Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel

1

⁺IN den seluen tijt keerde Antiochus oneerlijck wederom wt Persen.

+ A

2

Want hy hadde gheweest binnen die stadt die Persepolis ghenoemt wert, ende hy heeft ghearbeyt om den tempel te beroouen, ende die stadt te verdrucken, maer doen die menichte te wapenen tsamen ouer hoop liep, zijn sij ter vlucht ghekeert, ende alsoo ist ghesciedt dat Antiochus nae die vlucht scandelijck wederom quam.

3

Ende doen hy ghecomen was omtrent Ecbatanam, soo heeft hy vernomen die dinghen die aen Nicanor ende Timotheum ghesciedt waren.

4

Ende opgehauen sijnde in gramscap meynde hy dat hy het onrecht der gheender die hem veriaecht hadden soude moghen wederom verhalen op die Ioden, ende daer om heeft hy zijnen waghen seer doen voerts drijuen sonder op houden reysende, want hem dat ordeel vanden hemel seer drijuende was, om dat hy soo hoouerdelijck ghesproken hadde, dat hy te Ierusalem comen soude, ende dat hy die stadt soude maken eenen hoop vander Ioden graff.

5

Maer die Heere Israels Godt die alle dinghen siet, heeft hem gheslaghen met een onsienlijck ende ongheneselijcke plaghe. Want doen hy dese redene voleyndt hadde, soo heeft hem een grouwelijcke pijne der binnenster beuanghen, ende bitter sieecten des inghewants,

6

ende dat voerwaer rechtuerdelijck ghenoech, want hy met vele ende nieuwe tormenten die binnenste van ander menschen ghepijnicht hadde, ⁺hoe wel dat hy gheenssins van zijn quaetheyt op en hielt.

+ B

7

Maer daer ouer noch doen hy met hoouerdie veruult was, vier blasende metten monde teghen die Ioden, ende ghebiedende datmen die sake spoeden soude, ist ghesciedt dat hy met eenen ghedruysche varende vanden waghen viel, ende dat zijn leden metten swaren aenstoot zijns lichaems ghequetst worden.

8

Ende die ghene die hem liet duncken dat hy oock ghebodt hadde ouer die vloeden der zee, bouen menschelijcke mate met hoouerdie veruult, ende die die hoocheyt der berghen in een waghe meynde te weghen die worde nu, ter eerden vernedert sijnde, in eenen draech stoel ghedraghen, betuyghende in sij seluen die openbaer cracht Godts,

9

alsoo dat wt des ongoddelijcs lichaem die wormen crielden, ende dat sijn leuende vleesch in die pijnen wt vloede, ende dat oock van zijnen rueck ende stanck, het heyr beswaert worde,

10

ende die een luttel te voren meynde dat hy die sterren des hemels raecte, dien en mocht niemant draghen om die onuerdraghelijcheyt des stancs.

11

Hier wt begonst hy van die sware houerdie bekeert zijnde tot zijns selfs kennisse te comen, vermaent wesende doer die goddelijcke plaghe, doen tot elcken oghenblick zijn pijnen altijt vermeerdert worden,

12

ende doen hy selue oock nu zijnen stanck niet verdraghen en mocht, soo heeft hy aldus gheseyt, Het is recht dat een mensch Gode sal onderdanich wesen, ende dat die steruelijcke hem niet en laet duncken dat hy Godts ghelijck is.

13

Maer dese boose badt den Heere, van wien hy gheen bermherticheyt crijghen en soude.

14

⁺Ende die stadt waer toe hy quam om dat hy die der eerden ghelijck effen maken soude, ende dat hy die een graff maken soude der gheender die te hoope souden ghebracht werden, dese begheert hy nu vrij te maken,

+ C

15

ende die Ioden waer aff dat hy gheseyt hadde dat hijse niet en soude weerdich hebben om begrauen te worden, maer dat hijse den voghelen ende den wilden dieren soude te verscoeren leueren, ende die hy met haren cleynen kinderen dooden soude, die beloeft hy den borghers van Athenen ghelijck te maken,

16

ende dat hy oock den heylighen tempel, die hy te voren berooft hadde, met die beste gauen soude vercieren, ende die heylighe vaten vermenichuuldighen, ende dat hy die behoorlijcke costen tot die sacrificien soude gheuen van sijnen renten,

17

ende dat hy daer bouen oock soude een Iode wesen, ende dat hy alle die plaetsen der werelt soude doer wandelen, ende vercondighen die macht Godts.

18

Maer doen die pijnen niet op en hielden. (Want het rechtuerdich ordeel Godts was in hem ouerghecomen) soo heeft hy mishopende ghescreuen tot die Ioden op een maniere van smeeken eenen brief dese dinghen inhoudende.

19

Den alderbesten borghers den Ioden wenscht veel salicheyts ende wel te varen, ende gheluckich te wesen die coninck ende prince Antiochus.

20

⁺Ist dat ghy wel vaert ende uwe kinderen, ende dat v alle dinghen sijn nae uwe begheerte, soo dancken wy Gode seer grootelijck.

+ D

21

Ende ick oock in siecte ghestelt, maer v lieder goedercierlijck ghedachtich wedergecomen sijnde van die plaetsen van Persen, ende met een swaer crancheyt beuanghen, heb nootelijck gheacht sorghe te hebben voer dat ghemeyn profijt

22

niet van my seluen mishopende, maer veel hope hebbende om dese siecte te ontgaen.

23

Ende aenmerckende dat mijn vader oock in die tijden doen hy in die ouerste plaetsen het heyr leyde, ghetoont heeft, wie dat nae hem die heerlijcheyt ontfanghen soude,

24

op dat die ghene die in die lantscappen waren (by alsoo datter eenich teghenspoet ghesciedde, oft swaer sake ghebootscapt werde) wetende, wien dat die ouerheyt der saken ghelaten ware niet en souden verbaest werden.

25

Daer bouen ick oock aenmerckende hoe dat alle die byligghende machtighe ende die naeghebueren laghen legghen nae die bequame tijden, ende die auontuere verwachtende sijn, soo heb ick mijnen sone Antiochum te voren bewesen coninck te sijne, den welcken ic dicmael wederom treckende nae die ouerste rijcken, vele van v lieden beual ende ic heb tot hem ghescreuen die dingen die hier

[p. *751]

onder ghestelt sijn.

26

Hier om bidde ick v lieden ende beghere, dat ghy ghedachtich wesende der weldaden int tghemeyn ende int besondere dat een ieghelijck trouwe houde tot my, ende tot mijnen sone.

27

Want ick betrouwe dat hy seechbaerlijck ende beleefdelijck hem draghen sal, ende dat hi mijn propoost volghen sal, ende dat hy v lieden ghemeynsaem wesen sal.

28

Aldus is die dootslagher ende blasphemeerder seer qualijc gheslaghen, ende ghelijck hy ander menschen ghehandelt hadde, soo heeft hy buytens lants op die berghen met een allendighe doot dit leuen voleyndt.

29

Ende Philippus die sijn mede voesterlinck was, veruoerde sijn lichaem, die welcke vreesende Antiochus sone, is wech ghereyst tot Ptolomeum Philometorem in Egypten.