Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde Simon heeft ghehoort dat Triphon een groot heyr verghadert hadde, om te comen int lant van Iuda ende dat te verderuen

+ A

2

Siende dat het volck in anxt ende vreese was, is hy op ghetrocken nae Ierusalem, ende heuet volck vergadert,

3

ende vermanende heeft hy gheseyt. Ghy weet wel hoe groote strijden, dat ick ende mijn broeders, ende mijns vaders huys ghedaen hebben voor die heylige wetten ende voor die plaetsen, ende wat benautheden dat wij ghesien hebben,

4

ter saken van desen zijn alle mijn broeders ghestoruen voor Israel, ende ick ben alleen ouer ghebleuen.

5

Ende nv dat en moet my niet gheschieden dat ick mijn ziele soude sparen in alle den tijt der tribulatien, want ic en ben niet beter dan mijn broederen.

6

Daerom sal ick mijn volck wreken, ende die heylighe plaetsen, ende onse kinderen, ende huysvrouwen, want alle die Heydenen sijn verghadert om ons te verderuen wt viantscap.

7

Ende des volcs gheest is te samen ontsteken gheweest, alst dese woorden ghehoort heeft,

8

ende sij hebben gheantwoort met een groote stemme segghende. Ghy sijt onse capeteyn in Iudas ende Ionathas ws broeders stadt

9

strijdt onsen strijdt, ende al dat ghy ons segghen sult dat sullen wij doen.

10

⁺Ende verghaderende alle die orloochsche mannen, heeft hi hem ghehaest om te volmaken alle die mueren van Ierusalem, ende heeft die rontsomme beurijdt.

+ B

11

Ende hy heeft ghesonden Ionathan den sone Absalomi, ende met hem een nieuwe heyr in Ioppen. Ende als hy wt ghedreuen hadde die ghene die in die borcht waren, soo is hy daer ghebleuen.

12

Ende Triphon is vertrocken van Ptolomaida, met een groot heyr, dat hy int lant van Iuda comen soude. Ende Ionathas met hem in bewaringhe.

13

Ende Simon is aen ghecomen tot Addus teghen daensicht des velts.

14

Ende doen Triphon vernomen hadde, dat Simon op ghestaen was in Ionathas sijns broeders stadt, ende dat hy met hem strijden souden, soo heeft hy tot hem legaten ghesonden

15

segghende. Om tgelt dat Ionathas v broeder schuldich was in des conincs rekeninghe, om die saken die hy ghehadt heeft, hebben wij hem ghehouden.

16

Ende nv sendt hondert talenten siluers, ende twee sijn sonen tot ghijsels, dat hy vrij ghelaten sijnde van ons niet en vliede, ende wi sullen hem wederom seynden.

17

Ende Simon heeft verstaen dat hy in bedroch met hem sprack, hy heeft nochtans gheboden datmen tghelt gheuen soude, ende die kinderen om dat hy gheen groote viantschap behalen en soude teghen het volck van Israel segghende.

18

⁺Om dat hy hem tgelt ende die kinderen niet ghesonden en heeft, daer om is hy ghestoruen,

+ C

19

Ende hy heeft die kinderen ghesonden ende hondert talenten, ende hy heeft gheloghen, ende hy en heeft Ionathan niet laten vrij gaen.

20

Ende hier nae is Triphon binnen den lantscappe ghecomen, om dat hijt verderuen soude, ende sy hebben al omme ghedraeyt door den wech die daer leydt nae Ador, ende Simon ende sijn heyren wandelden tot alle die plaetsen werwaerts dat hy henen ghinck.

21

Maer die in die borcht waren hebben aen Triphonem boden ghesonden, dat hy haestelijck comen soude door die woostijne, ende dat hy hen lijftocht senden soude.

22

Ende Triphon heeft bereydt alle het rosvolck, dat hy dien nacht comen soude, maer daer was seer veel sneus, ende hy en is niet ghecomen in Galaaditim.

23

Ende als hy ghecomen was by Bascaman soo heeft hy Ionathan ende sijn sonen aldair ghedoodt,

24

⁺Ende Triphon is omghekeert, ende ghetrocken in sijn lant.

+ D

25

Ende Simon heeft ghesonden ende ghenomen Ionathas sijns broeders ghebeente, ende hy heeft die begrauen in Modin sijnder vaderen stadt,

26

ende gheheel Israel hebben hem bescreyt met een groot ghescrey, ende sy hebben hem beweent veel daghen.

27

Ende Simon heeft ghetimmert op sijnder vaderen ende broederen graff, een ghestichte hooghe om te sien, van ghehouwen steenen voor ende achter,

28

ende hy heefter ghestelt seuen scerp opgaende columnen deen teghen dandere, sijnen vader, ende sijnder moeder, ende sijnen vier broederen,

29

ende rontsomme van dese heeft hy groote columnen ghestelt, ende op die columnen wapenen tot een eewighe ghedenckenisse, ende by die wapenen wtghesneden scepen die ghesien souden werden van die ter zee varen.

30

Dit is het graff dat hy ghemaect heeft in Modin tot op desen dach toe.

