Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde ick heb my omgekeert, ende heb mijn ooghen opghehauen ende ghesien, ende siet vier wtgaende waghenen met vier peerden, wt het midden van twee berghen, ende die berghen waren metalen berghen.

+ A

2

Inden iersten waghen waren roode peerden, ende inden tweeden waghen swarte peerden,

3

ende inden derden waghen witte peerden, ende inden vierden waghen bonte stercke peerden.

4

Ende ick heb gheantwoort ende gheseyt totten enghel die in my sprac. Wat sijn dese mijn Heere?

5

Ende die engel heeft gheantwoort ende tot my gheseydt. Dit zijn die vier winden des hemels, die wtgaen om dat si staen souden voor den heerscapper van gheheel eertrijck,

6

⁺Daer die swerte peerden in waren, die ghinghen wt nae het noorden lant, ende die witte sijn na hen wtghegaen, ende die bonte zijn wtghegaen nae tsuyden lant

+ B

7

maer die dalderstercste waren zijn wtghegaen, ende sochten om te ghaen, ende al om te loopen door alle daertrijck. Ende hy heeft gheseyt. Gaet henen ende doorwandelt die aerde, ende si hebben die eerde doorwandelt.

8

Ende hy heeft my gheroepen, ende heeft tot my ghesproken segghende. Siet die daer wtgaen int noorden lant, dese hebben mijnen gheest doen rusten, int noorden lant.

9

Ende des Heeren woort is tot my ghesciet segghende.

10

⁺Neemt vander oueruoeringhen van Holdai ende van Tobia ende van Idaia, ende ghy sult comen in dien dach ende ghy sult gaen int huys Iosie des soons Sophonie die van Babilonien ghecomen sijn.

+ C

11

Ende ghy sult nemen gout ende siluer, ende ghi sult croonen maken, ende ghi sultse stellen opt hooft van Iesus Iosedecs sone des grooten priesters,

12

ende ghy sult tot hem spreken seggende. Dit seyt die Heere der heyrscaren segghende. Siet die man, Opganc is sijnen naem, ende onder hem salt opgaen, ende hi sal eenen tempel den Heere timmeren.

13

Ende hy sal den Heere den tempel oprichten, ende hy sal die glorie draghen, ⁺ende hy sal sitten ende heerscappie hebben op sijnen stoel, ende sal priester sijn op sijnen stoel, ende den raet des vreedts sal tusschen die twee sijn.

+ D

14

Ende siet die croonen sullen wesen voor Helem ende Tobia ende Idaia, ende Hen den sone Sophonie een ghedenckenisse in des Heeren tempel.

15

Ende die verre sijn sullen comen, ende sij sullen timmeren inden tempel des Heeren, ende ghy sult weten dat die Heere der heyrscaren my tot v lieden ghesonden heeft, maer dit sal wesen ist dat ghy metten ghehoor hoort des Heeren ws Godts stemme.