Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde dwoort des Heeren der heyrscaren is ghesciet segghende.

+ A

2

Dit seyt die Heere der heyrscaren. Ic hebbe bemint Sion met groote liefde, ende met groote verbolghentheyt hebbe ick voor haer ialours gheweest,

3

dit seydt die Heere der heyrscaren. Ick ben wederghekeert tot Sion, ende ick sal woonen int midden van Ierusalem, ende Ierusalem sal ghenoemt worden die stadt der waerheyt, ende den berch des Heeren der heyrscaren den gheheylichden berch.

4

Dit seyt die Heere der heyrscaren. Noch sullen die oude mans ende oude vrouwen woonen in die straten van Ierusalem, ende mannen in welcker hant een stock wesen sal om die veelheyt der daghen

5

Ende die straten der stadt sullen veruult worden met cleyn onmondighe kinderen ende meyskens spelende op haer straten.

6

Dit seyt die Heere der heyrscaren. Ist dattet swaer om doen scijnen sal in die ooghen der bleuelinghen van desen volcke in die daghen, salt in mijn ooghen ooc swaer wesen, seyt die Heere der heyrscaren.

7

Dit seyt die Heere der heyrscaren. Siet ick sal mijn volc verlossen vant oosten lant, ⁺ende van dlant vander sonnen onderganck.

+ B

8

Ende ick salse aenbrenghen, ende

[p. *714]

sij sullen woonen int midden van Ierusalem. Ende si sullen my tot een volck zijn, ende ick sal hen tot een Godt zijn, in die waerheyt, ende in die rechtuerdicheyt.

9

Dit seyt die Heere der heyrscaren. Laet uwe handen versterct worden, die in dese daghen hoort dese woorden, door den mont der propheten in den dach inden welcken dat het huys des Heeren der heyrscaren ghefundeert was, dat den tempel soude ghetimmert worden,

10

Want voorwaer voor die daghen en was den loon der menschen niet, noch den loon der behelpigher beesten, noch die wtgaende ende ingaende en hadde gheenen vrede in die tribulatie, ende ic heb alle menschen ghelaten eenen ieghelijcken teghen sijnen naesten.

11

Maer nv en sal ick nae die ierste voorleden daghen den bleuelinghen van desen volck niet doen, seyt die Heere der heyrscaren,

12

maer het sal een saet des vreedts wesen, den wijngaert sal zijn vrucht gheuen, ende deerde sal haer groeytsel gheuen, ende die hemelen sullen haren dauwe gheuen, ende ick sal die bleuelinghen van desen volcke alle dese dinghen doen besitten.

13

⁺Ende tsal zijn ghelijck ghy waert een vermalendijdinghe onder die Heydenen ghy huys van Iuda ende huys van Israel, alsoo sal ick v lieden verlossen, ende ghy sult die benedictie wesen, en wilt niet vreesen, laet v handen versterct worden,

+ C

14

want dit seydt die Heere der heyrscaren. Alsoo ick ghedacht hebbe dat ick v lieden soude pijninghen, doen v vaderen my tot gramschap verwect hadden, seydt die Heere,

15

ende ick en hebbe niet ontfermt, alsoo heb ick weder om ghekeert zijnde ghedacht in dese daghen, dat ick den huyse van Iuda ende Ierusalem weldoen soude, en wilt niet vreesen.

16

Dit sijn dan die woorden die ghy doen sult. Spreect die waerheyt een ieghelijck met sijnen naesten. Ordeelt die waerheyt ende het ordeel des vreedts in uwe poorten.

17

Ende een ieghelijck en dencke gheen quaet teghen sijnen vrint in v herten, ende en bemint gheenen valschen eedt, want alle dese dinghen zijnt die ick hate, seyt die Heere.

18

⁺Ende dwoort des Heeren der heyrscaren is tot my ghesciet segghende.

+ D

19

Dit seyt die Heere der heyrscaren. Die vasten der vierder, ende die vasten der vijfster, ende die vasten der seuenster, ende die vasten der thienster maent sal den huyse van Iuda wesen tot blijscap ende vrolijcheyt, ende tot heerlijcke feestdaghen, alleenlijck bemint die waerheyt ende den vrede.

20

Dit seydt die Heere der heyrscaren. Hoe langhe salt zijn tot dat die volcken comen sullen ende woonen in veel steden,

21

ende dat die inwoonders sullen gaen deen totten anderen segghende. Laet ons gaen, ende bidden des Heeren aensicht, ende laet ons den Heere der heyrscaren soecken, ick sal oock ghaen.

22

Ende daer sullen veel volcken ende machtighe natien comen, om den Heere der heyrscaren te soecken in Ierusalem, ende om des Heeren aensicht te verbidden.

23

Dit seyt die Heere der heyrscaren. In die daghen in die welcke thien menschen sullen aengrijpen wt alle die talen der Heydenen, ende si sullen aengrijpen die slippe van eenen Ioetschen man, segghende. Wij sullen met v lieden ghaen, want wij hebben ghehoort dat die Heere met v lieden is.