Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

DEn last van des Heeren woort ouer Israel. ⁺Die Heere den hemel wtreckende, ende die eerde funderende, ende sceppende des menschen gheest daer inne seydt.

+ A

2

Siet ick sal Iherusalem stellen eenen ouerdorpel der gulsicheyt alle den volcken intronde, maer Iuda sal oock in die belegghinghe wesen teghen Ierusalem.

3

Ende tsal sijn in dien dach, dat ick Ierusalem sal stellen eenen steen des lasts, alle den volcken, alle de ghene die hem opheffen sullen, die sullen met ontweesnijdinge ghescoert worden, ende teghen haer sullen verghadert worden alle die rijcken der eerden.

4

In dien dach seyt die Heere, sal ic alle peert tot verbaestheyt slaen ende sijnen berijder tot ontsinnicheyt, ⁺ende op thuys van Iuda sal ick mijn ooghen open doen, ende alle die peerden der volcken sal ick met blentheyt slaen.

+ B

5

Ende die vorsten van Iuda sullen segghen in hen herte. Laet die bewoonders van Ierusalem my versterct worden inden Heere der heyrscaren haren Godt.

6

In dien dach sal ick die vorsten van Iuda stellen als eenen heert viers in thout, ende als een brant viers int hoy, ende si sullen verslinden ter rechter ende ter slincker sijden alle volcken rontsomme, ende Ierusalem sal wederom bewoont worden in zijn plaetse in Ierusalem.

7

Ende die Heere sal behouden die tabernakelen van Iuda, als int beghinsel, ⁺op dat het huys van Dauid niet grootelijck en glorieere, ende die glorie der gheender die in Ierusalem woonen teghen Iudam.

+ C

8

In dien dach sal die Heer bescermen die bewoonders van Ierusalem. Ende tsal sijn dat soo wie wt henlieden misdoen sal in dien dach, die sal zijn als Dauid, ende Dauids huys als Gods huys, als den enghel des Heeren in hen aensicht.

9

Ende tsal zijn in dien daghe, dat ick sal soecken om te vernielen alle die Heydenen, die teghen Ierusalem comen,

10

Ende ick sal wtstorten op Dauids huys, ende op die be-

[p. *716]

woonders van Ierusalem den gheest der gratien ende der bedinghen, ⁺ende sij sullen opsien tot my den welcken sij doorsteken hebben, ende si sullen hem bescreyen met een bescreynghe als ouer eenen eenighen gheborenen sone, ende sij sullen rouwich zijn ouer hem alsmen pleech rouwich te zijn ouer die doot vanden iersten gheborene.

+ D

11

In dien dach sal een groot gheclach sijn in Ierusalem, als die bescreynghe van Adremmon int velt van Mageddon.

12

Ende dlant sal ghescrey maken, elcke familie, ende familie besonder, Die familien des huys van Dauid besonder, ende hen vrouwen besonder.

13

Die familien des huys van Nathan besonder, ende hen vrouwen besonder, die familien des huys van Leui besonder, ende hen vrouwen besonder, Die familien Semei besonder ende hen vrouwen besonder.

14

Alle die ander familien elcke familie besonder, ende hen vrouwen besonder.