31

Maer doen Triphon reysde met den ionghelinck Antiocho den coninc, soo heeft hy hem door bedroch ghedoodt.

32

Ende hy heeft gheregneert in sijn plaetse, ende hy heeft op sijn hooft ghestelt die croone van Asien, ende heeft een groote scade ghedaen int lant.

33

⁺Ende Simon heeft opghetimmert die vaste steden van Iudeen makende die sterck met hooghe torren ende groote mueren, ende met poorten ende sloten, ende hy heeft lijftocht gheleydt in die stercten.

+ E

34

Ende Simon heeft mannen wtghecoren, ende heeft tot Demetrium den coninc ghesonden, dat hy den lande wilde vrijcheyt doen, Want alle Triphons wercken waren by roouinghe ghedaen,

35

Ende Demetrius die coninck heeft hem tot dese woorden gheantwoort, ende heeft sulcken brief ghescreuen,

36

Die coninc Demetrius wenscht Simoni den opperste der priesteren ende der coninghen vrient, ende den Ioetschen volcke salicheyt.

37

Die gulden croone ende den hals bant die ghy ghesonden hebt, hebben wy ontfanghen, ende wy sijn bereedt met v lieden eenen grooten pays te maken, ende te scrijuen den prouoesten des conincs, dat sy v quijtscelden tghene dat wy v lieden quijtghescouden hebben.

38

Want alle die dinghen die wy v ghestelt hebben, die sijn v lieden noch vast. Die stercten die ghy voor v lieden ghetimmert hebt, die behoudt voor v lieden,

39

wy scelden oock quijte die onwetentheyden ende misdaden tot op desen dach toe, ende die croone die ghy sculdich waert, ende soo watter anders iet tribuyt gheuende was in Ierusalem dat en sy nv niet meer tribuyt sculdich.

40

Ende eest dat-

[p. *738]

ter eenighe van v lieden bequaem sijn om aen ghescreuen te worden onder die onse, ⁺die laet aen ghescreuen worden, ende latet vrede wesen tusschen ons.

+ F

41

Int hondertste ende tseuentichste iaer is der Heydenen iock af ghenomen van Israel.

42

Ende tvolck van Israel heuet begonst te scrijuen in tafelen, ende openbaer registeren der ghesciedenissen, int ierste iaer onder Simon den oppersten priester, den grooten capeteyn, ende den prince der Ioden.

43

In dien daghen is Simon aengecomen tot Gazan, ende hi heeft die omleydt met die heyrlegheren, ende hy heeft stormscranschen ghemaect, ende hy heeftse aen die stadt ghebracht, ende hy heeft eenen torre bestormt, ende hi heeften in ghenomen.

44

Ende die ghene die binnen die stormscranschen waren, die waren in die stadt wt ghebroken, ende daer is een groote beroerte ghesciet in die stadt.

45

Ende die in die stadt waren zijn gheghaen op die mueren met hen huysvrouwen ende kinderen hebbende hen cleederen ghescoert, ende sij hebben met luyder stemmen gheroepen, begherende van Simon datmen hen die rechte handen gaue,

46

ende sij hebben gheseyt. En loont ons niet nae onse quaetheden, maer nae uwe bermherticheden.

47

Ende Simon gheboocht zijnde, en heeftse niet bestormt, hy heeftse nochtans wter stadt ghedreuen ende hy heeft die tempelen ghesuyuert daer die affgoden in gheweest hadden, ende doen is hi daer binnen gheghaen met loffsanghen den Heere ghebenedijdende.

48

Ende als alle onsuyuerheyt daer wt gheworpen was, soo heeft hy daer in mannen ghestelt, die de wet doen souden, ende hy heeft die vast ghemaect, ⁺ende hy heeftse voorsij seluen tot een wooninghe ghemaect,

+ G

49

Maer die in die borcht te Ierusalem waren werden verboden dat sij niet wt en ghinghen noch en quamen int lantscap, ende coopen ende vercoopen, ende sij hebben grooten hongher ghehadt, Ende vele van henlieden isser van hongher ghestoruen,

50

ende sij hebben tot Simon gheroepen dat hy die rechte handen ontfanghen souden, ende hy heeftse hen ghegheuen, ende hy heeftse daer wt ghedreuen. Ende hy heeft die borcht ghesuyuert van die onreynicheden,

51

ende sij sijn daer in ghegaen op den drijentwintichsten dach der tweeder maent, int hondertste ende eenentseuentichste iaer met loue, ende palm tacken, ende met cinyrien ende cymbalen ende nablen, ende loffsanghen, ende liedekens om dat die groote viant vernielt was wt Israel.

52

Ende hy heeft inghesedt datmen alle iaren dese daghen houden soude met blijscap.

53

Ende hy heeft den berch des tempels sterck ghemaect, die by die borcht was, ende hy heeft daer ghewoont, hy ende die met hem waren.

54

Ende Simon heeft Iohannem sijnen sone ghesien dattet een man was, ende hi heeft hem ghemaect capeteyn van alle die heyrcrachten, ende hy heeft ghewoont in Gazaris.