Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ENde tis ghesciet int vierde iaer Darij des conincs, dat het woort des Heeren gheschiet is tot Zachariam inden vierden dach der neghenster maent, welcke is Caslen.

+ A

2

Ende Sarasat ende Rogom-melech, ende die mannen die met hem waren, hebben ghesonden tot des Heeren huys, om des Heeren aensicht te bidden,

3

dat si segghen souden den priesteren van thuys des Heeren der heyrscaren, ende den propheten, sprekende. Moet ick weenen in die vijfste maent, oft moet ick my heylighen ghelijc ick nv ghedaen hebbe veel iaren?

4

⁺Ende dwoort des Heeren der heyrscaren is tot my ghesciet seggende.

+ B

5

Spreect tot alle tvolc der eerden, ende tot die priesters segghende. Doen ghilieden vastet ende weendet, in die vijfste ende seuenste maent door dese tseuentich iaren, hebdi voor my dat vasten gheuast?

6

ende als ghy ghegheten hebt ende ghedroncken. En hebdi dan niet voor v seluen gheten ende voor v seluen ghedroncken?

7

En sijn dit niet die woorden die de Heere ghesproken heeft in die hant van sijnen iersten propheten, doen Ierusalem noch bewoont was, ende rijck was, si ende die steden rontsom haer, ende dat si suytwaerts ende tot die veltlanden bewoont worden?

8

⁺Ende des Heeren woort is tot Zachariam ghesciet segghende.

+ C

9

Dit spreect die Heere der heyrscaren segghende. Ordeelt warachtich ordeel, ende doet bermherticheyt ende ontfermenisse, een ieghelijck met sijnen broeder.

10

Ende die weduwe ende die weese, ende den aencomelinck ende den armen en wilt tonrecht niet besculdighen, ende een man en dencke gheen quaet sijnen broeder in sijn herte.

11

Ende si en wildens niet aenmercken, ende si hebben die scoudere omghekeert wechgaende, ende hen ooren hebben si beswaert dat si niet hooren en souden,

12

Ende si hebben hen herte ghestelt als eenen adamant dat si die wet niet hooren en souden, ⁺ende die woorden die de Heere der heyrscaren ghesonden heeft in sijnen gheest, door die hant van die voorgaende ierste propheten, ende daer is een groote verbolghentheyt ghesciet vanden Heere der heyrscaren.

+ D

13

Ende tis ghesciet alsoo hy ghesproken heeft, ende si en hebben niet ghehoort, alsoo sullen si roepen, ende ick en salse niet verhooren, seyt die Heere der heyrscaren,

14

ende ick hebse verstroeyt door alle die rijcken die si niet en weten ende dlant is van hen verlaten, om datter niemant en was doorgaende ende wederkeerende, ende si hebben het lustich lant ghestelt tot een woestijne.