Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺DEn last van des Heeren woort int lant van Hadrach ende van Damascus zijnder rusten, want des Heeren is des menschens ooghe, ende alle der gheslachten van Israel,

+ A

2

Emath is oock in zijn palen, ende Tirus, ende Sidon, want si hebben voorwaer die wijsheyt voor hen sterc aenghenomen.

3

Ende Tirus heeft zijn stercte ghetimmert, ende heeft siluer te hoope vergadert als eerde ende gout als tslijck der straten.

4

Siet die Heere salse besitten, ende hy sal haer stercheyt in die zee slaen ende dese sal metten viere verslonden worden,

5

Ascalon salt sien ende vreesen, ende Gaza, ende hy sal wter maten seer rouwich zijn, ⁺ende Accaron want haer hope bescaemt is, ende die coninc sal van Gaza verghaen, ende Ascalon en sal niet bewoont worden.

+ B

6

Ende die sceyder sal sitten in Azoten, ende ick sal die hoouerdicheyt der Philistijnen vernielen.

7

Ende ick sal haer bloet van haeren mont nemen, ende haer affgrijselijcheden wt dat midden van haren tanden, ende hy sal oock achter ghelaten worden onsen Gode. Ende hy sal wesen als eenen vorst in Iuda. Ende Accaron als Iebusens.

8

Ende ick sal mijn huys omringhen met die ghene die voor my strijden, gaende ende wederkeerende, ende die scatter en sal ouer hen niet meer doorgaen, want ick hebt nv ghesien in mijnen ooghen.

9

Verhuecht v ghenoech ghy dochter van Sion, Maect iolijt dochter van Ierusalem. ⁺Siet v coninc sal v comen rechtuerdich ende een salichmaker hy is arm ende sidt op eenen ezel, ende op een vuelen der ezelinnen ionghe.

+ C

10

Ende ick sal den waghen met vier peerden vernielen wt Ephraim, ende het peert van Ierusalem, ende den boghe der orloghen sal ghebroken worden, ende hy sal vrede den Heydenen spreken, ende zijn macht sal zijn vander zee totter zee, ende vanden vloeden tot die eynden der eerde.

11

Ende ghy hebt ooc int bloet ws testaments v gheuanghenen wt ghelaten, wt den poel daer gheen water in en is.

12

Bekeert v tot die stercte ghy ghebondene der hopen, ende ick sal v heden oock vercondighende dobbele weder om gheuen,

13

Want ick heb Iudam voor my wtgherect als eenen boghe, ⁺ic heb Ephraim veruult, ende ick sal v sonen verwecken Sion op v kinderen ghy griecken landt, ende ick sal v stellen als tsweert der stercker.

+ D

14

Ende die Heere sal op hen ghesien worden, ende sijnen scicht sal als den blixem wtghaen, Ende die Heere Godt sal met een trompet slaen, ende hy sal ghaen int ghedruyssche van tsuyden.

15

Die Heere der heyrscharen salse bescermen, ende si sullen verslinden, ende onderworpen met die steenen der slinghere, ende diet drincken sullen droncken worden als van wijne, ende si sullen veruult worden als scalen, ende als die hoornen des outaers.

16

Ende die Heere hen God salse salich maken in dien dach, als tcudde zijns volcks, want die heylighen steenen sullen op ghehauen worden op zijn lant,

17

want wat is zijn goetheyt, oft wat is zijn schoonheyt, dan die tarwe der wtuercorenen, ende den wijn maechden voortbrenghende.