Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

BEgheert vanden Heere reghen inden spaden tijt, ende die Heere sal sneeu maken, ⁺ende hy sal hen den plasreghen gheuen, elcken cruyt int velt,

+ A

2

want die affgodts beelden hebben onnutticheyt ghesproken, ende die waersegghers hebben loghene ghesien, ende die droomers hebben te vergheefs ghesproken, sij troosten ydelijck, daer om zijn si wech gheleydt als een cudde, si sullen verdriet lijden, om dat si gheenen herder en hebben.

3

Op die herders is mijnen rasenden torn vergramt, ende op die bocken sal ick versoecken, want die Hee-

[p. *715]

re der heyrscaren sal zijn cudde besoecken, het huys van Iuda, ⁺ende hy heeftse ghestelt als een peert sijnder glorien inden strijdt,

+ B

4

wt hem is den hoeck, ende wt hem den naghel, wt hem den orlooschen boghe, wt hem sal alle scatter tsamen wt comen.

5

Ende si sullen wesen als stercke, vertredende het slijck der straten inden strijdt, ende si sullen strijden want die Heere is met hen, ende die beclimmers der peerden sullen bescaemt worden.

6

Ende ick sal thuys van Iuda verstercken, ende thuys van Ioseph sal ick behouden, ende ick salse bekeeren, want ick sal haerlieder ontfermen, ende si sullen wesen ghelijck si waren doen icse niet verworpen en hadde, ⁺want ick ben die Heere haerlieder Godt, ende ick salse verhooren.

+ C

7

Ende si sullen zijn als die stercke van Ephraim, ende hen herte sal hem verblijden als vanden wijne, ende hen kinderen sullen sien, ende blijde zijn, ende hen herte sal verhueghen inden Heere.

8

Ick sal nae hen wispelen, ende ick salse vergaderen, want ic hebse verlost, ende ick salse vermenichfuldighen, ghelijck si te voren vermenichfuldicht waren,

9

Ende ic salse saeyen onder die volcken, ende van verre sullen si mijns ghedachtich wesen, ende si sullen leuen met haren kinderen, ende si sullen weder keeren,

10

⁺Ende ick salse weder om leyden wten lande van Egipten, ende vanden Assirien sal icse verghaderen, ende totten lande van Galaad ende Libanus sal ickse aenbrenghen, ende hen en sal gheen plaetse gheuonden worden.

+ D

11

Ende hi sal door gaen in die enghicheyt der zee, ende hi sal in die zee die baren slaen, ende alle die diepten des vloets sullen bescaemt worden, ende die hoouerdie van Assur sal vernedert worden, ende den scepter van Egipten sal wech gaen.

12

Ick salse verstercken inden Heere, ende in sijnen naem sullen si wandelen, seyt die Heere.