Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺INT hondertste ende eenenvijftichste iaer is Demetrius Seleucus sone wtghetrocken wt die stadt van Roome, ende hy is met luttel mannen opgheclommen in een stadt by die zee, ende hy heeft daer gheregneert.

+ A

2

Ende het is ghesciedt doen hy ghecomen was int huys van sijnder vaderen rijck, dat het heyr gheuanghen heeft Antiochum ende Lysiam, om dat sij die tot hem brenghen souden.

3

Ende hy heeft dit dinck vernomen, ende heeft gheseyt. En wilt my hen aensichten niet toonen.

4

Ende het heyr heeftse ghedoodt. Ende Demetrius heeft gheseten op sijns rijcs stoel,

5

ende tot hem sijn ghecomen boose ende ongoddelijcke mannen wt Israel, ende Alcimus hen capeteyn, die priester wilde worden.

6

Ende sij hebben tvolck besculdicht by den coninck, segghende, Iudas ende sijn broeders hebben allen v vrienden ghedoot, ende ons heeft hi ooc veriaecht van onsen lande.

7

Daer om sendt nu eenen man dien ghy ghelooft, dat hy gae ende besie alle die verderffenisse die hy ons ghedaen heeft, ende des conincs lantscappen, ende dat hy pijnighe alle sijn vrienden, ende hen helpers.

8

Ende die coninck heeft van sijnen vrienden ghecoren Bacchidem, die heerscappie hadde ouer den grooten vloet int rijck, ⁺ende den coninck ghetrouwe was ende hy heeft hem ghesonden,

+ B

9

ende den ongoddelijcken Alcimum heeft hy int priesterschap ghestelt, ende hy heeft hem beuolen wrake te doen teghen die kinderen van Israel.

10

Ende sij sijn opghestaen, ende sijn ghecomen met een groot heyr int landt van Iuda, ende sij hebben boden ghesonden, ende hebben ghesproken met Iuda ende met zijn broeders, met vreedsamighe woerden in bedroch.

11

Ende sij en hebben gheen acht ghehadt op hen woerden, want sij saghen dat se ghecomen waren met een groot heyr.

12

Ende tot Alcimum, ende Bacchidem is vergadert een vergaderinghe der scriben om te vraghen, wat rechtuerdich is,

13

ende dierste waren die Assideen die onder die kinderen van Israel waren, ende sij versochten van hen vrede.

14

Want sij hebben gheseyt, Daer is een man ghecomen die een priester is van Aarons sade, ende hi en sal ons niet bedrieghen.

15

Ende hy heeft met hen vreedsamighe woerden ghesproken, ende heeft hen ghesworen, segghende, Wy en sullen v lieden gheen quaet doen, noch uwen vrienden,

16

ende sij hebben hem ghelooft, ende hy heefter van hen lieden ghegrepen tsestich mannen, ende hij heeftse ghedoodt op eenen dach, nae dwoert datter ghescreuen is.

17

⁺Het vleesch van uwen heylighen, ende hen bloet hebben sij wtghestort rontsom Ierusalem, ende daer en was niemant diese begroeue.

+ C

18

Ende die vreese ende veruaertheyt heeft alle tvolck oueruallen, want sij hebben gheseyt, In hen en is gheen waerheyt noch recht ordeel, want sij hebben ouertreden het verbont, ende den eedt die sij ghesworen hadden.

19

Ende Bacchides heeft den heyrlegher vertrocken van Ierusalem, ende hy is aengheuallen op Bethzecha, ende heeft ghesonden, ende heefter veel ghegrepen vanden ghenen die tot hem ghevloden waren, ende sommighe vanden volcke heeft hy dootgheslaghen, ende in eenen grooten put gheworpen.

20

Ende hy heeft dat lantscap Alcimo beuolen, ende hy heeft met hem hulpe ghelaten, tot sijn behelpen. Ende Bacchides es wech ghereyst totten coninck,

21

ende Alcimus dede seer groote naersticheyt om die ouerheyt van sijn priesterscap,

22

ende sij sijn alle tot hem vergadert die hen volck verstoorden, ende sij hebben dlant van Iuda inghenomen, ende sij hebben een groote plaghe ghedaen in Israel.

23

Ende Iudas heeft ghesien alle die quade dinghen die Alcimus ghedaen heeft, ende die ghene die met hem waren den kinderen van Israel, ⁺veel meer dan die Heydenen,

+ D

24

ende hy is wtghetrocken in alle die palen van Iudeen rontsom, ende hy heeft wrake ghedaen in de affuallighe mannen, ende sij hielden op van voerts meer wt te comen int lantscap.

25

Ende Alcimus heeft ghesien dat Iudas, ende die met hem waren die ouerhant ghecreghen hadden, ende hy heeft bekent dat hy hen niet en mocht wederstaen, ende hy is wederghekeert totten coninck, ende hy heeftse besculdicht van vele misdaden.

