Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺DOet op Libane v poorten, ende laet het vier v cederboomen eten.

+ A

2

Huylt abeelboom, want den cederboom is gheuallen, want die heerlijcke zijn verdoruen, Huylt ghy eycken boomen van Basan, want dat beheymt wout is afghehouwen.

3

Die stemme van tghehuyl der herders, want hen heerlijcheyt is verdoruen, die stemme vander leeuwen ghebriesch, want die hoouerdie der iordanen is verdoruen.

4

Dit seyt die Heere mijn God. Voedt die slachscapen,

5

die welcke diese beseten hadden doodense, ende si en waren niet droeuich, ende si vercochtense segghende. Ghebenedijt is die Heere, wij zijn rijc gheworden, ende hen herders en spaerden hen niet.

6

Ende ick en sal voortaen niet meersparen ouer die bewoonders der eerden, ⁺seyt die Heere. Siet ick sal die menschen leueren, eenen ieghelijcken in sijns naesten hant, ende in sijns conincs hant, ende si sullen dlant in stucken houwen, ende ick en salt niet verlossen wt haren handen.

+ B

7

Ende ick sal die slachscapen voeden, daerom o ghy arme van tcudde, ende ic hebbe tot my ghenomen twee roeden, die eene heb ick ghenoemt schoonheyt, ende die andere heb ic ghenoemt tzeelken, ende ick hebbe tcudde gheuoedt.

8

Ende ick heb drij herders affghesneden in een maent, ende mijn ziele is benauwt in hen, want haerlieder ziele heeft verandert gheweest in my.

9

Ende ick heb gheseyt, ick en sal v lieden niet voeden. Dat sterft, ⁺dat sterue, ende dat affghehouwen wort, dat worde afghehouwen, ende die ouerghebleuene laet verslinden een ieghelijck sijns naesten vleesch.

+ C

10

Ende ick heb mijn roede ghenomen die ghenoemt was schoonheyt, ende heb die affghesneden, op dat ick mijn verbont te niet doen soude dat ick hadde ghemaect met allen volcken.

11

Ende het is te niet ghebracht op dien dach, ende die arme van tcudde hebbent alsoo ghekent, diet my bewaren, want het is des Heeren woort.

12

Ende ick heb tot henlieden gheseyt, ist goet in v lieden ooghen, haelt mijnen loon ende ist niet, soo rust. Ende si hebben mijnen loon gheweghen dertich silueren penninghen.

13

Ende die Heere heeft tot my gheseyt, Werpt dat tot den beeltmakere, het is den eerlijcken prijs metten welcken ick ghewaerdeert ben van henlieden. ⁺Ende ick heb die dertich silueren penninghen ghenomen, ende ick hebse gheworpen in des Heeren huys aen den beeldmakere.

+ D

14

Ende ick heb mijn tweede roede affghesneden die zeelken hiet, om dat ick ontbinden soude die broerderlijcheyt tusschen Iudam ende Israel.

15

Ende die Heere heeft tot my gheseyt. Noch neemt tot v die ghereetscappen van eenen dwasen herder,

16

want siet ick sal eenen herder op deerde verwecken, die de verlatene niet besoecken en sal, het verstroeydde niet soecken en sal, ende tghebroken niet ghenesen en sal, ende tghene dat staet en sal hy niet opuoeden, ende tvleesch der vetten sal hy eten, ende hen clauwen sal hy affscoeren.

17

O ghy herder ende affgodt, dat cudde verlatende, het sweert op sijnen arm, ende op zijn rechte ooghe, sijnen arm sal van dorheyt verdroocht werden, ende zijn rechte ooghe verduysterende sal verdonckert worden.