Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

ENde nv tot v lieden is dit ghebodt o ghi priesters,

2

Ist dat ghijy niet hooren en wilt, ⁺ende dat ghijt op v herte niet stellen en wilt, dat ghy mijnen naem glorie gheeft, seydt die Heere der heyrscaren, soo sal ick op v lieden armoede senden, ende ick sal uwe benedictien vermalendijden, ende ic sal die vermalendijden, om dat ghijt op therte niet gheleydt en hebt.

+ A

3

Siet ick sal v lieden den arm wechworpen, ende ic sal op v aensichten stroeyen den dreck van uwe hooghe feestdaghen, ende hy sal v met hem nemen.

4

Ende ghy sult weten dat ick tot v lieden dit ghebodt ghesonden hebbe, dat mijn verbont sijn soude met Leui, seyt die Heere der heyrscaren.

5

Mijn verbont heeft met hem gheweest des leuens ende des vreedts, ende ic heb hem vreese ghegheuen, ende hi heeft my gheureest, ende van mijns naems aensicht vreesde hy,

6

⁺die wet der waerheyt heeft in sijnen mont gheweest, ende gheen boosheyt en is in sijn lippen gheuonden, inden vrede ende gherechticheyt heeft hy met my ghewandelt, ende hy heefter vele affghekeert van der boosheyt,

+ B

7

Want die lippen der priesters sullen die wetenheyt bewaren, ende die wet sullen si wt sijnen monde versoecken, want hy is een enghel des Heeren der heyrscaren,

8

Maer ghilieden sijt vanden wech affghegaen, ende hebter vele verarghert in die wet, ghy hebbet tverbont van Leui ghebroken, seyt die Heere der heyrscaren.

9

Daerom heb ick v lieden oock versmadelijck ghemaect ende vernedert alle den volcken ghelijck ghy mijn weghen niet bewaert en hebt, ende hebt de aensichten wt ghenomen in die wet.

10

En hebben wij alle niet een vader? ende heeft ons niet

[p. *718]

een Godt ghescapen? Waer om versmaedt dan een ieghelijck van ons lieden sijnen broeder, brekende het verbont van uwen vaderen?

11

⁺Iudas heeft ouer ghetreden, ende daer is een afgrijselijcheyt gheschiet in Israhel, ende in Ierusalem, want Iudas heeft die heylighinghe des Heeren besmedt, die hy bemint heeft, ende hy heeft die dochter ghehadt van eenen vreemden godt.

+ C

12

Die Heere sal den man vernielen die dat ghedaen heeft, den meester ende den discipel van Iacobs tabernakelen ende een ghifte offerende den Heere der heyrscaren.

13

Ende dit hebdi weder om ghedaen. Ghy ouerdectet met tranen des Heeren outaer, met weeninghe ende ghehuyl, alsoo dat ick voortaen niet meer en sal sien nae het sacrificie, noch ick en sal niet versoenlijcs nemen van uwer hant.

14

Ende ghy hebt gheseyt. Om wat sake? Om dat die Heere betuycht heeft tusschen v ende die huysvrouwe van uwer iongher iuecht, die ghy versmaet hebt, ende dits v medeghesellinne, ⁺ende die huysvrouwe ws verbonts.

+ D

15

En heeftse een niet ghemaect, ende datter ouert en ist niet sijnen gheest? Ende wat soect die eene anders dan Godts saet? Daerom bewaert uwen gheest, ende die huysvrouwe van uwer ioncheyt en wilt niet versmaden.

16

Als ghijse haet, soo laetse gaen, seyt die Heere Israels Godt, ende die boosheyt sal sijn cleedt ouerdecken, seyt die Heere der heyrscharen, bewaert uwen gheest, ende en wilten niet versmaeden.

17

Ghy hebt den Heere doen arbeyden in uwe redenen. Ende ghy hebt gheseyt. Waer in hebben wij hem doen arbeyden? Daer in dat ghy segt. Alle die quaet doet, die is goet voor des Heeren aensicht, ende sulcke behaghen hem, oft emmer waer is die Godt des ordeels?