Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DEN last van des Heeren woort tot Israhel in die hant Malachie.

+ A

2

Ick heb v lieden lief ghehadt, seyt die Heere. Ende ghy hebt gheseyt. Waer in hebdy ons lief ghehadt? En was Esau Iacobs broeder niet, seyt die Heere. Ende ick heb Iacob lief ghehadt,

3

maer Esau heb ick ghehaet? ende heb zijn berghen tot een woestijne ghestelt, ende sijn erffenisse tot draken der wildernisse,

4

Maer ist dat Idumeen seyt. Wij sijn verdoruen, maer wederkeerende sullen wi op timmeren datter verdoruen is, dit seyt die Heere der heyrscaren. Dese sullen timmeren, ende ick salt verderuen, ende sij sullen ghenoemt worden die palen der ongoddelijcheyt, ende tvolck den welcken die Heere gram is tot inder eewicheyt,

5

Ende v ooghen sullent sien, ⁺ende ghisult segghen. Laet die Heere grootelijck ghepresen worden op die pale van Israel.

+ B

6

Die sone eert sijnen vader, ende die knecht sijnen heere, Daerom ist dat ick vader ben, waer is mijn eere? Ende ben ic die Heere, waer is mijn vreese, seyt die Heere der heyrscaren?

7

tot v o ghy priesters die mijnen naem versmaet, ende hebt gheseyt. Waer in hebben wij uwen naem versmaet? Ghy offert op mijnen outaer besmedt broot, ende ghy segt. Waer in hebben wij v besmedt? Daer in dat ghy segt. Des Heeren tafel is versmaet.

8

Ist dat ghi een blende slachofferande offert om te dooden en ist niet quaet? ⁺Ende ist dat ghy offert dat cruepel ende sieck is om ten offer te dooden, en ist niet quaet? Biedt dat uwen prince, ist dat hem behaghen sal, oft dat hy v aensicht ontfanghen sal, seyt die Heere der heyrscaren.

+ C

9

Ende nv bidt Godts aensicht, dat hy v lieder ontferme (want van uwer hant is dit ghesciet) oft hy eenichsins uwe aensichten ontfinghe, seyt die Heere der heyrscaren

10

Wie isser onder v lieden die de doeren sluyte, ende mijnen outaer ontsteke om niet? Mijnen wille en is tot v niet, seyt die Heere der heyrscaren, ende ic en sal gheen ghifte ontfanghen van uwer hant,

11

Want vanden opganck der sonnen totten onderganc is mijnen naem groot onder die Heydenen, ende in alle plaetse wort mijnen naem sacrificie ghedaen, ⁺ende een suyuer offerande gheoffert, want mijnen naem is groot onder die Heydenen, seyt die Heere der heyrscaren.

+ D

12

Ende ghy hebt dien besmedt, midts dien dat ghi segt. Des Heeren tafel is besmet, ende datter op gheleyt wort dats versmadelijck, metten viere die dat verslint.

13

Ende ghy hebt gheseyt. Siet dits vanden arbeyt, ende ghi hebt dat wech geblasen, seyt die Heere der heyrscaren, ende ghy hebt van die roouen in ghebracht dat manc ende cranc was, ende hebt dat tot een ghifte inghebracht. Sal ick dat ontfanghen van v ieder hant, seyt die Heere?

14

Vermalendijt is die bedrieghelijcke die in zijn cudde een manneken heeft, ende een belofte doende offert den Heere dat cranc is, want ick ben een groot coninck, seyt die Heere der heyrscaen, ende mijnen naem is veruaerlijck onder die Heydenen.