghen den sondaer, ende midts dat Lysias hem ingaff, dat dese die sake was van allen die quaden, ⁺soo heeft hy gheboden datmen hem gheuanghen (alst hen costuyme is) in die selue plaetse dooden soude.

+ B

5

Ende in die selue plaetse was eenen torre van vijftich cubitus, hebbende van allen sijden een hoop van asschen, dese hadde een wtsien steyl nederwaerts,

6

van daer heeft hy den tempelsceynder doen nederwaerts worpen, den welcken sij alle voorts stieten ter doot.

7

Ende door sulcke wet gheboerdet den ouertreder der wet te steruen, ende dat Menelaus oock der eerden niet ghedaen en werde.

8

Ende dat ghesciedde voorwaer rechtuerdelijck ghenoech, want aenghesien dat hy veel misdaden tegen Godts outaer bedreuen hadde, wiens vier ende asschen heylich was, ⁺soo is hy met die doot der asschen verdoemt gheweest.

+ C

9

Maer die coninck quam onghetempt van sinne, dat hy hem booser dan zijn vader den Ioden soude toonen.

10

Dwelck als Iudas vernomen heeft, soo heeft hy den volcke beuolen, dat sij nacht ende dach den Heere aenroepen souden, op dat hy ghelijck altijt, nv oock hen helpen soude,

11

want si voorwaer vreesden berooft te worden van die wet, ende dlant, ende vanden heylighen tempel, ende dat hy tvolck dat corts een luttel hen verblasen hadde, niet en soude wederom onder gheworpen worden den blasphemerenden natien.

12

Ende als zij allegader te samen dit deden, ende begheerden van den Heere bermherticheyt, ⁺met weeninghe ende vastenen, ligghende gheheel drij daghen achter een ghestrect ter aerden, soo heeftse Iudas vermaent dat sij hen bereyden souden,

+ D

13

Maer hy heeft metten ouders ghedacht, eer die coninck zijn heyr aenbracht tot Iudeen, ende die stadt in naeme, dat hy wttrecken soude, ende die auontuere vander saken beuelen des Heeren ordeele.

14

Aldus gheuende die macht Gode van alle, den scepper der werelt, ende die sijne vermaent hebbende, dat sij vromelijck strijden souden, ende dat zij totter doot toe voor die wetten, den tempel, die stadt, dlant, ende borghers staen souden, heeft hy zijn heyr ghestelt omtrent Modin.

15

Ende als hy den sijnen een teeken ghegheuen hadde van Gods victorie, ⁺ende hy die alderstercste ionghelinghen wtghecoren hadde, des nachts bestormende des conincs tente, heeft hy inden heyrlegheren verslaghen vier duysent mannen, ende den meesten vanden elephanten met die ghene die daer op ghestelt waren,

+ E

16

ende zij hebben der vianden leghers

[p. *755]

met seer groote vreese ende verbaestheyt veruult, ende als si die dinghen voorspoedelijc ghedaen hadden, soo zijn si wech ghegaen.

17

Ende dit is gheschiet doen den dach begonst te lichten, des Heeren bescerminghe hem helpende.

18

Maer als die coninck den smaec ghecreghen hadde vander Ioden stouticheyt, soo heeft hy met conste ghearbeyt teghen die swaricheyt der plaetsen,

19

⁺ende hi heeft die heyrlegheren ghebracht aen Bethsura, welck der Ioden stercke besloten bewaernisse was, maer hy worde veriaecht, hy quetste hem ende hy werde ghecrenct.

+ F

20

Ende den ghenen die binnen waren heeft Iudas ghesonden dat hen van noode was.

21

Ende een man Rhodocus ghenaemt heeft den vianden die heymelijcke raden ghebootscapt, wt dat Ioetsche heyr, die welcke ghesocht zijnde is gheuonden gheweest ende op ghesloten.

22

Wederom heeft die coninck spraeck ghehadt met die ghene die in Bethsuris waren, hy heeft die rechte hant ghegheuen, hy heeftse ontfanghen, hy is wech gheghaen,

23

Hy heeft met Iuda ghestreden, hy is verwonnen gheweest, Maer doen hy vernomen hadde dat Philippus wederspannich was gheworden te Antiochien, die ghelaten was ouer die saken, ⁺verslaghen sijnde van herten, die Ioden biddende, ende hen onderdaen zijnde swoer hy van alle dinghen die scenen rechtueerdich te sijne, ende versoent zijnde heeft hy sacrificie gheoffert, hi heeft den tempel gheeert, ende ghiften ghestelt

+ G

24

Hy heeft Machabeum omhelst, ende hy heeft hem van Ptolomaide tot die Gerrenen capeteyn ende prince gemaect.

25

Ende als hy te Ptolomaiden ghecomen is soo namen die van Ptolomaide swaerlijc dit verbont der vrintscappen, verbolghen zijnde dat si messchien het verbont souden breken.

26

Doen is Lysias op den rechter stoel ghegaen, ende hy heeft de redene verclaert, ende het volck te vreden ghestelt, ende hy is wederghekeert tot Antiochien, ende in deser manieren is des conincs reyse, ende wederkeeringhe vergaen.