Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺SIet ick sende mijnen enghel, ende hy sal den wech bereyden voor mijn aensicht. Ende ter stont sal tot sijnen heylighen tempel comen die heerscapper dien ghy soect, ende die enghel den testaments dien ghy wilt. Siet hy coemt, seyt die Heere der heyrscaren,

+ A

2

ende wie sal moghen dencken den dach van zijnder toecoemst? ende wie sal staen om hem te sien? Want hy is als smeltende vier, ende als der volders cruyt,

3

ende hy sal die kinderen van Leui Suyueren, ende hy salse syghen als gout, ende als siluer, ende sij sullen sijn den Heere offerende sacrificien in rechtuerdicheyt.

4

Ende het sacrificie van Iuda ende Ierusalem sal den Heere behaghen, als die daghen der eewicheyt, ende als die oude iaren,

5

ende ick sal tot v lieden comen int ordeel, ⁺ende ick sal een rasch ghetuyghe wesen den tooueraers, ende den ouerspeelders, ende den meyneedighen, ende die onrecht doen met ghewelt aenden dachloon vanden huerlinck, den weduwen ende den weesen, ende die den wtlander verdrucken, noch my niet gheureest en hebben, seyt die Heere der heyrscaren.

+ B

6

Want ick ben die Heere, ende ick en worde niet verandert, ende ghy kinderen van Iacob en sijt niet vernielt,

7

want van uwer vaderen daghen sijdi wech ghegaen van mijn wettighe gheboden, ende en hebt die niet bewaert. Keert weder tot my, ende ick sal tot v lieden weder keeren, seyt die Heere der heyrscaren. Ende ghy hebt gheseyt. Waer in sullen wij weder keeren?

8

Sal een mensch Godt doorsteken, want ghy my doornagelt? Ende ghi hebt gheseydt. Waer mede doornaghelen wij v? ⁺In die thienden ende in die ierste vruchten.

+ C

9

Ende in die armoeden sijt ghy vermalendijt, ende alle ghy volck doornaghelt my,

10

Brengt alle die thiende in die schuere, ende laet daer spijse wesen in mijn huys, ende proeft my hier op, seyt die Heere, ist dat ick v die sluysen des hemels niet open en doe, ende v wtstorte die benedictie tot oueruloedicheyt toe,

11

ende ick sal voor v lieden straffen den verslindere, ende hy en sal die vrucht ws lants niet verderuen noch daer en sal gheenen onuruchtbaren wijngaert int velt sijn, seyt die Heere der heyrscaren.

12

Ende alle die Heydenen sullen v salich segghen, want ghi sult een lustich lant sijn, seyt die Heere der heyrscaren,

13

v lieder woorden zijn te machtich gheworden op my, seyt die Heere. Ende ghy hebt gheseyt. Wat hebben wij teghen v ghesproken?

14

Ghy hebt gheseyt. Hy is ydel die den Heere dient, ⁺ende wat bate hebben wij dat wij sijn gheboden ghehouden hebben, ende dat wij droeuich ghewandelt hebben voor den Heere der heyrscaren?

+ D

15

Daerom segghen wij nv salich die vermetelijcke, want sij sijn voorwaer opghesticht ongoddelijcheyt doende, ende sij hebben Godt ghetempteert, ende sijn behouden gheweest.

16

Doen hebben sij ghesproken die den Heere vreesen, een ieghelijck met sijnen naeste. Ende die heere heuet aenmerct, ende ghehoort, ende den boeck der ghedenckenissen is ghescreuen voor hem, den ghenen die den Heere vreesen, ende die sijnen naem dencken.

17

Ende sij sullen my zijn, seyt die Heere der heyrscaren in dien dach, dat ict doe, tot een eyghen goet, ende ick sal hen sparen, ghelijck een vader sijnen sone spaert die hem dient.

18

Ende bekeert v, ende ghy sult sien wat ondersceyt datter is tusschen den rechtuerdighen ende den onrechtuerdighen, ende tusschen den ghenen die Godt dient, ende die hem niet en dient.