Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺IN dien daghe salder een open fonteyn sijn den huyse van Dauid, ende den bewoonders van Ierusalem, tot afwasschinghe des sondaers ende der maensuchtigher.

+ A

2

Ende tsal sijn in dien dach, seyt die Heere der heyrscaren, dat ick te niet doen sal alle die namen der affgoden vander eerden ende men en sal diervoorts niet meer ghedachtich wesen, ende die valsche propheten, ende den onsuyueren gheest sal ick vander eerden nemen.

3

⁺Ende tsal sijn alsser iemant voorts meer sal ghepropheteert hebben soo sullen hem segghen sijn vader ende sijn moeder die hen ghewonnen hebben. Ghy en sult niet leuen, want ghy hebt loghentael ghesproken in des Heeren naem ende sijn vader ende sijn moeder die hem ghewonnen hebben sullen hem doorsteken als propheteren sal.

+ B

4

Ende tsal zijn in dien daghe dat de propheten sullen bescaemt werden een ieghelijck wt sijn visioen, als hy sal ghepropheteert hebben, noch sij en sullen niet ouerdect worden met eenen mantele van sacklaken ghemaect om te lieghen,

5

⁺maer hy sal segghen. Ick en ben gheen propheet. Ick ben een mensch een ackerman, want Adam is mijn exempel van mijn ioncheyt aff,

+ C

6

Ende hem sal gheseyt werden. Wat sijn dese wonden int midden van uwen handen? Ende hy sal segghen hiermede ben ick ghewont, in hen huys die my beminden.

7

O sweert wert verwect teghen mijnen herder, ende opden man die my aenhanght, seyt die Heere der heyrscaren. ⁺Slaet den herder, ende die scapen sullen verstroeyt worden, ende ick sal mijn hant keeren tot die cleyn kinderen.

+ D

8

Ende sij sullen in alle landen sijn seyt die Heere die twee deelen sullen in haer vernielt worden ende sullen ontbreken, ende het derde deel sal in haer achter ghelaten werden.

9

Ende ick sal het derde deel doort vier leyden, ende ick salse branden ghelijck het siluer ghebrant wert, ende ick salse proeuen ghelijck tgout gheproeft wert. Hy sal mijnen naem roepen, ende ic sal hem verhooren, Ic sal segghen. Ghy sijt mijn volck, ende hy sal segghen. Heere mijn God.