26

Ende die coninck heeft ghesonden Nicanorem eenen van sijnen edelsten princen die viantscap houdende was teghen Israel, ende hy heeft hem gheboden het volck te verderuen.

27

Ende Nicanor is ghecomen in Ierusalem met een groot heyr, ende hy heeft tot Iudam ende tot sijn broeders ghesonden met vreedtsamighe woerden in bedroch segghende,

28

En laet gheenen strijdt wesen tusschen my ende v lieden, ick sal met luttel mannen comen, op dat ick v aensichten sien mach met vrede.

29

Ende hy is tot Iudam ghecomen, ende sij hebben malcanderen ghegroet vredelijck, ende die vianden waren bereedt Iudam te grijpen.

30

Ende Iudas heeft het woert vernomen, ⁺dat hy met bedroech tot hem ghecomen was ende hy is veruaert gheweest van hem, ende hy en heeft niet meer willen sijn aensicht sien.

+ E

31

Ende Nicanor heeft vernomen dat sijnen raet gheopenbaert was, ende hy is Iude te ghemoet ghegaen ten strijde, omtrent Capharsalama.

32

Ende daer isser gheuallen van Nicanors heyr omtrent vijf duysent mannen, ende sij sijn ghevloden in Dauids stadt.

33

Ende nae dese ghesciedenissen is Nicanor opghetrocken opden berch Sion, ende sommighe van die priesters des volcs sijn wtghecomen om hem te groeten met vrede, ende om hem te toonen die brantofferanden die voer den coninck gheoffert werden.

34

Ende hy heeftse bespottende versmaet ende besmet, ende hy heeft houerdelijck ghesproken,

35

ende hi heeft met toornicheyt ghesproken segghende, Ten sij dat Iudas gheleuert werde, ende sijn heyr in mijn handen, soe sal ick ter stont als

[p. *729]

ick wedercomen sal wesen met vrede, dit huys verbranden. Ende hi is wtghegaen met grooter gramscap,

36

ende die priesters sijn binnen ghegaen, ende hebben ghestaen voer daenschijn des outaers ende des tempels, ende sij hebben al weenende gheseyt,

37

Ghy Heere hebt dit huys vercoren om uwen naem aen te roepen daer in, dattet een huys des biddens ende aenroepens soude wesen uwen volcke,

38

doet wrake in desen mensch, ende in sijn heyr, ende laetse vallen doert tsweert. Weest ghedachtich haerder blasphemien, ende en gheeft hen niet dat sij blijuen.

39

Ende Nicanor is wtghegaen van Ierusalem, ende hy heeft sijn heyr aengebrocht tot Bethhoron, ⁺ende hem is te ghemoete ghecomen het heyr van Syrien.

+ F

40

Ende Iudas is aenghecomen in Adarsa, met drij duysent mannen, ende Iudas heeft ghebeden ende gheseyt,

41

Die ghesonden waren van den coninck Sennacherib. Heere om dat sij uwen naem blasphemeerden, soo isser een enghel wtghecomen, ende die heefter van hen lieden gheslaghen hondert ende vijuentachtentich duysent,

42

alsoo vernielt dit heyr in ons aensicht heden, ende laet die andere wetten, dat hy qualijck ghesproken heeft op v heylighe plaetsen, ende ordeelt hem nae sijn quaetheyt.

43

Ende die heyren hebben tsamen ghestreden op den derthiensten dach der maent Adar, ende Nicanors heyr leghers sijn vernielt gheweest, ende hy is dierste gheuallen inden strijdt.

44

Maer nae dat sijn heyr ghesien heeft dat Nicanor gheuallen was, soo hebben sij hen wapenen wech gheworpen, ende sijn ghevloden,

45

⁺ende sij hebbense veruolcht een dach reyse verre van Adazer tot datmen coemt in Gazara, ende sij hebben gheslaghen met trompetten nae hen met beteekeninghen,

+ G

46

ende sij sijn wtghecomen van alle die casteelen van Iudeen rontsomme, ende sij verwaeydense metten hornen, ende sij werden wederom ghekeert tot hen, ende sij sijn alle metten sweerde gheuallen, ende daer en is van henlieden niet soe veel als een te leuen ghelaten.

47

Ende sij hebben hen roouen ghenomen tot eenen buet, ende Nicanors hooft hebben sij affghehouwen, ende sijn rechte hant die hy hoouerdelijck wtghesteken hadde, ende sij hebben die ghebracht ende ghehanghen teghen Ierusalem,

48

ende het volck is seer blijde gheweest, ende sij hebben dien dach in groote blijscappe ouerghebracht.

49

Ende hy heeft inghestelt datmen desen dach alle iaer houden sal op den derthiensten dach der maent Adar.

50

Ende dlant van Iuda heeft stil gheweest een luttel daghen.